2 Mose 40 - ŊMALƐ KRƆŊKRƆŊ LƐ

Kpee Buu Krɔŋkrɔŋ lɛ shii kɛ enɔjɔɔmɔ

¹ Yehowa kɛɛ Mose akɛ,

² “Klɛŋklɛŋ nyɔŋ lɛ nɔ klɛŋklɛŋ gbi lɛ nɔ lɛ, shii Kpee Buu Krɔŋkrɔŋ lɛ.

³ Okɛ Kpãŋmɔ Adeka lɛ ama mli, ni okɛ muhɔɔ lɛ atsĩ hiɛ.

⁴ Okɛ okplɔ̃ lɛ aya Buu lɛ mli, ni oto nibii ni sa akɛ amãmɔ nɔ lɛ pɛpɛɛpɛ omamɔ nɔ, ni okɛ kanetso lɛ aya mli, ni okɛ ehe kanei lɛ amãmɔ nɔ.

⁵ Okɛ shika latɛ ni akɛbaashã tsofakɛŋma lɛ ama Kpãŋmɔ Adeka lɛ hiɛ, ni okɛ shinaa lɛ naa mama lɛ aha Kpee Buu Krɔŋkrɔŋ lɛ naa.

⁶ Agbɛnɛ okɛ shãa afɔle latɛ lɛ ama Kpee Buu Krɔŋkrɔŋ lɛ shinaa lɛ hiɛgbɛ.

⁷ Okɛ okpolu lɛ ama Kpee Buu Krɔŋkrɔŋ lɛ kɛ afɔleshãa latɛ lɛ teŋ, ni okɛ nu awo mli.

⁸ No sɛɛ lɛ, owo kpo lɛ oma shi kɛbɔle Kpee Buu Krɔŋkrɔŋ lɛ he fɛɛ tswɛm, ni okɛ kpo lɛ nɔ agbo lɛ naa mama lɛ aha naa.

⁹ “Enɛ sɛɛ lɛ owo mu krɔŋkrɔŋ lɛ okɛfɔ Kpee Buu Krɔŋkrɔŋ lɛ diɛŋtsɛ kɛ emli nibii lɛ fɛɛ koni okɛfee lɛ kɛ ehe nibii lɛ fɛɛ krɔŋkrɔŋ ni efee krɔŋkrɔŋ.

¹⁰ Ofɔ shãa afɔle latɛ lɛ kɛ ehe nibii lɛ fɛɛ mu ni okɛfee latɛ lɛ krɔŋkrɔŋ koni etsɔ̃ afɔleshãa latɛ ni yɔɔ krɔŋkrɔŋ fe fɛɛ.

¹¹ Ofɔ okpolu lɛ kɛ eshishitamɔ nii lɛ hu mu ni okɛfee lɛ krɔŋkrɔŋ.

¹² “Agbɛnɛ okɛ Aaron kɛ ebihii lɛ aba Kpee Buu lɛ shinaa lɛ shi, ni okɛ nu aju amɛhe.

¹³ No sɛɛ lɛ, okɛ hewulamɔ nibii krɔŋkrɔŋi lɛ awula Aaron, ni ofɔ lɛ mu okɛfee lɛ krɔŋkrɔŋ koni eye osɔfo ehã mi.

¹⁴ Okɛ Aaron bihii lɛ hu aba ni okɛ flakai lɛ awo amɛ,

¹⁵ ni ofɔ amɛ hu mu tamɔ ofɔ amɛtsɛ mu lɛ koni amɛsɔ̃mɔ mi akɛ osɔfoi. Amɛmufɔɔ nɛɛ aaahã osɔfoyeli atsɔ̃ amɛ kɛ amɛshwiei abihii anɔ kɛya naanɔ.”

¹⁶ Mose fee bɔ ni Yehowa fã lɛ lɛ pɛpɛɛpɛ.

¹⁷ Be ni Israelbii lɛ shi Ijipt lɛ enɔ afi ni ji enyɔ lɛ klɛŋklɛŋ nyɔɔŋ lɛ nɔ klɛŋklɛŋ gbi lɛ nɔ ashi Kpee Buu Krɔŋkrɔŋ lɛ ama shi.

¹⁸ Mose ji mɔ ni shi Kpee Buu Krɔŋkrɔŋ lɛ ema shi. Ekala nibii ni akulashiŋi lɛ baamamɔ nɔ lɛ, etee mplaŋi lɛ shi emamɔ shi, ni ekɛ mlibɛlɛmɔnii lɛ bɛlɛ teiaŋ, kɛkɛ ni etee ekulashiŋi lɛ shi emamɔ shi.

¹⁹ Elɛɛ buu mama lɛ mli ekɛha Kpee Buu Krɔŋkrɔŋ lɛ nɔ, ni ekɛ nɔhaanɔ lɛ ha nɔ to nɔ, tamɔ bɔ ni Yehowa fã lɛ lɛ.

²⁰ Ni Mose kɛ tɛi ni aŋmala kitãi lɛ yɛ nɔ lɛ wo Kpãŋmɔ Adeka lɛ mli, ni ekɛ tsei bloblobii lɛ hɔlɔ Adeka lɛ he, ni ekɛ naanɔ lɛ bu Kpãŋmɔ Adeka lɛ naa.

²¹ Kɛkɛ ni Mose wo Kpãŋmɔ Adeka lɛ kɛtee Kpee Buu Krɔŋkrɔŋ lɛ mli, ni eshi muhɔɔ lɛ ekɛtsi Adeka lɛ hiɛ tamɔ bɔ ni Yehowa fã lɛ lɛ.

²² Agbɛnɛ Mose wo okplɔ̃ lɛ ekɛyama Kpee Buu Krɔŋkrɔŋ lɛ mli he ni ye kooyigbɛ lɛ, yɛ muhɔɔ lɛ kponɔgbɛ,

²³ kɛkɛ ni eto aboloo lɛ pɛpɛɛpɛ eshwie nɔ yɛ Yehowa hiɛ tamɔ bɔ ni Yehowa fã lɛ lɛ.

²⁴ Ewo kanetso lɛ eyama Kpee Buu Krɔŋkrɔŋ lɛ mli, yɛ okplɔ̃ lɛ ŋlɛnɔ he ni ye wuoyigbɛ lɛ.

²⁵ Kɛkɛ ni ekɛ ehe kanei lɛ mamɔ nɔ yɛ Yehowa hiɛ tamɔ bɔ ni Yehowa fã lɛ lɛ.

²⁶ Ekɛ shika tsofakɛŋmashãa latɛ lɛ ma Kpee Buu lɛ mli yɛ muhɔɔ lɛ kponɔgbɛ,

²⁷ ni eshã tsofakɛŋma yɛ nɔ tamɔ bɔ ni Yehowa fã lɛ lɛ.

²⁸ Kɛkɛ ni Mose kɛ mama lɛ ha Kpee Buu Krɔŋkrɔŋ lɛ shinaa lɛ naa.

²⁹ Ekɛ shãa afɔle latɛ lɛ ma Kpee Buu Krɔŋkrɔŋ lɛ shinaa lɛ naa, ni eshã shãa afɔle kɛ niyenii afɔle yɛ nɔ tamɔ bɔ ni Yehowa fã lɛ lɛ.

³⁰ Ewo okpolu lɛ ema Kpee Buu lɛ kɛ afɔleshãa latɛ lɛ teŋ, ni ekɛ nu wo mli,

³¹ ni no sɛɛ lɛ Mose kɛ Aaron kɛ Aaron bihii lɛ kɛfɔflɔ amɛniji kɛ amɛnaji ahe.

³² Kɛji amɛbaaya Kpee Buu lɛ mli, ni kɛji amɛbaabɛŋkɛ afɔleshãa latɛ lɛ amɛfɔfɔlɔɔ amɛhe tamɔ bɔ ni Yehowa fã Mose lɛ.

³³ Ni Mose tee kpo lɛ shi ema shi kɛbɔle Kpee Buu Krɔŋkrɔŋ lɛ kɛ afɔleshãa latɛ lɛ, ni ekɛ kpo lɛ nɔ agbo lɛ naa mama lɛ ha naa. Kɛkɛ ni Mose gbe nitsumɔ lɛ fɛɛ naa.

Atatu ni shi ema Kpee Buu Krɔŋkrɔŋ lɛ yiteŋ lɛ

³⁴ Kɛkɛ ni atatu baha Kpee Buu lɛ nɔ, ni Yehowa anunyam lɛ yi He Krɔŋkrɔŋ lɛ obɔ̃.

³⁵ No hewɔ lɛ, Mose nyɛɛɛ ebote Kpee Buu lɛ mli, ejaakɛ atatu lɛ eha Buu lɛ nɔ, ni Yehowa anunyam lɛ hu eyi He Krɔŋkrɔŋ lɛ mli obɔ̃.

³⁶ Israelbii lɛ agbɛfãa lɛ mli fɛɛ lɛ, kɛji atatu lɛ wo ehe nɔ yɛ Kpee Buu lɛ nɔ lɛ, amɛfãa kɛyaa amɛhiɛ;

³⁷ shi kɛji atatu lɛ wooo ehe nɔ lɛ, belɛ amɛfãaa kɛyaashi gbi nɔ ni eeewo ehe nɔ.

³⁸ Ejaakɛ amɛgbɛfãa lɛ mli fɛɛ lɛ Yehowa atatu lɛ yɛ Kpee Buu Krɔŋkrɔŋ lɛ nɔ shwane, ni nyɔɔŋ lɛ atatu lɛ kpɛɔ la ni Israelbii lɛ naa gbɛ.