2 Mose 5 - ŊMALƐ KRƆŊKRƆŊ LƐ

Mose kɛ Aaron yɛ Ijipt Maŋtsɛ hiɛ

¹ Enɛ sɛɛ lɛ Mose kɛ Aaron tee Farao ŋɔɔ amɛyakɛɛ lɛ akɛ, “Bɔ ni Yehowa, Israel Nyɔŋmɔ lɛ, kɛɛ nɛ, ‘Hã mimaŋ lɛ aya ni amɛyaye gbi jurɔ amɛhã mi yɛ ŋa lɛ nɔ.’ ”

² Farao bi amɛ akɛ, “Namɔ ji nakai Yehowa lɛ hewɔ ni esa akɛ mabo lɛ toi, ni mahã Israel aya? Mileee Yehowa ko, ni Israel hu mihãaa amɛya.”

³ Mose kɛ Aaron to he akɛ, “Hebribii aNyɔŋmɔ lɛ ejie ehe kpo etsɔ̃ɔ wɔ. No hewɔ lɛ, wɔmiikpa bo fai koni ohã wɔya gbii etɛ̃ gbɛ yɛ ŋa lɛ nɔ, ni wɔyashã afɔle wɔhã Yehowa, wɔNyɔŋmɔ lɛ, koni ekabatua wɔ kɛ gbele hela loo ta.”

⁴ Ijipt maŋtsɛ lɛ kɛɛ Mose kɛ Aaron akɛ, “Mɛɛ hewɔ ni bo Mose, kɛ Aaron, nyɛhãaa maŋbii lɛ ajwɛŋ amɛnitsumɔi lɛ anɔ lɛ? Nyɛyaa nyɛyatsua nyɛnii!

⁵ Agbɛnɛ moŋ ni maŋ lɛ yi efa momo yɛ shikpɔŋ lɛ nɔ lɛ, ni nyɛhãa amɛjɔɔ amɛhe nɛɛ!”

⁶ Nakai gbi lɛ nɔ nɔŋŋ lɛ Farao wo Israelbii lɛ akpalalɔi lɛ kɛ amɛnɔkwɛlɔi lɛ kitã akɛ,

⁷ “Nyɛkahãa Israelbii lɛ jwɛi tamɔ tsutsu lɛ ni amɛkɛfo ntayaa lɛ dɔŋŋ. Amɛya amɛ diɛŋtsɛ amɛyatao jwɛi amɛhã amɛhe,

⁸ shi ntayaa abɔ ni amɛfoɔ kɛbashi amrɔ nɛɛ lɛ, nyɛhãa amɛfoa nakai nɔŋŋ, nyɛkatsea nɔ. Amɛmiifee anihao hewɔ ni amɛbolɔɔ akɛ, ‘Hã wɔya ni wɔyashã afɔle wɔhã wɔNyɔŋmɔ lɛ!’

⁹ Ahã nitsumɔ lɛ anyɛ amɛ jogbaŋŋ koni etɔ amɛ ni amɛkana hiɛ amɛbo lakamɔ wiemɔi atoi.”

¹⁰ Israelbii lɛ akpalalɔi lɛ kɛ amɛnɔkwɛlɔi lɛ yiŋ amɛtee, ni amɛyakɛɛ Israelbii lɛ akɛ, “Farao kɛɛ kɛjɛ kɛyaa nɛɛ lɛ, ehãaa nyɛ jwɛi dɔŋŋ;

¹¹ nyɛ diɛŋtsɛ nyɛyaa nyɛyataoa jwɛi yɛ he fɛɛ he ni nyɛaana eko yɛ; shi fɛɛ sɛɛ lɛ atseŋ nyɛnitsumɔ lɛ nɔ dɛ̃rɛ̃.”

¹² No hewɔ lɛ, Israelbii nitsulɔi lɛ gbɛ shwã Ijipt shikpɔŋ lɛ nɔ fɛɛ, ni amɛyabuabua gbetselii anaa amɛkɛfee jwɛi.

¹³ Kpalalɔi lɛ tsirɛ Israelbii lɛ ayisɛɛ akɛ amɛgbe amɛdaa gbi nitsumɔ lɛ naa tamɔ be mli ni ahãa amɛ jwɛi lɛ nɔŋŋ.

¹⁴ Ni Farao kpalalɔi lɛ yi Israelbii ni afee amɛ nɔkwɛlɔi akɛto nitsulɔi lɛ anɔ lɛ, ni amɛbi amɛ akɛ, “Mɛɛ hewɔ ni nyɛgbeee daa gbi ntayai ni ato ahã nyɛ ni nyɛfo lɛ anaa tamɔ sa lɛ?”

¹⁵ Kɛkɛ ni Israelbii lɛ anɔkwɛlɔi lɛ tee Farao ŋɔɔ amɛyabolɔ amɛkɛɛ, “Mɛɛ sane okɛyeɔ wɔ, otsuji nɛɛ?

¹⁶ Ahãaa wɔ jwɛi, shi akɛɛ doo wɔfo ntayaa kɛ̃. Aayi wɔ yɛ no hewɔ, tsɛbelɛ tɔ̃mɔ lɛ jɛ omaŋbii lɛ.”

¹⁷ Farao here amɛnɔ ekɛɛ, “Hejɔ̃lɔi ni nyɛ ji hewɔ ni nyɛkɛɛ, ‘Hã wɔya ni wɔyashã afɔle wɔhã Yehowa lɛ.’

¹⁸ Nyɛyaa nyɛyatsua nii lɛ moŋ. Jwɛi ni ji jwɛi lɛ ahaŋ nyɛ eko, shi ntayai lɛ ayikulɛ lɛ nyɛbaafo nakai nɔŋŋ.”

¹⁹ Israelbii lɛ anɔkwɛlɔi lɛ na akɛ sane fɔŋ eye amɛ be ni akɛɛ amɛ akɛ, “Nyɛkatsea nyɛdaa gbi ntayaa ni sa ni nyɛfo lɛ nɔ kɔkɔɔkɔ” lɛ.

²⁰ Be ni amɛshi Farao ŋɔɔ amɛyaa lɛ, amɛyanina Mose kɛ Aaron yɛ gbɛ lɛ nɔ, ni amɛmiimɛ amɛ.

²¹ Amɛkɛɛ Mose kɛ Aaron akɛ, “Yehowa akojo nyɛ ejaakɛ nyɛhã wɔsane eje Farao kɛ etsuji agugɔŋ fũ, ni nyɛwo amɛdɛ̃ŋ klante ni amɛkɛgbe wɔ.”

Mose ye ŋkɔmɔ etsɔ̃ɔ Yehowa

²² Kɛkɛ ni Mose saa eku esɛɛ etee Yehowa hiɛ ni ekɛɛ, “Ao! Yehowa, mɛɛba moŋ ofee wɔ, omaŋ lɛ, efɔŋ nɛkɛ? Mɛɛba kwraa otsu mi biɛ mɔ?

²³ Ejaakɛ kɛjɛ beyinɔ ni miba mikɛ Farao bawie yɛ ogbɛi mli nɛɛ lɛ, efɔŋ moŋ sɔŋŋ efeɔ omaŋ lɛ, ni jiemɔ hu ojieko amɛ.”