2 Mose 35 - ŊMALƐ KRƆŊKRƆŊ LƐ

Hejɔɔmɔ gbi lɛ he akpɔi

¹ Mose bua Israelbii lɛ asafo muu lɛ fɛɛ naa kɛkpe, ni ekɛɛ amɛ akɛ, “Kitãi ni Yehowa ewo akɛ nyɛye nɔ nɛ;

² Aŋɔ gbii ekpaa akɛtsu nii, shi gbi ni ji kpawo lɛ atsɔ̃ gbi krɔŋkrɔŋ ahã nyɛ, Yehowa hejɔɔmɔ gbi krɔŋŋ ni. Mɔ fɛɛ mɔ ni aaatsu nii yɛ nɔ lɛ aaagbe lɛ.

³ Nyɛkashɛrea la yɛ nyɛshihilɛhei lɛ eko eko mli yɛ hejɔɔmɔ gbi lɛ nɔ.”

Kpee Buu Krɔŋkrɔŋ lɛ he nikee nii

⁴ Mose kɛɛ Israelbii asafo muu lɛ fɛɛ akɛ, “Naa nɔ ni Yehowa efã koni afee:

⁵ Nyɛkɛ nikee nii abahãa Yehowa; mɔ fɛɛ mɔ ni yɔɔ he tsuijurɔ akɛ ehã lɛ, lɛ ekɛ nikee abahã Yehowa: shika kɛ jwiɛtɛi kɛ akɔɔble,

⁶ kɛ kuŋtu bluu kɛ kuŋtu afaseo kɛ kuŋtu tsuru fɔɔ kɛ klala fɛɛfɛo, kɛ abotia he tsɔi

⁷ kɛ too ojwɛni wolo ni awo lɛ tsofa tsuru kɛ nuŋgbee wolo kɛ tso.

⁸ Ekrokomɛi hu ji mu ni akɛsuɔ kane kɛ tsofai ni akɛfutuɔ mu ni akɛfɔɔ mɔ mu mli lɛ. Ekomɛi hu ji tsofai ni akɛfeɔ tsofakɛŋma ni ashãa lɛ.

⁹ Akɛ oniketɛi aba abake, nɔ ni akɛbaamɔ osɔfonukpa tsitsinɔhaanii lɛ kɛ ehewulamɔnii lɛ eko ni atsɛɔ lɛ efod lɛ mli.

Yehowa Kpee Buu lɛ he nibii lɛ

¹⁰ “Ni nyɛteŋ nuu fɛɛ nuu ni le ŋaa nitsumɔ lɛ eba ebawa kɛfee nibii fɛɛ ni Yehowa efã ni afee lɛ:

¹¹ nomɛi ji Kpee Buu Krɔŋkrɔŋ lɛ kɛ ebuu lɛ kɛ nɔ ni haa nɔ lɛ, kɛ ekpoji lɛ kɛ ehe mplaŋi lɛ kɛ emliblɛmɔ nii lɛ, kɛ ekulashiŋi lɛ kɛ nibii ni akulashiŋi lɛ mamɔɔ nɔ lɛ.

¹² Ekomɛi hu ji Kpãŋmɔ Adeka lɛ kɛ ehe tsei bloblobii, kɛ enaanɔ ni bu naa lɛ, kɛ muhɔɔ lɛ ni tsĩɔ ehiɛ lɛ,

¹³ kɛ okplɔ̃ lɛ kɛ ehe tsei lɛ, kɛ ehe nibii krokomɛi lɛ fɛɛ, kɛ aboloo ni akɛmaa Nyɔŋmɔ hiɛ lɛ,

¹⁴ kɛ kanetso lɛ kɛ kanei lɛ, kɛ mu ni akɛsuɔ kane lɛ.

¹⁵ Ekrokomɛi ji tsofakɛŋmashãa latɛ lɛ kɛ ehe tsei bloblobii lɛ, kɛ Kpee Buu Krɔŋkrɔŋ lɛ shinaa lɛ naa mama lɛ,

¹⁶ kɛ afɔleshãa latɛ lɛ kɛ akɔɔble ntaŋ ni kãa afɔleshãa latɛ lɛ teŋ tuuŋtu lɛ, kɛ latɛ lɛ he tsei bloblobii lɛ, kɛ ehe nibii krokomɛi lɛ fɛɛ kɛ okpolu lɛ kɛ eshishitamɔ nii lɛ.

¹⁷ Ekrokomɛi hu ji kpo lɛ he muhɔi lɛ kɛ akulashiŋi lɛ kɛ amɛhe nibii ni amɛmamɔɔ nɔ lɛ, kɛ kpo lɛ nɔ agbo lɛ naa mama lɛ,

¹⁸ kɛ Kpee Buu Krɔŋkrɔŋ lɛ he shiŋmlitsei lɛ, kɛ kpo lɛ hu he shiŋmlitsei lɛ kɛ amɛhe taŋkpei lɛ.

¹⁹ Ekrokomɛi hu nɛ: Osɔfoi lɛ ahewulamɔ nibii ni amɛkɛbaasɔ̃mɔ yɛ He Krɔŋkrɔŋ lɛ, ni nomɛi ji Aaron ni ji Osɔfo lɛ hewulamɔ nii krɔŋkrɔŋi lɛ, kɛ ebihii lɛ hu ahewulamɔ nibii ni amɛkɛbaasɔ̃mɔ akɛ osɔfoi lɛ.”

Maŋbii lɛ kɛ nikee ba

²⁰ Israelbii asafo muu lɛ fɛɛ je Mose hiɛ ni amɛtee.

²¹ Amɛku amɛsɛɛ amɛba, ni mɔ fɛɛ mɔ ni sane lɛ eta etsui mli lɛ, mɔ fɛɛ mɔ ni ena he tsuijurɔ lɛ, hiɛ edɛŋ nikee ebahã Yehowa koni akɛtsu Kpee Buu lɛ kɛ ehe sɔ̃ɔmɔ nibii lɛ fɛɛ kɛ hewulamɔ nibii krɔŋkrɔŋi lɛ hu ahe nii.

²² Hii kɛ yei fɛɛ ba ni amɛhiɛ tsitsinaatsɛɛ nii kɛ toiiaŋnii, kɛ waogai kɛ nineshi kpotiai, kɛ shika kɛ jwinei srɔtoi. No ji mɛi abɔ ni yɔɔ he tsuijurɔ lɛ ateŋ mɔ fɛɛ mɔ hiɛ shika nɔ ko ebahã Yehowa.

²³ Ni mɔ fɛɛ mɔ ni yɔɔ kuŋtu bluu loo kuŋtu afaseo loo kuŋtu tsuru fɔɔ loo klala fɛɛfɛo loo abotia he tsɔi loo too ojwɛni wolo ni awo lɛ tsofa tsuru loo nuŋgbee wolo lɛ ekɛba.

²⁴ Ni mɔ fɛɛ mɔ ni na jwiɛtɛi loo akɔɔble lɛ ekɛba akɛ Yehowa nikee nii, ni mɔ hu ni yɔɔ tso ni abaanyɛ akɛtsu sɔ̃ɔmɔ lɛ he nɔ ko lɛ ekɛba.

²⁵ Kɛkɛ ni yei fɛɛ ni le kpãatsɛ̃mɔ kɛ amɛnine tsɛ̃ kpãa, ni amɛkɛ nii ni amɛtsɛ̃ lɛ ba, no ji kpãa bluu kɛ kpãa afaseo kɛ kpãa tsuru fɔɔ kɛ kpãa yɛŋ futaa.

²⁶ Yei fɛɛ ni he esa kɛ abotia hetsɔi kpãatsɛ̃mɔ lɛ amɛtsɛ̃ eko kɛba.

²⁷ Ni maŋ onukpai lɛ kɛ oniketɛi kɛ ojarawatɛi krokomɛi ni akɛbaamɔmɔ efod lɛ kɛ tsitsinɔhaanii lɛ amli lɛ ba;

²⁸ asaŋ amɛkɛ tsofai ni akɛfeɔ tsofakɛŋma ni ashãa lɛ ba.

²⁹ Israelbii lɛ bake Yehowa nii yɛ tsuijurɔ naa. Nuu fɛɛ nuu kɛ yoo fɛɛ yoo ni nu he yɛ etsuiŋ akɛ ehã nɔ ko lɛ, ekɛbake, koni akɛtsu nitsumɔi srɔtoi fɛɛ ni Yehowa ekɛɛ akɛ atsɔ̃ Mose nine nɔ atsu lɛ.

Ŋaalɔi ni baama Kpee Buu lɛ

³⁰ Kɛkɛ ni Mose kɛɛ Israelbii lɛ akɛ, “Naa, Yehowa eje gbɛ ekɔ Bezaleel, ni ji Hur bi Uri binuu lɛ ni jɛ Yuda akutso lɛ mli lɛ.

³¹ Eduro lɛ Nyɔŋmɔ mumɔ kɛ ŋaa kɛ jwɛŋmɔ kɛ nilee ni akɛnyɛɔ ŋaa nitsumɔi srɔtoi fɛɛ atsuɔ,

³² koni ekɛ shika kɛ jwiɛtɛi kɛ akɔɔble aŋa ŋai srɔtoi,

³³ ni efolɔ tɛi ni akɛtaraa nibii amli, asaŋ ni ekpɛ tso mli koni akɛtsu ŋaa nitsumɔi srɔtoi srɔtoi fɛɛ.

³⁴ Asaŋ Yehowa kɛwo Bezaleel kɛ Ahisamak binuu Oholiab ni jɛ Dan akutso lɛŋ lɛ mli koni amɛtsɔ̃ɔ mɛi ŋaa nitsumɔi.

³⁵ Eduro amɛ nilee koni amɛkɛŋa ŋai srɔtoi fɛɛ, tamɔ samayeli loo niloo kɛ kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kpakpa mliwoo nɛkɛ, kɛ mamaloo diɛŋtsɛ hu. No ji amɛle nitsumɔ fɛɛ nitsumɔ ni ŋaalɔ tsuɔ lɛ tsumɔ.”