2 Mose 6 - ŊMALƐ KRƆŊKRƆŊ LƐ

¹ Kɛkɛ ni Yehowa kɛɛ Mose akɛ, “Kpaako obaana nɔ ni mibafee Farao. Ja minineshiwalɛ naa dani eeehã Israelbii lɛ aya. Anɔkwa, minineshiwalɛ naa hu dani eeeshwie amɛ kɛje eshikpɔŋ lɛ nɔ.”

Nyɔŋmɔ tsɛ Mose

² Ni Nyɔŋmɔ kɛ Mose wie ni ekɛɛ lɛ akɛ, “Mi ji Yehowa,

³ mi mijie mihe kpo mitsɔ̃ɔ Abraham kɛ Isak kɛ Yakob akɛ Nyɔŋmɔ Ofe lɛ. Shi migbɛi Yehowa lɛ, mihãaa akɛ no ale mi.

⁴ Ni misaa mi kɛ amɛ kpãŋ akɛ mikɛ Kanaan shikpɔŋ lɛ baahã amɛ, shikpɔŋ ko ni amɛyato gbɔ yɛ nɔ lɛ.

⁵ Agbɛnɛ hu, minu Israelbii ni Ijiptbii lɛ yeɔ amɛ nyɔŋ lɛ akɔmɔyeli blɔmɔ lɛ he, ni mikai mi kɛ amɛteŋ kpãŋmɔ lɛ.

⁶ No hewɔ lɛ, kɛɛmɔ Israelbii lɛ akɛ mikɛɛ, ‘Mi ji Yehowa, ni majie nyɛ, ni mawo Ijiptbii lɛ ajatsu lɛ yɛ nyɛkuɛ nɔ, ni mahere nyɛ kɛje nyɔŋ ni amɛyeɔ nyɛ lɛ mli. Mikɛ mihewalɛ aaakpɔ̃ nyɛ, ni no nɔŋŋ mikɛaagbala Ijiptbii lɛ atoi.

⁷ Maŋɔ nyɛ mafee mi diɛŋtsɛ mimaŋ, ni matsɔ̃ nyɛNyɔŋmɔ, ni nyɛaale akɛ mi ji Yehowa, nyɛNyɔŋmɔ lɛ, ni jie nyɛ yɛ Ijipt nyɔŋyeli lɛ mli lɛ.

⁸ Mikɛ nyɛ aaatee shikpɔŋ lɛ ni mikã he kitã akɛ mikɛbaahã Abraham kɛ Isak kɛ Yakob lɛ nɔ. Mi ji Yehowa.’ ”

⁹ Mose bɔ Israelbii lɛ amaniɛ, shi amɛbooo Mose toi yɛ amɛwerɛ ni eho amɛhe kɛ amɛnɔ nyɔŋyeli ni naa wa lɛ hewɔ.

¹⁰ Kɛkɛ ni Yehowa kɛ Mose wie, ni ekɛɛ lɛ akɛ,

¹¹ “Yaa ni okɛ Ijipt maŋtsɛ lɛ ayawie, ni okɛɛ lɛ akɛ ehã Israelbii lɛ aje eshikpɔŋ lɛ nɔ ni amɛya.”

¹² Shi Mose kɛɛ Yehowa akɛ, “MiNuŋtsɔ, Israelbii lɛ tete boko mi toi, te aaafee tɛŋŋ ni Farao aaabo mi toi hu; ni minaa hu tseee nɛɛ?”

¹³ Kɛkɛ ni Yehowa kɛ Mose kɛ Aaron wie, ni efã amɛ akɛ amɛya Israelbii lɛ kɛ Ijipt maŋtsɛ lɛ ŋɔɔ, koni amɛyajie Israelbii lɛ yɛ Ijipt shikpɔŋ lɛ nɔ.

Mose kɛ Aaron wekukpãa

¹⁴ Yakob, ni batsɔ̃ Israel lɛ, kromɔbi Ruben bihii nɛ: Hanok kɛ Palu kɛ Hezron kɛ Karmi. Mɛnɛɛmɛi ji Ruben wekui lɛ ayitsei lɛ.

¹⁵ Simeon bihii nɛ: Yemuel kɛ Yamin kɛ Ohad kɛ Yakin kɛ Zohar kɛ Shaul, Kanaanyoo lɛ bi lɛ. Mɛnɛɛmɛi ji Simeon wekui lɛ ayitsei.

¹⁶ Levi bihii nɛ: Gershon kɛ Kohat kɛ Merari yɛ amɛfɔmɔ naa. Levi ye afii oha kɛ nyɔŋmai etɛ̃ kɛ kpawo.

¹⁷ Gershon bihii nɛ: Libni kɛ Shimei. Amɛ hu amɛna wekui.

¹⁸ Kohat bihii nɛ: Amram kɛ Izehar kɛ Hebron kɛ Uziel. Kohat ye afii oha kɛ nyɔŋmai etɛ̃ kɛ etɛ̃.

¹⁹ Merari bihii nɛ: Maheli kɛ Mushi. Mɛnɛɛmɛi ji Levi wekui lɛ ayitsei yɛ amɛfɔmɔ naa.

²⁰ Amram ŋɔ enyɛkwɛ̃ Yokebed, ni ekɛ lɛ fɔ Aaron kɛ Mose. Amram ye afii oha kɛ nyɔŋmai etɛ̃ kɛ kpawo.

²¹ Izhar bihii nɛ: Kora kɛ Nefeg kɛ Zikri.

²² Uziel bihii nɛ: Mishael kɛ Elzafan kɛ Sitri.

²³ Aaron ŋɔ Aminadab biyoo Elisheba, ni ji Nahashon nyɛmiyoo lɛ. Ekɛ lɛ fɔ Nadab kɛ Abihu kɛ Eleazar kɛ Itamar.

²⁴ Kora bihii nɛ: Asir kɛ Elkana kɛ Abiasaf. Mɛnɛɛmɛi ji Kora wekui lɛ ayitsei lɛ.

²⁵ Aaron bi Eleazar yaŋɔ Putiel biyoo ni ekɛ lɛ hi shi, ni ekɛ lɛ fɔ Finehas. Mɛnɛɛmɛi ji Levibii awei kɛ shĩai lɛ ayitsei lɛ.

²⁶ Aaron kɛ Mose nɛɛ ni Yehowa kɛɛ amɛ akɛ, “Nyɛyajiea Israelbii lɛ kɛje Ijipt shikpɔŋ lɛ nɔ” lɛ,

²⁷ amɛ amɛyabi Ijipt maŋtsɛ lɛ koni eŋmɛɛ Israelbii lɛ ahe ni amɛshi Ijipt shikpɔŋ lɛ nɔ lɛ.

Yehowa fã Mose kɛ Aaron

²⁸ Gbi nɔ ni Yehowa kɛ Mose wie yɛ Ijipt shikpɔŋ lɛ nɔ lɛ,

²⁹ ekɛɛ Mose akɛ, “Mi ji Yehowa. Kɛɛmɔ Ijipt maŋtsɛ lɛ nɔ fɛɛ nɔ ni mikɛ bo wieɔ lɛ.”

³⁰ Shi Mose kɛɛ Yehowa akɛ, “Naa, minaa tseee. Te aaafee tɛŋŋ ni Farao aaabo mi toi hu.”