2 Mose 4 - ŊMALƐ KRƆŊKRƆŊ LƐ

Nyɔŋmɔ hã Mose naakpɛɛ hewalɛ

¹ Kɛkɛ ni Mose kɛɛ Yehowa akɛ, “Naa, Israelbii lɛ heŋ mi amɛyeŋ, amɛboŋ mi toi hu, ejaakɛ amɛaakɛɛ akɛ, ‘Yehowa ejieko ehe kpo etsɔ̃ko bo.’ ”

² Ni Yehowa bi Mose akɛ, “Mɛni yɔɔ odɛ̃ŋ lɛ?” Ejie naa akɛ, “Tso.”

³ Yehowa kɛɛ lɛ akɛ, “Shɛ ofɔ̃ shikpɔŋ!” Mose shɛ tso lɛ efɔ̃ shikpɔŋ, kɛkɛ ni tso lɛ tsɔ̃ onufu, ni Mose jo onufu lɛ naa foi kɛtee sɛɛ.

⁴ Shi Yehowa kɛɛ Mose akɛ, “Kpã onine mli ni omɔ elei!” Mose kpã enine mli, ni emɔ onufu lɛ lei lɛ, kɛkɛ ni etsɔ̃ tso ekoŋŋ yɛ edɛŋ.

⁵ Kɛkɛ ni Yehowa kɛɛ Mose akɛ, “Enɛ amɛkɛaahe amɛye akɛ Yehowa, ni ji Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ lɛ, ejie ehe kpo etsɔɔ bo.”

⁶ Asaŋ Yehowa kɛɛ Mose akɛ, “Agbɛnɛ okɛ onine ahɔ omiinaa.” Mose kɛ enine lɛ hɔ emiinaa, ni be ni ejie lɛ, naa nine lɛ ni hela ko tamɔ kpiti eshwie he fuu.

⁷ Kɛkɛ ni Nyɔŋmɔ kɛɛ lɛ akɛ, “Okɛ onine ahɔ omiinaa ekoŋŋ.” Esaa ekɛ enine lɛ hɔ jɛi. Be ni ejie lɛ, naa ehewolo lɛ ni etsɔ̃ tamɔ bɔ ni eyɔɔ sa lɛ.

⁸ Nyɔŋmɔ kɛɛ Mose akɛ, “Kɛji amɛheee bo amɛyeee, ni asaŋ amɛbooo bo toi yɛ klɛŋklɛŋ okadi lɛ naa lɛ, okadi ni ji enyɔ lɛ naa lɛ amɛaabo bo toi.

⁹ Shi kɛji amɛheee bo amɛyeee yɛ okadii enyɔ nɛɛ fɛɛ asɛɛ, ni amɛbooo bo toi hu lɛ, no lɛ yɛɛ Nilo Faa lɛ mli nu lɛ eko ni ofɔse oshwie shikpɔŋ gbiŋ nɔ, ni nu lɛ ni oyɛ yɛ faa lɛ mli lɛ aaatsɔ̃ lá yɛ shikpɔŋ gbiŋ lɛ nɔ.”

¹⁰ Mose kɛɛ Yehowa akɛ, “Ofainɛ miNuŋtsɔ! Minaa tseee kɛjɛ jeeŋmɔ beebe, ni kɛjɛ beyinɔ hu ni okɛ mi, otsulɔ, wie nɛɛ fɛɛ, minaa tseko, ni mililɛi tsii.”

¹¹ Yehowa bi lɛ akɛ, “Namɔ bɔ naabu hã gbɔmɔ? Namɔ bɔ mumui loo toimulɔ, loo mɔ ni naa nii, loo shwilafo? Ani jeee mi, Yehowa nɛɛ nɔŋŋ?

¹² No hewɔ lɛ, yaa otsumɔ lɛ, shi mibawa bo kɛ wiemɔ, ni mibatsɔ̃ɔ bo nɔ ni owie.”

¹³ Shi Mose here nɔ ekɛɛ, “Ofainɛ, miNuŋtsɔ, tsu mɔ kroko.”

¹⁴ Kɛkɛ ni Yehowa mli wo Mose la, ni ekɛɛ lɛ akɛ, “Ani onyɛmi Aaron, Levinyo lɛ, bɛ? Mile akɛ enaa tse. Ni ŋmɛlɛtswaa nɛɛ po enyiɛ gbɛ eeba ni ekɛ bo abakpe, ni kɛ ena bo lɛ eeenya ohe kɛ etsuiŋ fɛɛ.

¹⁵ Bɔɔ lɛ amaniɛ, ni otsɔ̃ɔ lɛ nɔ ni ekɛɛ. Mibawa bo kɛ lɛ fɛɛ yɛ wiemɔ mli, ni matsɔ̃ɔ nyɛ nɔ ni nyɛfee.

¹⁶ Aaron aaatsɔ̃ onaawielɔ yɛ okɛ maŋ lɛ teŋ, ni eeewie yɛ onajiaŋ, ni bo hu oootsɔ̃ tamɔ Nyɔŋmɔ ohã lɛ.

¹⁷ Okɔ tso nɛɛ ohiɛ odɛ̃, no okɛbaafee naakpɛɛ nii lɛ.”

Mose ku esɛɛ etee Ijipt

¹⁸ Mose ku esɛɛ etee eshaanuu Yetro ŋɔɔ, ni eyabi lɛ gbɛ ekɛɛ, “Miikpa bo fai, hã maku misɛɛ maya Ijipt mayakwɛ akɛ minyɛmimɛi ni yɔɔ jɛi lɛ yɛ wala mli lolo lo.” Yetro to he akɛ, “Yoo, yaa ni oba, gbɛ aŋmɛ ahã bo.”

¹⁹ Mose yɛ Midian lolo ni Yehowa kɛɛ lɛ akɛ, “Kuu osɛɛ oya Ijipt, ejaakɛ mɛi ni tao bo agbe lɛ egboi.”

²⁰ Kɛkɛ ni Mose ŋɔ eŋa kɛ ebihii lɛ etara teji nɔ, ni eyiŋ kɛmiiku esɛɛ kɛya Ijipt shikpɔŋ lɛ nɔ, ni Nyɔŋmɔ tso lɛ hiɛ edɛ̃.

²¹ Yehowa kɛɛ Mose ekoŋŋ akɛ, “Kɛji oyashɛ Ijipt lɛ kwɛmɔ ni naakpɛɛ nibii fɛɛ ni mikɛ amɛnɔ hewalɛ ewo odɛ̃ŋ lɛ, ofee yɛ Farao hiɛ; shi mi lɛ mahã Farao akpliŋ etsui, ni ehãŋ maŋ lɛ aya.

²² Okɛɛ Farao akɛ mi Yehowa mikɛɛ, ‘Mikromɔ binuu ji Israel,

²³ ni miikɛɛ bo akɛ, hã mibinuu lɛ aya, no lɛ naa, magbe okromɔ binuu lɛ.’ ”

²⁴ Amɛyashɛ shitoohe ko yɛ gbɛteŋ, ni Yehowa bahɛŋ Mose, ni eetao lɛ egbe.

²⁵ Kɛkɛ ni Zipora kɔ tɛ kakla ni naa ba, ni ekɛfo ebinuu lɛ ketia; ekɛ loo ni efo lɛ sa Mose naji ahe, ni ekɛɛ, “Lá ayɛmforowu ji bo”.

²⁶ Ketiafoo lɛ hewɔ ni Zipora kɛɛ Mose akɛ, “Eji anɔkwale akɛ nuu ni feɔ hii anii ji bo” lɛ.

²⁷ Be nɛɛ mli lɛ Yehowa ekɛɛ Aaron akɛ, “Yaa ni okɛ Mose ayakpe yɛ ŋa lɛ nɔ.” Aaron tee, ni ekɛ Mose yakpe yɛ Sinai, Nyɔŋmɔ Gɔŋ lɛ he, ni eshwɔ enaa.

²⁸ Kɛkɛ ni Mose jaje wiemɔi fɛɛ ni Yehowa kɛtsu lɛ lɛ, kɛ okadii fɛɛ hu ni efã lɛ akɛ efee lɛ etsɔ̃ɔ Aaron.

²⁹ Ni Mose kɛ Aaron tee Ijipt, ni amɛyabua Israelbii lɛ anukpai lɛ fɛɛ anaa.

³⁰ Aaron jaje wiemɔi lɛ fɛɛ ni Yehowa kɛ Mose ewie lɛ, ni Mose fee okadii lɛ hu etsɔ̃ɔ maŋbii lɛ.

³¹ Maŋ lɛ he lɛ ye. Ni be ni amɛnu akɛ Yehowa ekwɛ ni ena Israelbii lɛ amanehulu lɛ, amɛmamɔ amɛyitsei ashi ni amɛja.