2 Mose 32 - ŊMALƐ KRƆŊKRƆŊ LƐ

Shika Tsinabi lɛ

¹ Be ni Israelbii lɛ na akɛ Mose eyatsɛ yɛ gɔŋ lɛ nɔ ni ekpelekeee shi lɛ, amɛbua amɛhe naa, ni amɛtee Aaron ŋɔɔ amɛyakɛɛ lɛ akɛ, “Tee shi ni ofee nyɔŋmɔ kroko ohã wɔ koni enyiɛ wɔhiɛ kɛya, shi nɛkɛ Mose nɛɛ, ni ji nuu ni yajie wɔ kɛjɛ Ijipt shikpɔŋ lɛ nɔ kɛba biɛ nɛɛ lɛ, wɔleee nɔ koome ni efee lɛ.”

² Kɛkɛ ni Aaron kɛɛ amɛ akɛ, “Nyɛkpɔlɔa shika toiiaŋnii ni yɔɔ nyɛŋamɛi kɛ nyɛbihii kɛ nyɛbiyei lɛ atoiiaŋ lɛ nyɛbahãa mi.”

³ Maŋ lɛ fɛɛ kpɔlɔ shika toiiaŋnii ni yɔɔ amɛtoiiaŋ lɛ, ni amɛkɛbahã Aaron.

⁴ Aaron he toiiaŋnii lɛ yɛ amɛdɛ̃, ni esere fɛɛ, ni ekɛ ŋaayeli dade tsu he nii, ni eshwie lɛ tsina. Kɛkɛ ni maŋbii lɛ kɛɛ, “Israel, naa wɔnyɔŋmɔ ni jie wɔ kɛjɛ Ijipt shikpɔŋ lɛ nɔ lɛ ei!”

⁵ Be ni Aaron na enɛ lɛ, ema afɔleshãa latɛ yɛ tsina lɛ hiɛ; kɛkɛ ni eshiɛ, ni ekɛɛ maŋbii lɛ akɛ, “Wɔ lɛ, aye gbijurɔ ahã Yehowa.”

⁶ Enɔ jetsɛremɔ lɛ maŋbii lɛ te shi maŋkɛ mra, ni amɛshãshãa shãa afɔlei, ni amɛkɛ niyenii afɔlei hu ba, ni maŋ lɛ ho tara shi, ni amɛye nii, ni amɛnu nii hu, ni no sɛɛ lɛ amɛte shi amɛshwɛ.

⁷ Kɛkɛ ni Yehowa kɛɛ Mose akɛ, “Kpelekemɔ shi oya ni oya, shi omaŋbii lɛ ni okɛjɛ Ijipt kɛba lɛ ewo amɛhe muji.

⁸ Amrɔ nɛɛ nɔŋŋ lɛ amɛje gbɛ ni mitsɔ̃ɔ amɛ lɛ nɔ. Amɛkɛ shika efee tsinabi, ni amɛja lɛ, ni amɛshã afɔlei hu amɛhã lɛ, ni nɔ ni amɛkɛɛ yɛ ehe ji, ‘Israel, naa wɔnyɔŋmɔ ni jie wɔ kɛje Ijipt shikpɔŋ lɛ nɔ lɛ ei!’ ”

⁹ Yehowa tee nɔ, ni ekɛɛ Mose akɛ, “Mina nɛkɛ maŋ nɛɛ akɛ maŋ ko ni kuɛŋ ti.

¹⁰ No hewɔ lɛ, hã mimli awo la awo amɛ koni maplenee amɛ; shi bo lɛ mahã otsɔ̃ maŋ kpeteŋkple.”

¹¹ Mose kpa Yehowa, eNyɔŋmɔ lɛ, fai ekɛɛ, “Yehowa, mɛɛba ni omli woɔ la woɔ omaŋ ni okɛ hewalɛ kpele kɛ nineshiwalɛ eyakpɔ̃ yɛ Ijipt shikpɔŋ lɛ nɔ kɛba lɛ?

¹² Mɛɛ hewɔ hu ni ooohã Ijiptbii ana hegbɛ amɛwie akɛ, ‘Moaŋ yiŋ fɔŋ ni eto hewɔ eyajie amɛ kɛtee lɛ, koni eyagbe amɛ yɛ gɔji lɛ anɔ ni eplenee amɛ yɛ shikpɔŋ lɛ nɔ.’ Na tsui ohã amɛ, ni efɔŋ ni oto oyiŋ akɛ obaafee amɛ lɛ, okɛfa amɛ.

¹³ Kaimɔ otsuji Abraham kɛ Isak kɛ Yakob, mɛi ni bo diɛŋtsɛ okã amɛ kitã, ni okɛɛ amɛ akɛ, ‘Mahã nyɛshwiei afa tamɔ ŋwɛi ŋulamii lɛ, ni shikpɔŋ nɛɛ fɛɛ ni miwo nyɛ shi yɛ he lɛ mikɛbaahã amɛ akɛ amɛgboshinii kɛya naanɔ.’ ”

¹⁴ Kɛkɛ ni Yehowa kɛ efɔŋ ni kulɛ eto akɛ ebaafee Israelbii lɛ fa amɛ.

¹⁵ Kɛkɛ ni Mose tsɔ ehe, ni eje gɔŋ lɛ nɔ ekpeleke shi ni tɛi tɛtɛrɛbii enyɔ lɛ ni aŋma nii yɛ amɛsɛɛ kɛ hiɛ fɛɛ lɛ hiɛ edɛ̃.

¹⁶ Nyɔŋmɔ diɛŋtsɛ ninenaa nitsumɔ ji tɛi tɛtɛrɛbii lɛ, ni nii ni aŋma yɛ tɛi tɛtɛrɛbii lɛ anɔ lɛ hu Nyɔŋmɔ ni ŋma.

¹⁷ Be ni Yoshua nu akɛ aabɔ oshe hoo yɛ maŋ lɛŋ lɛ, ekɛɛ Mose akɛ, “Aabolɔ yɛ maŋ lɛ mli tamɔ ta mli blɔmɔ.”

¹⁸ Shi Mose here lɛ nɔ akɛ, “Nɔ he ni minuɔ lɛ, ejeee mɛi komɛi kunimyeli he oshebɔɔ, ni ejeee yaafo ni tsɔ̃ɔ akɛ nine etsɔ̃ mɛi komɛi anɔ hu, shi moŋ lala ni aahere nɔ ni.”

¹⁹ Ni amrɔ pɛ ni Mose bɛŋkɛ shitoohe lɛ ni ena tsina lɛ kɛ joo ni maŋ lɛ joɔ lɛ, kɛkɛ ni emli wo la, ni ekɛ tɛi tɛtɛrɛbii lɛ tswia shi.

²⁰ Kɛkɛ ni Mose wo tsina lɛ ni maŋbii lɛ efee lɛ, ni ekɛwo la mli ni eshã, ni egbɛlɛ lɛ mlumlu, ni ekɛshwã nu hiɛ, ni ehã Israelbii lɛ nu.

²¹ Ni Mose bi Aaron akɛ, “Mɛni po maŋbii nɛɛ fee bo hewɔ ni ohã amɛfee esha kpele nɛkɛ?”

²² Aaron jie enaa ekɛɛ, “Minuŋtsɔ mli akawo mi la. Bo diɛŋtsɛ ole akɛ maŋ nɛɛ sumɔɔ efɔŋ feemɔ.”

²³ Ejaakɛ amɛkɛɛ mi akɛ, “Feemɔ nyɔŋmɔ kroko ohã wɔ ni enyiɛ wɔhiɛ kɛya, shi nɛkɛ Mose nɛɛ, ni ji nuu ni yajie wɔ kɛjɛ Ijipt shikpɔŋ lɛ nɔ kɛba biɛ nɛɛ lɛ, wɔleee nɔ koome ni efee lɛ.”

²⁴ Ni mito he mihã amɛ akɛ, “Mɔ fɛɛ mɔ ni yɔɔ shika nii lɛ ekpɔlɔ kɛba, ni amɛkpɔlɔ kɛba, ni mikɛwo la mli, ni etsɔ̃ tsina nɛɛ.”

²⁵ Be ni Mose na akɛ maŋ lɛ efee yuuyaa (ejaakɛ Aaron ehã amɛfee yuuyaa, ni amɛbɔ amɛhe ahora amɛtsɔ̃ɔ amɛhenyɛlɔi) lɛ,

²⁶ eyadamɔ shitoohe lɛ agbo lɛ naa, ni ebo etsɛ ekɛɛ, “Namɔ yɔɔ Yehowa gbɛfaŋ? Mɔ lɛ aba miŋɔɔ!” Kɛkɛ ni Levibii lɛ fɛɛ bua amɛhe naa kɛba Mose ŋɔɔ.

²⁷ Ni Mose kɛɛ Levibii lɛ akɛ, “Nɔ ni Yehowa, Israel Nyɔŋmɔ lɛ, kɛɛ nɛ, ‘Nuu fɛɛ nuu akɔ eklante eŋmɔ, ni nyɛnyiɛa maŋ lɛ mli fɛɛ, kɛjɛ agbonaa kɛya agbonaa, ni mɔ fɛɛ mɔ agbe enyɛmi, mɔ fɛɛ mɔ agbe enaanyo, ni mɔ fɛɛ mɔ agbe ehe gbɔmɔ.’ ”

²⁸ Levibii lɛ fee bɔ ni Mose fã amɛ lɛ, ni maŋ lɛ mli hii aaafee akpei etɛ̃ nyɔnyɔɔ nakai gbi lɛ.

²⁹ Kɛkɛ ni Mose kɛɛ Levibii lɛ akɛ, “Nyɛjɔɔ nyɛhe nɔ ŋmɛnɛ nyɛhã Yehowa sɔ̃ɔmɔ, ejaakɛ akɛni nyɛteŋ mɔ fɛɛ mɔ te shi ewo lɛ diɛŋtsɛ ebi kɛ lɛ diɛŋtsɛ enyɛmi lɛ, Yehowa ejɔɔ nyɛ ŋmɛnɛ.”

³⁰ Enɔ jetsɛremɔ leebi lɛ Mose kɛɛ maŋbii lɛ akɛ, “Nyɛfee esha kpeteŋkple. No hewɔ lɛ, makwɔ gɔŋ lɛ kɛya Yehowa ŋɔɔ. Eko lɛ eeebo mifaikpamɔ toi, ni eeeŋɔ nyɛhe esha lɛ efa nyɛ.”

³¹ Ni Mose ku esɛɛ etee Yehowa ŋɔɔ, ni ekɛɛ, “Ao, maŋ nɛɛ efee esha kpeteŋkple diɛŋtsɛ akɛ amɛfee shika amãgã amɛhã amɛhe.

³² Ofainɛ, okɛ amɛhe esha lɛ afa amɛ; shi kɛji ehiii nakai feemɔ lɛ no lɛ gbee mi moŋ migbɛi yɛ wolo ni oŋma omɛi agbɛii yɛ mli lɛ mli.”

³³ Shi Yehowa kɛɛ Mose akɛ, “Mɔ ni efee esha eshi mi lɛ, lɛ egbɛi magbe yɛ miwolo lɛ mli.

³⁴ No hewɔ lɛ, agbɛnɛ, yaa ni oyakpala maŋ lɛ kɛya he ni mi kɛ bo ewie he eto lɛ. Naa, mibɔfo lɛ aaanyiɛ ohiɛ, shi moŋ kɛji gbi lɛ shɛ lɛ, mibagbala amɛtoi yɛ esha ni amɛfee lɛ hewɔ.”

³⁵ Enɛ hewɔ lɛ, Yehowa hã gbele hela bote Israelbii lɛ ateŋ, ejaakɛ amɛ amɛfee, ni Aaron fee shika tsina lɛ.