2 Samuel 2 - ŊMALƐ KRƆŊKRƆŊ LƐ

Awo David Yuda Maŋtsɛ

¹ Enɛ sɛɛ lɛ David yabi Yehowa nii akɛ, “Ani miya ni miyaŋɔ Yuda maji lɛ eko lo?” Yehowa hã lɛ hetoo akɛ, “Yaa!” David bi akɛ, “Mɛɛ maŋ nɔ miya?” Yehowa to he akɛ, “Yaa Hebron.”

² No hewɔ lɛ, David yiŋ kɛtee Hebron, lɛ kɛ eŋãmɛi enyɔ lɛ, Ahinoam, Yezreelyoo lɛ, kɛ Abigail ni ji Nabal Karmelnyo lɛ okulafo lɛ.

³ David kɛ hii tabilɔi ni fata ehe lɛ kɛ amɛŋamɛi lɛ kɛ amɛbii fɛɛ hu tee, ni amɛyahi Hebron maji lɛ amli.

⁴ Fee sɛɛ lɛ Yuda hii lɛ ba Hebron amɛbafɔ David mu kɛwo lɛ Yuda maŋtsɛ. Be ni agba David akɛ Yabesh Gileadbii lɛ ji mɛi ni fu Saul gbonyo lɛ,

⁵ David tsu bɔfoi kɛtee Yabesh-Gileadbii lɛ aŋɔɔ, ni ayakɛɛ amɛ akɛ, “Yehowa ajɔɔ nyɛ akɛ nyɛfu nyɛnuŋtsɔ Saul nyɛkɛfee lɛ ejurɔ nɛkɛ.

⁶ Yehowa asumɔ nyɛ kɛ suɔmɔ ni bɛ naagbee, ni eye nyɛ anɔkwa; ni mi hu mafee nyɛ ejurɔ mato najiaŋ yɛ nɔ ni nyɛfee nɛɛ hewɔ.

⁷ No hewɔ lɛ, nyɛwajea nyɛhe, ni nyɛfea ekãa, ejaakɛ nyɛmaŋtsɛ Saul egbo, ni Yuda akutso lɛ ebafɔ mi mu kɛwo mi amɛmaŋtsɛ.”

Awo Ishboshet Israel Maŋtsɛ

⁸ Saul tatsɛ Abner, Ner bi lɛ, mɔ ni Saul bi Ishboshet kɛjo foi kɛtee Mahanaim,

⁹ ni jɛi eyawo lɛ Gilead kɛ Ashur kɛ Yezreel kɛ Efraim kɛ Benyamin kɛ Israel fɛɛ maŋtsɛ yɛ.

¹⁰ Saul bi Ishboshet eye afii nyɔŋmai ejwɛ kɛ enyɔ be ni ebɔi maŋtsɛyeli; ni eye maŋtsɛ afii enyɔ. Yuda akutso lɛ pɛ kɛkɛ nyiɛ David sɛɛ.

¹¹ David ye Yuda maŋtsɛ yɛ Hebron afii kpawo kɛ nyɔji ekpaa.

Israel kɛ Yuda wu

¹² Abner, Ner bi lɛ, kɛ Saul bi Ishboshet tsuji lɛ jɛ Mahanaim ni amɛba Gibeon.

¹³ Yoab, Zeruia bi lɛ, hu kɛ David tsuji lɛ fã, ni amɛkɛ Ishboshet tsuji lɛ yakpe yɛ Gibeon kpaakpo lɛ naa. Mɛnɛɛmɛi bua kpaakpo lɛ he afã kome nɛɛ, ni Mɛnɛɛmɛi hu bua kpaakpo lɛ he afã kome nɛɛ hu.

¹⁴ Kɛkɛ ni Abner kɛɛ Yoab akɛ, “Agbɛnɛ hã oblahiabii lɛ aba amɛbaka amɛ kpɔiaŋ yɛ wɔhiɛ.” Yoab here lɛ nɔ ekɛɛ, “Ojogbaŋŋ, amɛmiiba.”

¹⁵ Kɛkɛ ni mɛi nyɔŋma kɛ enyɔ jɛ Benyaminbii, ni ji Saul bi Ishboshet sɛɛbii, lɛ ateŋ ni amɛ kɛ David tabilɔi lɛ hu ateŋ mɛi nyɔŋma kɛ enyɔ yaka amɛkpɔiaŋ.

¹⁶ Amɛteŋ mɔ fɛɛ mɔ mɔ ehenyɛlɔ yitso, ni edu ehenyɛlɔ lɛ ŋmawuiaŋ kakla, ni amɛ fɛɛ amɛyashwie shi, ni amɛnyɔnyɔi shi kome. No hewɔ lɛ, atsɛɔ Gibeon kpɔ nɛɛ mli he ni sane nɛɛ ba yɛ lɛ akɛ “Kakla Ŋa nɔ.”

¹⁷ Ta ni awu gbi lɛ mli yawa naakpa, ni David tsuji lɛ wo Abner kɛ Israelbii lɛ afoi.

¹⁸ Zeruia bihii etɛ̃, Yoab kɛ Abishai kɛ Asahel, yɛ ta lɛ naa gbi lɛ. Ni Asahel, amɛteŋ mɔ ni joɔ foi tamɔ ŋa nɔ soŋai lɛ,

¹⁹ kɔlɔ foi eshwie Abner sɛɛ, ni ejeee Abner sɛɛ egbaaa ninejurɔgbɛ loo abɛkugbɛ.

²⁰ Abner kwɛ esɛɛ kɛkɛ ni ebi lɛ akɛ, “Kwɛ, Asahel, bo ni?” Asahel here nɔ akɛ, “Hɛɛ! Mi ni.”

²¹ Abner kɛɛ Asahel akɛ, “Gba oninejurɔ gbɛ loo obɛkugbɛ koni omɔ oblahiabii lɛ moŋ eko koni oshɔ̃ etawuunii yɛ edɛŋ.” Shi Asahel ekpɛlɛ̃ɛɛ akɛ ekpale yɛ Abner sɛɛ.

²² Abner ku sɛɛ ekɛɛ Asahel akɛ, “Kpalemɔ ni oku osɛɛ ni oya. Mɛɛba ni obaahã minine akpa yɛ onɔ nɛɛ? Te mafee tɛŋŋ mawo mihiɛ nɔ yɛ onyɛmi Yoab hiɛ hu kɛji eeeba lɛ nakai lɛ?”

²³ Shi Asahel emiii akɛ ejeɔ Abner sɛɛ. No hewɔ lɛ, Abner kɛ ekpɔlɔ lɛ shishi gbu Asahel musu, ni akplɔ lɛ yafã kpo yɛ Asahel sɛɛ, kɛkɛ ni Asahel gbee shi, ni egbo yɛ enajiaŋ nɔŋŋ. Mɛi fɛɛ ni bashɛɔ he ni Asahel gbonyo lɛ kã lɛ waa damɔɔ shi.

²⁴ Shi Yoab kɛ Abishai nyiɛ Abner sɛɛ aahu kɛyashi amɛyashɛ Ama Gɔŋkpɔ lɛ ni yɔɔ Gia bokãgbɛ, yɛ Gibeon ŋa lɛ nɔ gbɛ lɛ he; kɛkɛ ni hulu nyɔ shi.

²⁵ Kɛkɛ ni Benyaminbii lɛ bua amɛhe naa akɛ asafo ku, ni amɛbafata Abner he, ni amɛyadamɔ gɔŋ ko yiteŋ.

²⁶ Kɛkɛ ni Abner bo etsɛ Yoab, ni ekɛɛ lɛ akɛ, “Aso nɛkɛ sɔŋŋ wɔɔhã klante aye awui lo? Oleee akɛ kɛfee sɛɛ lɛ joomɔ kɛkɛ ji nɔ ni baaba lo? Mɛɛ be nɔŋŋ omɛɔ dani ofã owebii lɛ koni amɛfɔ̃ɔ amɛnyɛmimɛi lɛ asɛɛnyiɛmɔ?”

²⁷ Yoab hã Abner hetoo ekɛɛ, “Mina Nyɔŋmɔ akɛ kɛjeee wiemɔ ni owie nɛɛ hewɔ ni kulɛ ja wɔ leebi dani miwebii lɛ baafɔ̃ɔ amɛnyɛmimɛi lɛ asɛɛnyiɛmɔ.”

²⁸ Kɛkɛ ni Yoab hã akpã tɛtɛrɛmantɛrɛ lɛ, ni ewebii lɛ fɔ̃ɔ Israelbii lɛ asɛɛnyiɛmɔ, ni asaŋ amɛkpa amɛ kɛ ta lɛ wuu.

²⁹ Abner kɛ ewebii lɛ nyiɛ nakai nyɔɔŋ lɛ mli fɛɛ kɛfo mli kɛtsɔ̃ Yordan Jɔɔ lɛ mli, ni amɛyafo Yordan lɛ, ni amɛtsa nyiɛmɔ lɛ nɔ leebi muu lɛ fɛɛ, ni amɛba Mahanaim.

³⁰ Be ni Yoab ekpa Abner kɛ ewebii lɛ asɛɛnyiɛmɔ, ni ebua ewebii lɛ anaa lɛ, ena akɛ eshwɛ Asahel kɛ David webii lɛ ateŋ mɛi nyɔŋma kɛ nɛɛhu.

³¹ Shi David tsuji lɛ gbe Benyaminbii lɛ ateŋ mɛi ohai etɛ̃ kɛ nyɔŋmai ekpaa.

³² Amɛwo Asahel gbonyo lɛ, ni amɛyato lɛ yɛ ewekumɛi afũuhe ni yɔɔ Betlehem lɛ. No sɛɛ lɛ, Yoab kɛ ewebii lɛ tsa nɔ, ni amɛnyiɛ nyɔɔŋnyɔɔŋ fɛɛ, ni be ni je kɛɛ etsɛreɔ wɛlɛŋŋ lɛ amɛyashɛ Hebron.