2 Mose 9 - ŊMALƐ KRƆŊKRƆŊ LƐ

Kooloi gboi

¹ Kɛkɛ ni Yehowa kɛɛ Mose akɛ, “Yaa Farao ŋɔɔ ni oyakɛɛ lɛ akɛ, bɔ ni Yehowa, Hebribii aNyɔŋmɔ lɛ, kɛɛ nɛ, ‘Hã mimaŋ lɛ aya koni amɛyasɔ̃mɔ mi.

² Shi kɛji okpɛ̃lɛɛɛ ni amɛya, ni okã he ootsi amɛnaa lolo lɛ,

³ no lɛ Yehowa baatswia nyɛkooloi ni yɔɔ ŋa nɔ lɛ nii, ni ebaahã otswashiogbo ni naa wa abote nyɛkpɔŋɔi kɛ tejii kɛ yoomai kɛ tsinai kɛ toi lɛ ateŋ.

⁴ Shi Yehowa aaahã srɔto aba Israelbii akooloi kɛ Ijiptbii akooloi ateŋ, ni Israelbii akooloi lɛ ateŋ eko eko gboŋ.’

⁵ Ni Yehowa to be ekɛɛ, ‘Wɔ lɛ Yehowa baafee nii nɛɛ yɛ shikpɔŋ lɛ nɔ.’ ”

⁶ Ni enɔ jetsɛremɔ lɛ, Yehowa fee nɔ ni ekɛɛ lɛ; Ijiptbii akooloi lɛ fɛɛ gboi, shi Israelbii akooloi lɛ ateŋ ekome folo nɛkɛ gbooo.

⁷ Ni Farao tsu ayakwɛ, ni ayana akɛ Israelbii akooloi lɛ ateŋ ekome folo nɛkɛ gboko. Shi enɛ fɛɛ sɛɛ lɛ, Farao kpliŋ etsui, ni ehãaa maŋ lɛ aya.

Asanei ba

⁸ Agbɛnɛ Yehowa kɛɛ Mose kɛ Aaron akɛ, “Nyɛkpitía flɔɔnɔɔ mli lamlu nyɛkɔkɔi obɔ̃bɔ̃, ni Mose kɛshwã ŋwɛi yɛ Farao hiɛ.

⁹ Lamlu nɛɛ aaatsɔ̃ mlu, ni eeegbɛ eshwã Ijipt shikpɔŋ lɛ nɔ fɛɛ; eeetsɔ̃ asane ni fuɔ, ni efɛlɛɔ yɛ gbɔmɛi kɛ kooloi ahe yɛ Ijipt shikpɔŋ lɛ nɔ fɛɛ.”

¹⁰ Mose kɛ Aaron kpiti flɔnɔɔ mli lamlu lɛ, ni amɛbadamɔ Farao hiɛ, ni Mose kɛ lamlu lɛ shwã ŋwɛi. Kɛkɛ ni lamlu lɛ tsɔ̃ asane ni fuɔ ni fɛlɛɔ yɛ gbɔmɛi kɛ kooloi ahe.

¹¹ Ijipt ŋkunyaayelɔi lɛ nyɛɛɛ Mose hiɛ tete amɛshɛ yɛ asanei lɛ ahewɔ, ejaakɛ asane lɛ etsɛ̃rɛ ŋkunyaayelɔi lɛ kɛ Ijiptbii krokomɛi lɛ fɛɛ.

¹² Shi Yehowa hã Farao kpliŋ etsui, ni ebooo Mose kɛ Aaron toi tamɔ bɔ ni Yehowa ewie eto lɛ.

Nyɔŋmɔŋtɛi nɛ

¹³ Yehowa kɛɛ Mose akɛ, “Tee shi wɔ leebi maŋkpa ni oyadamɔ Farao hiɛ, ni okɛɛ lɛ akɛ, bɔ ni Yehowa, Hebribii aNyɔŋmɔ lɛ, kɛɛ nɛ, ‘Hã mimaŋ lɛ aya koni amɛyasɔ̃mɔ mi,

¹⁴ ejaakɛ agbɛnɛ lɛ mahã haomɔi srɔtoi fɛɛ aba bo diɛŋtsɛ kɛ otsuji lɛ kɛ omaŋbii lɛ anɔ koni okɛna ole akɛ mɔ ko mɔ ko bɛ ni tamɔ mi yɛ je lɛ mli fɛɛ.

¹⁵ Kulɛ bɛnɛ mijie mihewalɛ kpo mitsɔ̃ɔ, ni mihã gbele hela etswa bo kɛ omaŋbii, ni nyɛhiɛ ekpãtã momo yɛ shikpɔŋ lɛ nɔ.

¹⁶ Shi enɛ hewɔ mihã oyɔɔ wala mli lolo koni majie mihewalɛ kpo matsɔ̃ɔ bo koni akɛtsi mitã yɛ jeŋ fɛɛ.

¹⁷ Okã he oowo ohe nɔ yɛ mimaŋ lɛ nɔ, ni ohãaa amɛya.

¹⁸ Naa, wɔ aaafee benɛ mli lɛ mahã nyɔŋmɔŋtɛi ni naa wa naakpa diɛŋtsɛ anɛ bɔ ni anako ehenɔ dã yɛ Ijipt kɛjɛ ni ato maŋ lɛ nɛɛ kɛbashi ŋmɛnɛ.

¹⁹ No hewɔ lɛ, agbɛnɛ tsu ni ayaŋɔ okooloi kɛ nibii fɛɛ ni oyɔɔ yɛ ŋa nɔ kɛba shĩa okɛbato, ejaakɛ gbɔmɔ fɛɛ gbɔmɔ kɛ kooloo fɛɛ kooloo ni aaana yɛ ŋa lɛ nɔ ni akɛ lɛ baaa shĩa lɛ, nyɔŋmɔŋtɛi lɛ aayi lɛ ni eeegbo.’ ”

²⁰ Farao tsuji lɛ ateŋ mɔ ni yashe Yehowa wiemɔ lɛ gbeyei lɛ, ehã etsuji kɛ ekooloi fɛɛ jo foi kɛba shĩa;

²¹ shi mɔ ni eyabuuu Yehowa wiemɔ lɛ, eshĩ etsuji kɛ ekooloi yɛ ŋa lɛ nɔ.

²² Kɛkɛ ni Yehowa kɛɛ Mose akɛ, “Kpã onine mli kɛya ŋwɛi koni nyɔŋmɔŋtɛi anɛ ashwie gbɔmɛi kɛ kooloi kɛ ŋa nɔ bai fɛɛ nɔ yɛ Ijipt shikpɔŋ lɛ nɔ fɛɛ.”

²³ Mose wo etso lɛ nɔ kɛtee ŋwɛi, kɛkɛ ni Yehowa hã ŋwɛi shimɔ, ni nyɔŋmɔŋtɛi nɛ, ni srawa gbala. Yehowa hã nyɔŋmɔŋtɛi nɛɛ nɛ Ijipt shikpɔŋ lɛ nɔ.

²⁴ Be ni enɛɔ lɛ belɛ srawa lɛ hu miigbala plamplam kɛnyiɛ mli. Nyɔŋmɔŋtɛi lɛ nɛ waa naakpa bɔ ni anako ehenɔ dã yɛ Ijipt kɛjɛ be mli ni etsɔ̃ maŋ nɛɛ.

²⁵ Ni nyɔŋmɔŋtɛi lɛ yi nibii fɛɛ ni yɔɔ ŋa nɔ yɛ Ijipt shikpɔŋ lɛ nɔ fɛɛ, kɛjɛ gbɔmɔ nɔ kɛyashi kooloo nɔ; ni nyɔŋmɔŋtɛi lɛ kpãtã ŋa nɔ tsei kɛ bai fɛɛ ahiɛ.

²⁶ Shi Goshen shikpɔŋ lɛ nɔ, he ni Israelbii lɛ yɔɔ lɛ, kɛkɛ ji he ni nyɔŋmɔŋtɛi nɛɛ eko enɛɛɛ yɛ.

²⁷ Kɛkɛ ni Farao tsu ayatsɛ Mose kɛ Aaron kɛba, ni ekɛɛ amɛ akɛ, “Enɛ lɛ mifee esha. Yehowa lɛ jalɔ ji lɛ, shi mi kɛ mimaŋ lɛ mɛi fɔ̃ji ji wɔ.

²⁸ Nyɛkpaa Yehowa fai koni ŋwɛi shiimɔ kɛ nyɔŋmɔŋtɛi lɛ akpa; shi efa; ni mahã nyɛya, ni mitsiŋ nyɛnaa dɔŋŋ.”

²⁹ Mose kɛɛ Farao akɛ, “Amrɔ pɛ ni maje kpo yɛ maŋ lɛ mli lɛ, mahole miniji anɔ matsɛ Yehowa, ni ŋwɛi shiimɔ lɛ kɛ nyɔŋmɔŋtɛi lɛ asɛɛ aaafo, ni eko eko baŋ dɔŋŋ, koni ona ole akɛ je lɛ Yehowa nɔ ni.

³⁰ Shi mile akɛ bo kɛ otsuji lɛ nyɛnako nyɛshe Yehowa ni ji Nyɔŋmɔ lɛ gbeyei.”

³¹ Akoko kɛ tso ni ajieɔ kpãa ni akɛloɔ ojarawa mama yɛ mli lɛ fɛɛ hiɛ kpãtã, ejaakɛ akoko lɛ ewo, ni tso lɛ hu ehere momo.

³² Shi ŋmaa kɛ abele hiɛ kpãtãaa ejaakɛ amɛ lɛ amɛkpeɔ sɛɛ kɛ woo.

³³ Kɛkɛ ni Mose shi Farao, ni eje maŋ lɛ mli hu, ni ehole eniji anɔ etsɛ Yehowa. Kɛkɛ ni ŋwɛi shiimɔ lɛ kɛ nyɔŋmɔŋtɛi lɛ asɛɛ fo, ni nu lɛ kpa shikpɔŋ lɛ nɔ nɛmɔ.

³⁴ Shi be ni Farao na akɛ nunɛmɔ lɛ kɛ nyɔŋmɔŋtɛi lɛ kɛ ŋwɛi shiimɔ lɛ sɛɛ efo lɛ, esaa efee esha ekoŋŋ, ni lɛ kɛ etsuji lɛ fɛɛ saa kpliŋ amɛtsui.

³⁵ Farao bakpliŋ etsui, ni ehãaa Israelbii lɛ aya tamɔ bɔ ni Yehowa ewie eto yɛ Mose naa lɛ.