2 Mose 34 - ŊMALƐ KRƆŊKRƆŊ LƐ

Tɛi tɛtɛrɛbii enyɔ krokomɛi

¹ Yehowa kɛɛ Mose akɛ, “Ko tɛi tɛtɛrɛbii enyɔ tamɔ klɛŋklɛŋnii lɛ koni maŋma klɛŋklɛŋ tɛi tɛtɛrɛbii ni ojwara lɛ anɔ wiemɔi lɛ mawo nɔ.

² Wɔ lɛ osaa ohe, ni oba Sinai Gɔŋ lɛ nɔ okɛ ohe abatsɔ̃ɔ mi yɛ jɛi yɛ gɔŋ lɛ yiteŋ.

³ Mɔ ko mɔ ko akafata ohe kɛmiiba lɛ, akana mɔ ko mɔ ko yɛ gɔŋ lɛ nɔ he ko he ko, ni akana toi loo tsinai miiba abaye nii yɛ gɔŋ lɛ he.”

⁴ Kɛkɛ ni Mose ko tɛi tɛtɛrɛbii enyɔ tamɔ klɛŋklɛŋnii lɛ, ni ete shi leebi maŋkpa, ni ekwɔ kɛtee Sinai Gɔŋ lɛ nɔ, tamɔ bɔ ni Yehowa efã lɛ lɛ, ni ehiɛ tɛi tɛtɛrɛbii enyɔ lɛ.

⁵ Kɛkɛ ni Yehowa kpeleke shi yɛ atatu mli kɛbanina Mose, yɛ he ni edamɔ lɛ, ni Yehowa tsɛ lɛ diɛŋtsɛ egbɛi krɔŋkrɔŋ lɛ.

⁶ Yehowa batsɔ̃ Mose hiɛ kɛho, ni etsɛ ehe ekɛɛ, “Yehowa, Yehowa, Nyɔŋmɔ musuŋtsɔlɔ kɛ durolɔ lɛ, mɔ ni toɔ etsui shi, ni emli eyi kɛ suɔmɔ kɛ anɔkwale babaoo lɛ,

⁷ mɔ ni yɔɔ suɔmɔ hã mɛi akpei abɔ, ni ekɛ tɔ̃mɔ kɛ esha faa, shi ehãaa tɔ̃lɔ ko aye ehe tswaa, ni ewoɔ bii nyɔmɔ yɛ amɛtsɛmɛi lɛ anajiaŋ yɛ tsɛmɛi lɛ atɔ̃mɔi ahewɔ kɛyashiɔ yinɔ ni ji etɛ̃ kɛ yinɔ ni ji ejwɛ lɛ nɔ lɛ.”

⁸ Ni Mose he fee oya, ni ekoto shi, ni eja Yehowa,

⁹ ni ekɛɛ, “Nuŋtsɔ, agbɛnɛ kɛji ona mihe miishɛɛ lɛ, miikpa bo fai akɛ Nuŋtsɔ ahi wɔteŋ kɛya, tsɛbelɛ gbɔmɛi ni kuɛŋ ti ji maŋ nɛɛ. Okɛ wɔtɔ̃mɔi kɛ wɔhe esha afa wɔ koni okɛ wɔ afee onɔ.”

Yehowa kɛ Israelbii kpãŋ ekoŋŋ

¹⁰ Yehowa kɛɛ Mose akɛ, “Naa, mi kɛ nyɛ baakpãŋ. Mibafee naakpɛɛ nii yɛ omaŋ lɛ fɛɛ hiɛ, ni ji nii ni eko bako dã yɛ shikpɔŋ lɛ nɔ fɛɛ, loo yɛ maŋ ko maŋ ko nɔ, ni mɛi ateŋ ni oyɔɔ lɛ kɛaana Yehowa nitsumɔ, ejaakɛ mi kɛ bo baatsu nii ni yɔɔ gbeyei.

¹¹ Ye mlai ni miwoɔ bo ŋmɛnɛ nɛɛ anɔ. Naa, mibahã Amorbii lɛ kɛ Kanaanbii lɛ kɛ Hitbii lɛ kɛ Perizbii lɛ kɛ Hivbii lɛ kɛ Yebusbii lɛ ajo nyɛnaa foi.

¹² Kwɛmɔ ohe ni ahi koni okɛ shikpɔŋ nɔ ni nyɛyaa lɛ nɔ bii lɛ akakpãŋ koni no batsɔ̃ tsɔne ehã nyɛ.

¹³ Shi moŋ nyɛkumɔa amɛfɔleshãa latɛi lɛ kɛ amɛmãgãi lɛ, ni nyɛfitea amɛkrabatsai lɛ, ni nyɛfolɔa amɛ-Ashera lɛ wɔŋ koo lɛ nyɛshwiea.

¹⁴ “Nyɛkajaa nyɔŋmɔ kroko ejaakɛ Yehowa, ni egbɛi ji ‘Awuŋã’ lɛ, Nyɔŋmɔ ni yeɔ awuŋã ni.

¹⁵ Ni nyɛkɛ shikpɔŋ lɛ nɔ bii lɛ akakpãŋa kpãŋmɔ ko, ejaakɛ kɛji amɛmiija amɛnyɔŋmɔi lɛ, ni amɛshã amɛfɔle lɛ, amɛteŋ mɔ ko aaatsɛ nyɛ, ni nyɛaayaye amɛfɔleshãa niyenii lɛ eko.

¹⁶ Nakai nɔŋŋ eeehã nyɛyaŋɔŋɔɔ amɛbiyei akɛ ŋamɛi nyɛhã nyɛbihii, ni kɛji amɛbiyei lɛ tee amɛnyɔŋmɔi lɛ jamɔ lɛ, nyɛbihii lɛ aaanyiɛ amɛŋamɛi lɛ asɛɛ amɛje misɛɛ, ni amɛaayaja ŋamɛi lɛ asɛɛ nyɔŋmɔi lɛ.

¹⁷ “Kaafee dade amãgã ko ohã ohe.

¹⁸ “Nyɛyea Akpiti Gbijurɔ lɛ. Bɔ ni miwo nyɛ ehe kitã lɛ; nyɛyea aboloo ni akɛ mã akpiti shã. Nyɛyea lɛ gbii kpawo, yɛ be ni ato ni ji Abib nyɔɔŋ lɛ nɔ, ejaakɛ Abib nyɔɔŋ lɛ nɔ nyɛshi Ijipt.

¹⁹ “Nɔ fɛɛ nɔ ni ji nuu ni gbeleɔ musu naa lɛ minɔ ni, tsina ni jio, too ni jio.

²⁰ Shi teji kromɔbi lɛ akɛ toobi akpɔ̃ lɛ, shi kɛji asumɔŋ ni akpɔ̃ lɛ lɛ no lɛ aku ekuɛŋ. Okpɔ̃ bihii ateŋ kromɔbii fɛɛ. “Mɔ ko mɔ ko akapue kɛ edɛ̃ folo yɛ mihiɛ.

²¹ “Atsu nii gbii ekpaa, shi gbi ni ji kpawo lɛ nɔ lɛ ajɔɔ he, humɔ be mli jio, nikpamɔ be mli jio, ajɔɔ he.

²² “Asaŋ nyɛyea Otsii Agbijurɔ lɛ, be mli ni akuɔ ŋmaa kpokploku lɛ, kɛ Ŋmaa naabuamɔkɛtoo Gbijurɔ lɛ yɛ afi lɛ naagbee mli.

²³ “Daa afi lɛ nyɛteŋ hii lɛ fɛɛ abapue yɛ Yehowa, Nyɔŋmɔ, ni ji Israel Nyɔŋmɔ lɛ, hiɛ shii etɛ̃.

²⁴ Ejaakɛ mibashwie majimaji yɛ nyɛhiɛ, ni malɛɛ nyɛhusui lɛ amli kɛya shɔŋŋ, ni daa afi shii etɛ̃, be mli ni nyɛba Yehowa, nyɛNyɔŋmɔ lɛ, hiɛ lɛ mɔ ko mɔ ko hiɛ ekɔŋ nyɛshikpɔŋ lɛ nɔ ni eeeta he.

²⁵ “Akɛ masha aboloo akafata kooloo he akɛshã afɔle ahã mi; ni je hu akatsɛre Hehoo Gbijurɔ afɔle lɛ eko nɔ.

²⁶ “Klɛŋklɛŋ ŋmɔshi nii lɛ mli klɛŋklɛŋ yibii ni nyɛbaakpa lɛ, nyɛkɛbaa Yehowa, nyɛNyɔŋmɔ lɛ, we lɛ. “Akahoo toobi kɛ lɛ nɔŋŋ enyɛ fufɔ mli nu.”

²⁷ Kɛkɛ ni Yehowa kɛɛ Mose akɛ, “Ŋmaa wiemɔi nɛɛ, ejaakɛ wiemɔi nɛɛ anaa mi kɛ bo kɛ Israel ekpãŋ yɛ.”

²⁸ Mose ye nyɔɔŋnyɔɔŋ kɛ shwaneshwane gbii nyɔŋmai ejwɛ yɛ Yehowa ŋɔɔ, ni eŋma kpãŋmɔ lɛ mli wiemɔi lɛ, ni ji Kitãi Nyɔŋma lɛ ewo tɛi tɛtɛrɛbii lɛ anɔ, eyeee nii lɛ enuuu nu hu.

Mose kpeleke shi kɛjɛ Sinai Gɔŋ lɛ nɔ

²⁹ Be ni Mose jɛ Sinai Gɔŋ lɛ nɔ ekpeleke shi, ni tɛi tɛtɛrɛbii enyɔ lɛ hiɛ edɛ̃ lɛ, eleee kwraa akɛ wiemɔi ni ekɛ Nyɔŋmɔ yawie hiɛ kɛ hiɛ lɛ ehã ehiɛ miikpɛ.

³⁰ Be ni Aaron kɛ Israelbii lɛ fɛɛ na Mose lɛ ehiɛ miikpɛ, ni amɛshe gbeyei akɛ amɛaabɛŋkɛ lɛ.

³¹ Shi Mose tsɛ amɛ, ni Aaron kɛ maŋ onukpai lɛ fɛɛ ku amɛsɛɛ kɛba eŋɔɔ, ni Mose kɛ amɛ wie.

³² Fee sɛɛ lɛ Israelbii lɛ fɛɛ tsi bɛŋkɛ Mose, ni ewo amɛ kitãi lɛ fɛɛ ni Yehowa kɛhã lɛ yɛ Sinai Gɔŋ lɛ nɔ lɛ.

³³ Be ni Mose kɛ maŋ lɛ wie egbe naa lɛ, ekɛ mama ko ha ehiɛ.

³⁴ Kɛji Mose tee Yehowa hiɛ ekɛ lɛ yaawie lɛ, ekpaa mama nɛɛ yɛ hiɛ kɛyashiɔ ejeɔ kpo, ni ebakɛɔ Israelbii lɛ nɔ ni Yehowa efã lɛ ni ekɛɛ lɛ.

³⁵ Israelbii lɛ naa Mose hiɛ akɛ eekpɛ, ni Mose saa ekɛ mama lɛ haa ehiɛ kɛyashiɔ beyinɔ ni eeetee ekoŋŋ ekɛ Yehowa ayawie.