2 Mose 30 - ŊMALƐ KRƆŊKRƆŊ LƐ

Tsofakɛŋma latɛ lɛ

¹ “Oma latɛ ni ashã tsofakɛŋma yɛ nɔ. Akɛ tso afee.

² Ekɛlɛ afee ninetalɔ kome, ni elɛɛmɔ hu afee ninetalɔ kome, ekɛlɛ kɛ elɛɛmɔ aye egbɔ, shi ekwɔlɛ afee ninetalɔi enyɔ. Ehe akloŋtoi lɛ kɛ latɛ lɛ afee nɔ muu kome.

³ Okɛ shika ŋmiiŋmi aha he, eyiteŋ kɛ ehe fɛɛ kɛkpe, kɛ ehe akloŋtoi lɛ hu, ni okɛ shika abaŋ latɛ lɛ naa kɛkpe.

⁴ Ofee shika gai enyɔɔnyɔ owo latɛ lɛ ŋmawuiaŋ biɛ kɛ biɛ, yɛ shika ni akɛbaŋ naa lɛ shishi, koni akɛ tsei bloblobii ahɔlɔ gaii nɛɛ amli ni akɛwo.

⁵ Okɛ tso lɛ eko agbɔ tsei nɛɛ ni aha he shika.

⁶ Okɛ latɛ lɛ ama muhɔɔ lɛ ni yɔɔ Kpãŋmɔ Adeka lɛ masɛi lɛ hiɛ, yɛ Kpãŋmɔ Adeka lɛ naanɔ lɛ, ni ji he ni mikɛ bo aaakpe yɛ lɛ, hiɛ.

⁷ Aaron ashã tsofakɛŋma yɛ nɔ. Daa leebi kɛji etee kanei lɛ saamɔ hã suu lɛ, eshã tsofakɛŋma yɛ nɔ;

⁸ ni kɛji etee eyasu kanei lɛ gbɛkɛ lɛ, eshã tsofakɛŋma nakai nɔŋŋ yɛ nɔ. Daa tsofakɛŋmashãa nɛɛ yɛ Yehowa hiɛ lɛ akã shi ahã nyɛyinɔi fɛɛ.

⁹ Akashã tsofakɛŋma ni bɛ krɔŋkrɔŋ loo kooloo loo niyenii afɔle ko kwraa yɛ nɔ, ni akafɔse wain akɛ dãa afɔle ashwie nɔ.

¹⁰ Aaron kɛ kooloo ni akɛkpãtãa Nyɔŋmɔ yɛ esha ni afee hewɔ lɛ lá lɛ akpa latɛ lɛ akloŋtoi lɛ ahe, ni ekɛkpãtã shi kome daa afi. Efee kpãtãmɔ nii nɛɛ shi kome daa afi yɛ afɔleshãa latɛ lɛ nɔ yɛ yinɔi fɛɛ amli. Eji nii ni yɔɔ krɔŋkrɔŋ jogbaŋŋ diɛŋtsɛ hã mi, Yehowa.”

Kpee Buu Shihilɛhe lɛ hetooyeli

¹¹ Agbɛnɛ Yehowa kɛɛ Mose akɛ,

¹² “Kanemɔ Israelbii lɛ, ni kɛ ona amɛyikulɛ lɛ, ohã amɛteŋ mɔ fɛɛ mɔ awo eyi too yɛ ekpɔ̃mɔ̃ hewɔ ehã mi Yehowa, koni gbele hela akaba amɛteŋ kɛbakpãtã amɛhiɛ yɛ kanemɔ lɛ hewɔ.

¹³ Ni too ni áye lɛ nɛ: mɔ fɛɛ mɔ ni aaakane lɛ lɛ awo jwiɛtɛi shekel fã yɛ He Krɔŋkrɔŋ lɛ shekel lɛ tsiimɔ naa akɛ shidaa afɔle ni akɛhãa mi, Yehowa. (Shekel kome feo gerai nyɔŋmai enyɔ.)

¹⁴ Mɛi ni abaakane lɛ ateŋ mɔ fɛɛ mɔ ni eye afii nyɔŋmai enyɔ kɛ sɛɛ lɛ, ewo mi, Yehowa, mitoo nɛɛ.

¹⁵ Kɛji aawo, mi Yehowa mitoo nɛɛ ni nyɛkɛkpãtãa nyɛhãa nyɛwala lɛ, niiatsɛ akahã fe jwiɛtɛi shekel fã nɛɛ, ni ohiafo hu akahã nɔ ni shɛɛɛ nakai.

¹⁶ Hemɔ kpãtãmɔ too nɛɛ yɛ Israelbii adɛŋ ni akɛto koni akɛtsu Kpee Buu lɛ mli sɔ̃ɔmɔ lɛ he nii, koni ehã Yehowa akai Israelbii lɛ daa ejaakɛ nyɛkɛ too lɛ miikpãtã Nyɔŋmɔ nyɛhã nyɛ diɛŋtsɛ nyɛwala.”

Akɔɔble okpolu lɛ

¹⁷ Ni Yehowa kɛɛ Mose akɛ,

¹⁸ “Asaŋ okɛ akɔɔble afee okpolu. Okɛ akɔɔble nɔŋŋ afee shimaa nɔ koni okpolu lɛ ama nɔ. Okɛma Buu lɛ kɛ afɔleshãa latɛ lɛ teŋ, ni oyɛ nu owo mli

¹⁹ koni Aaron kɛ ebihii lɛ kɛfɔflɔ amɛniji kɛ amɛnaji ahe.

²⁰ Kɛji amɛyaabote Kpee Buu lɛ mli aloo amɛyaabɛŋkɛ afɔleshãa latɛ lɛ, kɛbasɔ̃mɔ mi ni amɛshã afɔle ni akɛ la shãa amɛhã mi Yehowa lɛ, amɛfɔfɔlɔ amɛhe koni amɛkagboi.

²¹ Amɛfɔfɔlɔ amɛniji kɛ amɛnaji ahe koni amɛkagboi; ni enɛ atsɔ̃ akpɔ ahã Aaron kɛ eshwiei yɛ amɛyinɔi fɛɛ amli kɛya naanɔ.”

Mu ni akɛfɔɔ mɔ mu lɛ

²² Asaŋ Yehowa kɛɛ Mose akɛ,

²³ “Ŋɔɔ tsofakɛŋma kpakpai nɛɛ fɛɛ eko: tso mli mu ni jeɔ ŋma shekel ohai enumɔ, kɛ sinamon ni jeɔ ŋma nakai bɔ fã, ohai enyɔ kɛ nyɔŋmai enumɔ kɛ kooŋkpãa ni jeɔ ŋma ohai enyɔ kɛ nyɔŋmai enumɔ,

²⁴ kɛ kashia tso lɛ hu kiloi etɛ̃ ni aŋmɛ yɛ He Krɔŋkrɔŋ lɛ niŋmɛɛ tɛ naa, kɛ mutso mu lita kome.

²⁵ Futumɔ nibii nɛɛ, tamɔ bɔ ni ojeŋmafeelɔ futuɔ ojeŋma ehãa, ni okɛfee mu, ni ji mu krɔŋkrɔŋ ni akɛfɔɔ mɔ mu lɛ.

²⁶ Okɛ mu nɛɛ ashwã Kpee Buu lɛ kɛ Kpãŋmɔ Adeka lɛ nɔ,

²⁷ kɛ nibii nɛɛ hu: okplɔ̃ lɛ kɛ ehenii lɛ fɛɛ, kɛ kanetso lɛ kɛ ehenii lɛ, kɛ tsofakɛŋmashãa latɛ lɛ,

²⁸ kɛ afɔleshãa latɛ lɛ kɛ ehe tsɛnsi lɛ fɛɛ, kɛ okpolu lɛ ni yɔɔ nane ni ta shi lɛ.

²⁹ Ofee enɛ koni okɛtsuu amɛhe ni ehã amɛfee krɔŋkrɔŋ jogbaŋŋ kɛwula shi, bɔ ni nɔ fɛɛ nɔ ni he aaasa amɛhe lɛ aaafee krɔŋkrɔŋ.

³⁰ Ofɔ Aaron kɛ ebihii lɛ mu, ni ofee amɛ krɔŋkrɔŋ koni amɛye osɔfo amɛhã mi.

³¹ Ni okɛɛ Israelbii lɛ akɛ, ‘Naa, enɛ baafee mimu krɔŋkrɔŋ ni akɛbaafɔ mɔ mu yɛ nyɛyinɔi fɛɛ mli.

³² Akɛkafɔ mɔ folo ko kɛkɛ, ni nyɛkafea eko hu ni afutu lɛ tamɔ bɔ ni atsɔ̃ afutu no lɛ. Nɔ krɔŋkrɔŋ ni, ni ahi shi nakai ahã nyɛ.

³³ Mɔ fɛɛ mɔ ni aaafutu mu ko tamɔ no, aloo ekɛ mu nɛɛ eko aaasa mɔ folo ko kɛkɛ he lɛ atswa enaneshi tu.’ ”

Tsofakɛŋma lɛ

³⁴ Kɛkɛ ni Yehowa kɛɛ Mose akɛ, “Ŋɔɔ tsofakɛŋmai srɔtoi nɛɛ fɛɛ eko: krɔbɔo kɛ onitsa kɛ galbano. Tsofakɛŋmai nɛɛ okɛ mire ŋmiiŋmi afata he; ŋmɛɛ eko fɛɛ eko falɛ pɛpɛɛpɛ,

³⁵ ni okɛfee tsofakɛŋma ni ashãa. Awo mli ŋoo koni ekafite, ni afutu lɛ tamɔ bɔ ni ojeŋmafeelɔ futuɔ ojeŋma ehãa. Emli atse, ni efee krɔŋkrɔŋ.

³⁶ Oshimɔ eko ni ebo mɔnyɔmɔnyɔ, ni okɛ eko ama Kpãŋmɔ Adeka lɛ hiɛ, yɛ Kpee Buu lɛ mli, he ni mikɛ bo aaakpe yɛ lɛ. Tsofakɛŋma nɛɛ afee nɔ krɔŋkrɔŋ jogbaŋŋ kɛwula shi ahã nyɛ.

³⁷ Tsofakɛŋma ni obaafee nɛɛ lɛ, nyɛkakwɛa bɔ ni afutu lɛ ahã lɛ nɔ ni nyɛmiifee eko nyɛmiihã nyɛhe. Abu lɛ akɛ nɔ krɔŋkrɔŋ hã mi, Yehowa.

³⁸ Mɔ fɛɛ mɔ ni aaafee eko tamɔ no, ni eeeshã lɛ atswa enaneshi tu.”