2 Mose 7 - ŊMALƐ KRƆŊKRƆŊ LƐ

¹ Kɛkɛ ni Yehowa kɛɛ Mose akɛ, “Naa, miihã otsɔ̃ tamɔ Nyɔŋmɔ ohã Farao, ni onyɛmi Aaron aaatsɔ̃ ogbalɔ.

² Nɔ fɛɛ nɔ ni mifã bo ni owie lɛ, kɛɛmɔ onyɛmi Aaron, ni lɛ ekɛ Farao awie koni eŋmɛɛ Israelbii lɛ ahe ni amɛshi eshikpɔŋ lɛ nɔ amɛya.

³ Shi mahã Farao akpliŋ etsui, ni okadii kɛ naakpɛɛ nibii babaoo ni mafee yɛ Ijipt shikpɔŋ lɛ nɔ lɛ fɛɛ sɛɛ lɛ,

⁴ eboŋ nyɛ toi. No baahã mikɛ Ijipt aye kɛ joomɔ, ni magbala etoi, ni majie mimaŋ Israel kɛje Ijipt.

⁵ Kɛ migbala Ijiptbii lɛ atoi, ni mijie Israelbii lɛ kɛje amɛshikpɔŋ lɛ nɔ lɛ, no Ijiptbii kɛaale akɛ mi ji Yehowa.”

⁶ Mose kɛ Aaron fee bɔ ni Yehowa fã amɛ lɛ pɛpɛɛpɛ.

⁷ Be ni amɛkɛ Farao yawie nɛɛ lɛ, Mose eye afii nyɔŋmai kpaanyɔ, ni Aaron hu eye afii nyɔŋmai kpaanyɔ kɛ etɛ̃.

Aaron tso lɛ

⁸ Ni Yehowa kɛɛ Mose kɛ Aaron akɛ,

⁹ “Kɛji Farao kɛɛ nyɛ akɛ, ‘Nyɛfea naakpɛɛ nɔ ko’ lɛ, no lɛ Mose, kɛɛmɔ Aaron akɛ, ‘Kɔ otso lɛ ni okɛfɔ̃ shi yɛ Farao hiɛ; ni tso lɛ aaatsɔ̃ onufu.’ ”

¹⁰ No hewɔ lɛ, Mose kɛ Aaron tee Farao ŋɔɔ, ni amɛfee bɔ ni Yehowa efã amɛ lɛ. Aaron kɛ etso lɛ fɔ shi yɛ Farao kɛ etsuji lɛ ahiɛ, ni tso lɛ tsɔ onufu.

¹¹ Kɛkɛ ni Farao hu hã ayatsɛ nilelɔi kɛ ŋkunyaayelɔi kɛba. Gbɔmɛi nɛɛ ji Ijipt ashwãifeelɔi lɛ. Amɛ hu amɛkɛ amɛkunyaayeli ŋai lɛ fee nakai nɔŋŋ.

¹² Amɛteŋ mɔ fɛɛ mɔ kɛ etso fɔ̃ shikpɔŋ, ni tsei lɛ tsɔmɔ onufui; shi Aaron tso lɛ mimii amɛtsei lɛ.

¹³ Shi Farao kpliŋ etsui, ni ebooo Mose kɛ Aaron toi taakɛ bɔ ni Yehowa ewie eto lɛ.

Amanehului ba Ijipt nɔ Nu tsɔ la

¹⁴ Agbɛnɛ Yehowa kɛɛ Mose akɛ, “Farao tsui wa, ekpɛlɛɛɛ ni maŋ lɛ yaa.

¹⁵ Yaa Farao ŋɔɔ leebi. Ebaaje kpo eya faa lɛ naa. Kɔ tso lɛ ni tsɔ onufu lɛ ohiɛ odɛ̃, ni oyadamɔ jɛi omɛ lɛ.

¹⁶ Okɛɛ lɛ akɛ, ‘Yehowa, ni ji Hebribii lɛ aNyɔŋmɔ lɛ, tsu mi oŋɔɔ koni mibakɛɛ bo akɛ, hã mimaŋ lɛ aya ni amɛyaja mi yɛ ŋa lɛ nɔ; ni naa, okpɛ̃lɛko kɛbashi benɛ.

¹⁷ Agbɛnɛ bɔ ni Yehowa kɛɛ nɛ, enɛ okɛaale akɛ mi ji Yehowa lɛ. Naa, mikɛ tso ni mihiɛ yɛ midɛ̃ nɛɛ baatswa Nilo Faa lɛ mli, ni nu lɛ baatsɔ̃ lá.

¹⁸ Nilo Faa lɛ mli loi baagboi, ni faa lɛ baasha bɔ ni Ijiptbii aaanyaŋe Nilo numɔ!’ ”

¹⁹ Ni Yehowa fã Mose akɛ, “Kɛɛmɔ Aaron akɛ, ‘Kɔ otso lɛ ni okpã onine mli yɛ Ijipt nu fɛɛ nu, ni ji fai kɛ nujɔi ni aje gbɛ agbala kɛ bukoi kɛ nu ni bua shi fɛɛ, nɔ, ni amɛaatsɔmɔ lá. Nu ni yɔɔ tso kɛ tɛ gogai amli fɛɛ aaatsɔ̃ lá.’ ”

²⁰ Mose kɛ Aaron fee bɔ ni Yehowa fã amɛ lɛ. Aaron wo etso lɛ nɔ, ni ekɛtswa Nilo Faa lɛ mli nu lɛ yɛ Farao kɛ etsuji lɛ ahiɛ, kɛkɛ ni faa lɛ mli nu lɛ fɛɛ tsɔ̃ lá.

²¹ Loi ni yɔɔ faa lɛ mli lɛ gboi, ni faa lɛ sha bɔ ni Ijiptbii lɛ nyɛɛɛ Nilo mli nu amɛnu. Lá sɔŋŋ ji Ijipt shikpɔŋ lɛ nɔ he fɛɛ he.

²² Shi Ijipt ŋkunyaayelɔi lɛ hu kɛ amɛkunyaayelɔi fee nakai nɔŋŋ. Enɛ hã Farao tee nɔ ekpliŋ etsui, ni ebooo Mose kɛ Aaron toi tamɔ bɔ ni Yehowa ewie eto lɛ.

²³ Ni Farao ku esɛɛ etee ewe lɛ, ni nɔ ni afee lɛ gbaaa enaa kwraa.

²⁴ Ni Ijiptbii fɛɛ jejee nubui yɛ faa lɛ hewɔ koni amɛna nu amɛnu ejaakɛ amɛnyɛɛɛ Nilo mli nu amɛnu.

²⁵ Ni be ni Yehowa ehã Nilo faa lɛ etsɔ̃ lá sɛɛ lɛ, gbii kpawo baho ni faa lɛ yɛ nakai nɔŋŋ.