2 Samuel 11 - ŊMALƐ KRƆŊKRƆŊ LƐ

David kɛ Batsheba

¹ Afi ni nyiɛ sɛɛ lɛ, be ni maŋtsɛmɛi fãa ta lɛ, David wo Yoab kɛ esafoiatsɛmɛi kɛ Israel tabilɔi gbɛ, ni amɛyakpãtã Amonbii lɛ ahiɛ. Amɛyasa Raba maŋ lɛ yi; shi David diɛŋtsɛ lɛ ehi shi yɛ Yerusalɛm.

² Gbi ko gbɛkɛnaashi blɛoo mli lɛ, David ete shi kɛjɛ wɔ mli, ni eeshara shi yɛ maŋtsɛ we lɛ tsu lɛ yiteŋ, ni ejɛ jɛi ni ena yoo ko ni miiju ehe. Kɛji okwɛ yoo nɛɛ lɛ ehe yɛ fɛo jogbaŋŋ naakpa.

³ Kɛkɛ ni David tsu koni atao mɔ ni yoo lɛ ji. Abakɛɛ lɛ akɛ Eliam biyoo ni; atsɛɔ lɛ Batsheba, Uria, Hitnyo lɛ, ŋa ji lɛ.

⁴ David tsu bɔfoi ni ayaŋɔ Batsheba abahã lɛ. Akɛ yoo lɛ ba David ŋɔɔ ni ekɛ lɛ wɔ. (Nakai be lɛ mli lɛ Batsheba etee tsuiasɛɛ ni etsuu ehe egbe naa.) Kɛkɛ ni Batsheba ku esɛɛ etee ewe lɛ.

⁵ Batsheba na akɛ ena musu, ni no hewɔ lɛ, etsu ayakɛɛ David akɛ ehiɛ musu.

⁶ Kɛkɛ ni David tsu atee Yoab ŋɔɔ ni ayakɛɛ lɛ akɛ, “Hã Uria, Hitnyo lɛ, abana mi.” No hewɔ lɛ, Yoab hã Uria ba David ŋɔɔ.

⁷ Be ni Uria ba lɛ David bi lɛ bɔ ni Yoab kɛ tabilɔi lɛ yɔɔ, kɛ bɔ ni ta lɛ hu yaa nɔ hãa.

⁸ No sɛɛ lɛ, David kɛɛ Uria akɛ, “Yaa owe lɛ, ni oyawo otsui.” Be ni Uria shi maŋtsɛ we lɛ, David tsu akɛ akɛ nikee ayahã Uria.

⁹ Shi Uria eyaaa ewe lɛ, shi moŋ lɛ ekɛ etabilɔi ni buɔ ehe ni ekɛnyiɛ lɛ fɛɛ yawɔ Maŋtsɛ we lɛ koi lɛ shi.

¹⁰ Be ni David na nu akɛ Uria eyaaa ewe lɛ, David bi lɛ akɛ, “Ani jeee gbɛ ojɛ oba nɛɛ? Mɛɛba oyaaa owe lɛ?”

¹¹ Uria jie naa akɛ, “Kpãŋmɔ Adeka lɛ kɛ Israel kɛ Yuda fɛɛ miiwɔ bui amli, ni minuŋtsɔ tatsɛ Yoab kɛ esafoiatsɛmɛi lɛ fɛɛ jwere ŋa nɔ. Te feɔ tɛŋŋ ni mi lɛ miyaa miwe ni miyayeɔ nii, ni minuɔ dãa, ni mi kɛ miŋa wɔɔ hu? Mina onane akɛ miwoŋ nɛkɛ nɔ ko feemɔ.”

¹² Kɛkɛ ni David kɛɛ Uria akɛ, “Kɛji nakai ni lɛ, hii biɛ ŋmɛnɛ hu mɔ koni wɔ lɛ mawo bo gbɛ ni oya.” No hewɔ lɛ, Uria hi shi yɛ Yerusalɛm nakai gbi lɛ kɛ enɔ jetsɛremɔ hu.

¹³ Ni David tsu ayatsɛ Uria kɛba eŋɔɔ ni ekɛ lɛ ta okplɔ̃ he amɛye nii. Ehã Uria nu dãa ni etɔ, shi nakai gbi lɛ gbɛkɛ lɛ hu lɛ Uria kɛ etabilɔi ni buɔ ehe lɛ wɔ maŋtsɛ koi lɛ shi, ni eyaaa ewe lɛ.

¹⁴ Enɔ jetsɛremɔ lɛ David ŋma Yoab wolo, ni ekɛtsu Uria ekɛtee eyahã lɛ.

¹⁵ David ŋma yɛ wolo lɛ mli akɛ, “Hã Uria adamɔ ta lɛ naa yɛ he ni wa fe fɛɛ, ni no sɛɛ lɛ nyɛgbalaa nyɛhe shi nyɛshĩa lɛ koni nine atsɔ̃ enɔ ni agbe lɛ.”

¹⁶ Enɛ hewɔ lɛ, be mli ni Yoab foɔ sa ewoɔ maŋ lɛ he lɛ, ehã Uria damɔ he ni ele akɛ henyɛlɔi lɛ ahii kakabãi yɔɔ lɛ.

¹⁷ Henyɛlɔi lɛ je kpo kɛjɛ maŋ lɛ mli, ni amɛkɛ Yoab bawu; David tsuji lɛ ekomɛi nyɔnyɔɔ, Uria Hitnyo lɛ hu nyɔ.

¹⁸ Kɛkɛ ni Yoab tsu koni ayabɔ Maŋtsɛ David ta lɛ mli amaniɛ fɛɛ tswɛm.

¹⁹ Ewo bɔfo lɛ shi akɛ, “Kɛji obɔ maŋtsɛ ta lɛ mli amaniɛ lɛ fɛɛ tswɛm ogbe naa,

²⁰ ni aleee nɔ emli aaafu, ni eeebi bo akɛ, ‘Mɛɛ hewɔ nyɛkɛ ta lɛ bɛŋkɛ amɛmaŋ lɛ kpaakpa lɛ? Ani nyɛleee akɛ amɛbaajɛ maŋ gbogbo lɛ nɔ amɛtsɛ̃rɛ̃ nyɛ gãi?

²¹ Nyɛkaiii Gideon bi Abimelek gbele lɛ akɛ yoo ni jɛ maŋ gbogbo nɔ ekɛ wiɛbi tswa eyiteŋ yɛ Tebez ni egbo lɛ? Mɛɛba mɔ ni nyɛtsi nyɛbɛŋkɛ amɛmaŋ gbogbo lɛ nakai lɛ?’ Kɛji maŋtsɛ lɛ bi bo nɛkɛ lɛ, okɛɛ lɛ akɛ, ‘Otsulɔ Uria, Hitnyo lɛ, hu enyɔ.’ ”

²² Bɔfo lɛ yiŋ eba, ni ehã wiemɔ ni Yoab kɛtsu lɛ lɛ shɛ David dɛŋ.

²³ Ebakɛɛ David akɛ, “Henyɛlɔi lɛ je kpo kɛjɛ maŋ lɛ mli koni amɛkɛ wɔ abawu yɛ ŋa lɛ nɔ; shi wɔnine tsɔ amɛnɔ, ni wɔshwie amɛ kɛyashi maŋ agbo lɛ naa tɔ̃ɔ.

²⁴ Jɛi ni gãitsɛ̃lɔi lɛ jɛ maŋ gbogbo lɛ nɔ amɛtsɛ̃rɛ̃ otsuji agãi, ni maŋtsɛ tsuji lɛ ekomɛi gboi. Otsulɔ Uria, Hitnyo lɛ hu egbo.”

²⁵ David kɛɛ bɔfo lɛ akɛ, “Yaakɛɛ Yoab akɛ ekahã sane nɛɛ mihao lɛ, ejaakɛ klante yɔɔ nɛɛ ekpaaa mɔ hiɛ ni ekpãtãa. Ehã maŋ lɛ nitswiamɔ lɛ mli awa moŋ koni eye nɔ. Yaawo lɛ hewalɛ.”

²⁶ Be ni Uria ŋa, Batsheba, nu akɛ ewu Uria egbo lɛ, efo ewu lɛ.

²⁷ Be ni Batsheba eye ŋkɔmɔ egbe naa lɛ, David tsu ni ayaŋɔ lɛ kɛba maŋtsɛ we lɛ, ni etsɔ eŋa. Batsheba kɛ David fɔ binuu. Shi sane ni David ye nɛɛ eŋɔɔɔ Yehowa naa.