2 Samuel 1 - ŊMALƐ KRƆŊKRƆŊ LƐ

David nu akɛ Saul egbo

¹ Saul gbele sɛɛ be ni David ku esɛɛ kɛjɛ ta ni efã kɛyaplene Amalekbii lɛ eba lɛ, ebahi shi gbii enyɔ yɛ Ziklag.

² Ni gbi ni ji etɛ̃ lɛ nɔ lɛ, Saul tabilɔi lɛ eko kɛ ehe atade ni etserɛ kɛ eyiteŋ hu mlu ba David ŋɔɔ kɛjɛ ta lɛ naa. Be ni nuu lɛ shɛ David hiɛ lɛ eho egbee shi, ni ekɛ ehiɛ bu shi, ni ekoto David.

³ David bi nuu lɛ akɛ, “Nɛgbɛ ojɛ obaa nɛɛ?” Nuu lɛ to he akɛ, “Israel nsra lɛ mli mijo foi kɛjɛ kɛbaa nɛɛ.”

⁴ David saa ebi nuu lɛ akɛ, “Te nibii amli tamɔ tɛŋŋ? Gbaa mi.” Nuu lɛ here nɔ akɛ, “Wɔtabilɔi lɛ ejo foi yɛ henyɛlɔi lɛ ahiɛ; agboi babaoo diɛŋtsɛ. Saul kɛ ebi Yonatan fɛɛ enyɔnyɔi.”

⁵ David bi oblanyo lɛ ni gbaa lɛ sane lɛ akɛ, “Te ofee tɛŋŋ ole akɛ Saul kɛ ebi Yonatan egboi hu?”

⁶ Oblanyo lɛ hã David hetoo ni ekɛɛ, “Heniianaa ni miyaje Gilboa Gɔŋ lɛ nɔ, ni miyanina Saul ni ebu ekpɔlɔ lɛ nɔ, be mli ni henyɛlɔi lɛ ashwiilii lɛ kɛ okpɔŋɔnɔtalɔi lɛ miibɛŋkɛ lɛ waa lɛ.

⁷ Be ni Saul fo ehe ekwɛ esɛɛ ni ena mi lɛ, etsɛ mi; ni mihere lɛ nɔ akɛ, ‘Ofainɛ, naa mi.’

⁸ Ebi mi akɛ, ‘Bo namɔ ni?’ Mijie naa akɛ, ‘Ofainɛ, Amaleknyo ji mi’.

⁹ Kɛkɛ ni ekɛɛ mi akɛ, ‘Tsi oba ni obagbe mi, ejaakɛ ŋmiŋmi emɔ mi, tsɛ wala fioo yɛ mimli’.

¹⁰ No hewɔ lɛ, mitsi mibɛŋkɛ lɛ, ni migbe lɛ, ejaakɛ mina akɛ eshigbeemɔ nɛɛ sɛɛ lɛ bɔ fɛɛ bɔ ni fee lɛ eyi naŋ wala. No sɛɛ lɛ, mijie maŋtsɛ akekre ni fi eyitso lɛ kɛ ga ni ewo yɛ ekɔŋ lɛ, ni mikɛba mikɛbaahã bo, minuŋtsɔ nɛɛ.”

¹¹ Kɛkɛ ni David mɔ ehe atade lɛ mli, ni egbala lɛ yɛ ewerɛ sɔŋŋ ni eho ehe naa. Mɛi fɛɛ ni fata ehe lɛ hu fee nakai,

¹² ni amɛye ŋkɔmɔ, ni amɛwo yara, ni amɛfo, ni amɛhi ŋmaa kɛyashi gbɛkɛ yɛ Saul kɛ ebi Yonatan kɛ Yehowa maŋbii ni enyɔnyɔɔ yɛ ta lɛ mli lɛ ahewɔ.

¹³ David bi oblanyo lɛ ni gbaa lɛ sane lɛ akɛ, “Nɛgbɛ nyo ji bo?” Oblanyo lɛ here nɔ akɛ, “Gbɔ ni ji Amaleknyo ko bi ji mi.”

¹⁴ Kɛkɛ ni David bi lɛ akɛ, “Mɛni hewɔ ni osheee gbeyei, shi onyɛ owo onine nɔ, ni okɛkpãtã mɔ ni Yehowa efɔ lɛ mu lɛ hiɛ nɛɛ?”

¹⁵ Amrɔ nɔŋŋ kɛkɛ ni David tsɛ oblahiabii lɛ ateŋ mɔ kome, ni ekɛɛ, “Tswaa lɛ nɔ ni ogbe lɛ.”

¹⁶ Ni etswa oblanyo lɛ nɔ, ni egbo. Kɛkɛ ni David kɛɛ, “Oyi sɔ̃ atere bo diɛŋtsɛ, ejaakɛ bo diɛŋtsɛ onaabu eye odase eshi bo, ejaakɛ okɛɛ, ‘Migbe mɔ ni Yehowa efɔ lɛ mu lɛ.’ ”

David fo Saul kɛ Yonatan

¹⁷ Kɛkɛ ni David kɛ lala nɛɛ fo Saul kɛ ebi Yonatan,

¹⁸ ni efã akɛ atsɔ̃ɔ Yudabii lɛ lala nɛɛ. (Aŋmã lala nɛɛ yɛ Yashar Wolo lɛ mli).

¹⁹ “Ao Israel, onunyam lɛ, ehiɛ akpãtã yɛ ogɔŋkpɔi lɛ anɔ nɛɛ. Te aye tɛŋŋ ni kãkãlɔi enyɔnyɔi nɛɛ?

²⁰ Nyɛkayagbaa enɛ yɛ Gat; akatsi enɛ tã yɛ Ashkelon blohuiaŋ koni Filistibii lɛ abiyei lɛ akanya, ni foolɔi lɛ abiyei lɛ miitumɔ.

²¹ “Nyɛ Gilboa gɔji, bɔ loo nu akanɛ nyɛnɔ, ni nyɛnɔ ŋmɔji aŋala. Ejaakɛ jɛi abule kãkãlɔi lɛ atsɛŋi lɛ yɛ, kɛ Saul tsɛŋ lɛ po, ejaakɛ afɔŋ he mu dɔŋŋ.

²² Mɛi ni nyɔnyɔɔ lɛ ala lɛ kɛ kãkãlɔi lɛ hu afɔ lɛ Yonatan gãi lɛ ekuuu esɛɛ efolo kɛjɛɛɛ he; ni Saul klante lɛ hu gbe henyɛlɔi lɛ.

²³ “Asumɔ Saul kɛ Yonatan amɛwala be mli, ni amɛhe yɛ fɛo. Amɛgbele mli tete, amɛmli gbalaaa; amɛhe yɛ oya fe okropɔŋ po, ni amɛhe wa hu fe jata.

²⁴ “Nyɛ Israel biyei, nyɛfoa Saul, mɔ ni bumɔ nyɛ mamai tsuji fɛɛfɛji, ni ehã nyɛ shika jwinei nyɛshwie nyɛtadei anɔ lɛ.

²⁵ “Te aye tɛŋŋ ni kãkãlɔi enyɔnyɔi yɛ ta teŋ tuuŋtu nɛɛ hu? Agbe Yonatan yɛ ogɔŋkpɔi lɛ anɔ.

²⁶ “Osane miidɔ mi, minyɛmi Yonatan; osane eŋɔɔ minaa kɛho. Osuɔmɔ ni okɛsumɔ mi lɛ yɛ naakpɛɛ, efe yei asuɔmɔ tete.

²⁷ “Te aye tɛŋŋ ni kãkãlɔi enyɔnyɔi ni tawuunii hu ahiɛ ekpãtã nɛɛ?”