2 Mose 39 - ŊMALƐ KRƆŊKRƆŊ LƐ

Osɔfoi ahewulamɔ nibii lɛ feemɔ

¹ Amɛkɛ kuŋtu bluu kɛ kuŋtu afaseo kɛ kuŋtu tsuru fɔɔ fee hewulamɔ nibii ni yɔɔ fɛo naakpa koni akɛsɔ̃mɔ yɛ He Krɔŋkrɔŋ lɛ. Amɛfee osɔfonukpa hewulamɔ nibii amɛhã Aaron tamɔ bɔ ni Yehowa fã Mose lɛ.

² Amɛkɛ kuŋtu wuɔfɔ kɛ kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kpakpa fee efod lɛ.

³ Ni amɛtswia shika fɛtɛfɛtɛ, ni amɛfolɔ lɛ kpãikpãi, ni akɛfee ŋaabii awo kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kpakpa lɛ mli.

⁴ Amɛfee mama hwĩahwĩabii ni baakã kɔŋ amɛkɛtsa efod lɛ koji enyɔ lɛ koni akɛŋmɔ efod lɛ.

⁵ Amɛkɛ ŋaa kome too lɛ nɔŋŋ kɛ nibii kome too lɛ nɔŋŋ eko fee efod lɛ mlifiinii lɛ; nibii nɛɛ ji kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kpakpa ni alo nii awo mli, tamɔ bɔ ni Yehowa fã Mose lɛ.

⁶ Ni amɛfolɔ oniketɛi, ni amɛkɛhɔlɔ shika gai amli ni amɛkpɛ Israel bihii lɛ agbɛii lɛ amɛwo tɛi lɛ anɔ tamɔ bɔ ni ayeɔ sama awoɔ wolonaasɔomɔ nɔ nɔ lɛ.

⁷ Ni amɛkɛ tɛi lɛ mamɔ efod lɛ he mama hwĩahwĩabii ni kãa kɔ̃ŋ nɔ lɛ anɔ koni akɛkai Yakob bihii lɛ tamɔ bɔ ni Yehowa fã Mose lɛ.

Tsitsinɔhaa nii lɛ feemɔ

⁸ Bezaleel kɛ ŋaa ni mli wa naakpa nakai nɔŋŋ fee tsitsinɔhaanii lɛ tamɔ bɔ ni afee efod lɛ nɔŋŋ. Ekɛ kuŋtu wuɔfɔ kɛ kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kpakpa fee.

⁹ Efee tsitsinɔhaanii lɛ koji ejwɛ, ni adɔ mli enyɔ afɔ̃ nɔ, ni ekɛlɛ kɛ elɛɛmɔ ye egbɔ: ekɛlɛ ji ninetalɔ kome, ni elɛɛmɔ hu ninetalɔ kome.

¹⁰ Kɛkɛ ni amɛto tɛi klɛmpɛi ejwɛ amɛmamɔ nɔ. Klɛŋklɛŋ klɛmpɛ lɛ mli tɛi fee ojarawatɛi ni atsɛɔ amɛ rubi kɛ topasiɔn kɛ garneto lɛ.

¹¹ Klɛmpɛ ni ji enyɔ lɛ mli ojarawatɛi lɛ fee ameldo kɛ safiro kɛ daiamɔnd.

¹² Klɛmpɛ ni ji etɛ̃ lɛ mli ojarawatɛi fee tekwais kɛ kalkedɔn kɛ amɛtisto,

¹³ ni klɛmpɛ ni ji ejwɛ lɛ mli ojarawatɛi lɛ fee berilo kɛ onike kɛ yaspi. Akɛ tɛi lɛ mamɔ shika gai amli.

¹⁴ Tɛi lɛ ayibɔ fee nyɔŋma kɛ enyɔ, ni tɛi nɛɛ agbɛii kɛ Yakob bihii lɛ agbɛii nyɔŋma kɛ enyɔ lɛ nyiɛ yɛ Israel akutsei nyɔŋma kɛ enyɔ lɛ naa. Akpɛ gbɛii lɛ tamɔ ayeɔ sama awoɔ wolonaasɔomɔ nɔ nɔ lɛ, tɛ fɛɛ tɛ kɛ egbɛi.

¹⁵ Ni amɛkɛ shika ŋmiiŋmi fee kɔsɔŋkɔsɔi ni agbɔ tamɔ kpãa, amɛkɛwo tsitsinɔhaanii lɛ naa.

¹⁶ Ni amɛfee shika gai hu enyɔ amɛwo tsitsinɔhaanii lɛ yiteŋgbɛ koji enyɔ lɛ.

¹⁷ Kɛkɛ ni amɛkɛ shika kɔsɔŋkɔsɔi enyɔ lɛ ni agbɔ tamɔ kpãa lɛ lala gai enyɔ lɛ ni yɔɔ tsitsinɔhaanii lɛ koji lɛ.

¹⁸ Kɔsɔŋkɔsɔi enyɔ ni agbɔ tamɔ kpãa lɛ anaabui enyɔ ni eshwɛ lɛ, amɛkɛlala shika ni asere kɛbɔle tɛi enyɔ lɛ ashishi lɛ, ni amɛkɛyaŋmɔ efod lɛ he mama hwĩahwĩabii ni kãa kɔŋ nɔ lɛ yɛ hiɛgbɛ.

¹⁹ Amɛfee shika gai enyɔ amɛwo tsitsinɔhaanii lɛ afã kome, ni adɔ awo shishigbɛ koni ekã efod lɛ nɔ koji enyɔ lɛ nɔ.

²⁰ Ni amɛsaa amɛfee shika gai krokomɛi enyɔ ni amɛkɛmamɔ efod lɛ he mama hwĩahwĩabii ni kãa kɔŋ nɔ lɛ anaa yɛ amɛshishigbɛ tsamɔhe, yɛ efod lɛ mlifii nɔ fɛɛfɛo lɛ yiteŋgbɛ.

²¹ Ni amɛkɛ mama bluu fimɔ tsitsinɔhaanii lɛ he gai lɛ amɛkpɛtɛ efod lɛ he gai lɛ, koni tsitsinɔhaanii lɛ akã efod lɛ mlifiinii fɛɛfɛo lɛ nɔ koni akɛje nɔ tamɔ bɔ ni Yehowa fã Mose lɛ.

Osɔfoi ahewulamɔ nibii krokomɛi lɛ feemɔ

²² Akɛ mama bluu sɔŋŋ kpɛ efod lɛ shishi atade yuu lɛ.

²³ Ajie kuɛ awo atade lɛ he, ni akɛ mama baŋ kuɛ lɛ naa kɛkpe koni ekagba.

²⁴ Amɛkɛ kuŋtu bluu kɛ kuŋtu afaseo fee kpɔbii kokrobii kɛbɔle atade lɛ naamuu lɛ kɛkpe.

²⁵ Ni amɛkɛ shika ŋmiiŋmi fee ŋmɛji, ni amɛkɛ ŋmɛji nɛɛ folɔ kpɔbii kokrobii lɛ ateiaŋ yɛ atade yuu lɛ naamuu lɛ naa kɛbɔle lɛ kɛkpe nɛkɛ:

²⁶ shika ŋmɛlɛ kome kɛkɛ lɛ kpɔ kokroo kome, shika ŋmɛlɛ kome kɛkɛ lɛ kpɔ kokroo kome aahu kɛbɔle atade yuu lɛ ni abaawo kɛsɔ̃mɔ lɛ naamuu lɛ fɛɛ tswɛm kɛkpe tamɔ bɔ ni Yehowa fã Mose lɛ.

²⁷ Ni amɛkɛ klala kpakpa fɛɛfɛo lo flakai amɛhã Aaron kɛ ebihii lɛ.

²⁸ Amɛkɛ klala kpakpa nɔŋŋ fee osɔfonukpa fai lɛ kɛ osɔfoi bibii afaii pɛmpɛbii lɛ kɛ tswakotoi lɛ hu.

²⁹ Ni amɛkɛ klala kpakpa kɛ kuŋtu bluu kɛ kuŋtu afaseo kɛ kuŋtu tsuru fɔɔ fee mlifii nɔ lɛ, ni alo nii awo mli tamɔ bɔ ni Yehowa fã Mose lɛ.

³⁰ Amɛkɛ shika ŋmiiŋmi fee nii ni taa osɔfonukpa fai lɛ hiɛ lɛ, ni amɛŋma wiemɔi nɛɛ amɛwo nɔ tamɔ aŋmaa nii yɛ wolonaasɔomɔ nɔ nɔ lɛ akɛ, “Afee lɛ krɔŋkrɔŋ ahã Yehowa.”

³¹ Kɛkɛ ni amɛfĩ kɛkpɛtɛ kuŋtu bluu nɔ, ni akɛta osɔfonukpa fai lɛ hiɛ tamɔ bɔ ni Yehowa fã Mose lɛ.

Nitsumɔ lɛ naagbee

³² Nɛkɛ ji bɔ ni afee agbe Yehowa Kpee Buu Krɔŋkrɔŋ lɛ he nitsumɔ lɛ fɛɛ naa ahã. Israelbii lɛ fee nɔ fɛɛ nɔ tamɔ bɔ ni Yehowa fã Mose lɛ.

³³ Kɛkɛ ni amɛkɛ Kpee Buu Krɔŋkrɔŋ lɛ batsɔ̃ɔ Mose, no ji Buu lɛ kɛ ehe tsɛnsii srɔtoi lɛ fɛɛ, kɛ ekpoji lɛ kɛ eplaŋi lɛ kɛ amɛmlibɛlɛmɔ nii lɛ, kɛ akulashiŋi lɛ kɛ nibii ni amɛmamɔɔ nɔ lɛ,

³⁴ kɛ buu lɛ nɔhaa nii lɛ ni ji too ojwɛni wolo ni awo lɛ tsofa tsuru lɛ kɛ nuŋgbee wolo ni haa no nɔ lɛ, kɛ muhɔɔ lɛ.

³⁵ Asaŋ amɛkɛ Kpãŋmɔ Adeka lɛ kɛ enaanɔ lɛ kɛ ehe tsei lɛ

³⁶ kɛ okplɔ̃ lɛ kɛ ehe tsɛnsii lɛ fɛɛ kɛ aboloo ni akɛmaa Nyɔŋmɔ hiɛ lɛ hu ba.

³⁷ Nibii lɛ ekomɛi hu ji shika ŋmiiŋmi kanetso lɛ kɛ ehe kanei lɛ kɛ ehe nibii lɛ fɛɛ, kɛ mu ni akɛsuɔ kane lɛ,

³⁸ kɛ shika afɔleshãa latɛ lɛ, kɛ mu ni akɛfɔɔ mɔ mu lɛ kɛ Kpee Buu Krɔŋkrɔŋ lɛ shinaa lɛ naa mama lɛ.

³⁹ Ekrokomɛi ji akɔɔble afɔleshãa latɛ lɛ kɛ ehe akɔɔble ntaŋ ni kãa latɛ lɛ mli lɛ, kɛ latɛ lɛ he tsei bloblobii lɛ kɛ ehenii lɛ fɛɛ, kɛ okpolu lɛ kɛ eshishitamɔ nii lɛ.

⁴⁰ Ekrokomɛi hu ji kpo lɛ muhɔi lɛ kɛ ekulashiŋi lɛ kɛ nibii ni akulashiŋi lɛ mamɔɔ nɔ lɛ, kɛ kpo lɛ nɔ agbo lɛ naa mama lɛ, kɛ kpo lɛ he taŋkpei lɛ kɛ nibii srɔtoi fɛɛ ni akɛbaasɔ̃mɔ yɛ Kpee Buu Krɔŋkrɔŋ lɛ mli lɛ,

⁴¹ kɛ osɔfoi ahewulamɔ nibii fɛɛfɛji ni akɛbaasɔ̃mɔ yɛ He Krɔŋkrɔŋ lɛ. Nomɛi ji Osɔfo Aaron hewulamɔ nibii krɔŋkrɔŋi lɛ kɛ ebihii lɛ hu ahewulamɔ nibii ni amɛkɛbaasɔ̃mɔ akɛ osɔfoi lɛ.

⁴² Bɔ ni Yehowa fã Mose akɛ afee lɛ, nakai pɛpɛɛpɛ Israelbii lɛ tsu nitsumɔ lɛ fɛɛ.

⁴³ Mose kwɛ nitsumɔ lɛ fɛɛ, ni naa, bɔ ni Yehowa fã lɛ nakai pɛpɛɛpɛ afee lɛ. Kɛkɛ ni Mose jɔɔ amɛ.