2 Mose 28 - ŊMALƐ KRƆŊKRƆŊ LƐ

Osɔfoi ahewulamɔ nibii lɛ

¹ “Ŋɔɔ onyɛmi Aaron kɛ ebihii lɛ, ni ji Nadab kɛ Abihu kɛ Eleazar kɛ Itamar, kɛjɛ Israelbii lɛ ateŋ koni amɛsɔmɔ mi akɛ osɔfoi.

² Ni okpɛ hewulamɔ nibii krɔŋkrɔŋi ni yɔɔ nyam kɛ fɛo ohã onyɛmi Aaron.

³ Mɛi fɛɛ ni miduro amɛ ŋaa ni baanyɛ nii ni obaahã amɛ lɛ amɛtsu lɛ, okɛ amɛ awie koni okɛ hewulamɔ nibii lɛ kpɛɛ awo amɛdɛŋ.

⁴ Ni hewulamɔ nibii ni abaakpɛ lɛ nɛ: tsitsinɔhaanii kɛ efod kɛ atade yuu kɛ flaka ni alo nii awo mli kɛ fai kɛ mliteŋfĩinii. Amɛkpɛ hewulamɔ nibii krɔŋkrɔŋi nɛɛ amɛhã onyɛmi Aaron kɛ ebihii lɛ koni amɛkɛsɔ̃mɔ mi akɛ osɔfoi.

⁵ Ahã ŋaalɔi nɛɛ kuŋtu wuɔfɔ kɛ kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kpakpa.

⁶ “Amɛkɛ kuŋtu wuɔfɔ kɛ kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kpakpa ni alo nii awo mli afee efod lɛ.

⁷ Akpɛ mamai hwĩahwĩabii enyɔ ni baakã kɔŋ nɔ akɛtsa efod lɛ koji enyɔ koni akɛ nomɛi aŋmɔ efod lɛ.

⁸ Akɛ ŋaa kome lɛ nɔŋŋ afee kɔŋ nɔ mamai hwĩahwĩabii nɛɛ, ni akɛ kuŋtu wuɔfɔ kɛ kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kpakpa ni alo nii awo mli lɛ nɔŋŋ eko afee.

⁹ “Kɔlɔmɔ oniketɛi enyɔ ni oŋmala Israelbii lɛ agbɛii owo amɛnɔ.

¹⁰ Gbɛii lɛ amli ekpaa ahi tɛ kome nɔ, ni ekpaa ni eshwɛ lɛ hu ahi tɛ kome lɛ nɔ yɛ amɛfɔmɔ naa.

¹¹ Bɔ ni shikaŋaalɔ yeɔ sama ewoɔ wolonaasɔomɔnii nɔ lɛ, nakai okpɛ Yakob bii lɛ agbɛii lɛ owo tɛi enyɔ lɛ anɔ. Ni osere shika okɛbɔle tɛi lɛ koni amɛmamɔ mli.

¹² Okɛ tɛi enyɔ nɛɛ amãmɔ efod lɛ he mamai hwĩahwĩabii ni baakã kɔŋ nɔ lɛ anɔ koni akɛkai Yakob bii lɛ. No hewɔ lɛ, be fɛɛ be ni Aaron aaaba Yehowa hiɛ lɛ, Israel akutsei lɛ agbɛii yɛ ekɔji enyɔ lɛ anɔ koni makai amɛ daa.

¹³ Seremɔ shika okɛbɔle tɛi lɛ koni amɛmamɔ mli,

¹⁴ ni okɛ shika ŋmiiŋmi afee kɔsɔŋkɔsɔi enyɔ ni agbɔ tamɔ kpãa koni okɛlalaa shika ni asere abɔle tɛi lɛ.”

Tsitsinɔhaa nii lɛ

¹⁵ “Okɛ ŋaa afee tsitsinɔhaanii lɛ ohã osɔfonukpa lɛ, ni ekɛtao Nyɔŋmɔ suɔmɔnaanii ele. Nibii ni okɛfee efod lɛ okɛ no nɔŋŋ eko afee tsitsinɔhaa nii lɛ: kuŋtu wuɔfɔ kɛ kuŋtu bluu kɛ kuŋtu afaseo kɛ kuŋtu tsuru fɔɔ kɛ klala kpakpa.

¹⁶ Ofee lɛ ni adɔ mli enyɔ afɔ̃ nɔ, ni ekɛlɛ kɛ elɛɛmɔ aye egbɔ: ekɛlɛ afee klakate kome kɛ elɛɛmɔ hu klakate kome.

¹⁷ Oto tɛi klɛmpɛi ejwɛ omamɔ tsitsinɔhaanii lɛ nɔ. Klɛŋklɛŋ klɛmpɛ lɛ mli tɛi afee ojarawatɛi ni atsɛɔ amɛ rubi kɛ topasiɔn kɛ garneto lɛ.

¹⁸ Klɛmpɛ ni ji enyɔ lɛ mli tɛi lɛ afee smaragdo kɛ safiro kɛ daiamɔnd.

¹⁹ Klɛmpɛ ni ji etɛ̃ lɛ mli ojarawatɛi lɛ afee tekwais kɛ kalkedɔn kɛ amɛtisto,

²⁰ ni klɛmpɛ ni ji ejwɛ lɛ mli tɛi lɛ afee berilo kɛ onike kɛ yaspi.

²¹ Tɛi lɛ ayibɔ baafee nyɔŋma kɛ enyɔ, ni amɛkɛ Yakob bihii lɛ agbɛii nyɔŋma kɛ enyɔ lɛ anyiɛ yɛ amɛfɔmɔ naa, koni tɛi lɛ adamɔ shi ahã Israel akutsei nyɔŋma kɛ enyɔ lɛ. Akpɛ gbɛii lɛ tamɔ ayeɔ sama awoɔ wolonaasɔomɔ nii nɔ lɛ, tɛ fɛɛ tɛ kɛ egbɛi yɛ Israel akutsei lɛ anaa.

²² Okɛ shika ŋmiiŋmi afee tsitsinɔhaa nii lɛ he kɔsɔŋkɔsɔi ni agbɔ tamɔ kpãa.

²³ Ofee shika gai enyɔ okɛwo tsitsinɔhaanii lɛ yiteŋgbɛ koji enyɔ lɛ.

²⁴ Okɛ shika kɔsɔŋkɔsɔi enyɔ ni agbɔ tamɔ kpãa lɛ alala gai enyɔ lɛ ni yɔɔ tsitsinɔhaanii lɛ koji lɛ.

²⁵ Kɔsɔŋkɔsɔi enyɔ ni agbɔ tamɔ kpãa lɛ anaabui enyɔ ni eshwɛ lɛ, okɛlala shika ni asere kɛbɔle tɛi enyɔ lɛ shishi lɛ amli, koni okɛŋmɔlɔ tɛi lɛ omɔmɔ efod lɛ he mamai hwĩahwĩabii lɛ ni kãa kɔŋ nɔ lɛ yɛ hiɛgbɛ.

²⁶ Ofee shika gai enyɔ owo tsitsinɔhaa nii lɛ afã kome ni adɔ awo shishigbɛ koni ekã efod lɛ koji enyɔ lɛ anɔ.

²⁷ Ni asaŋ ofee gai enyɔ hu ni okɛmamɔ efod lɛ he osɛŋ mamai hwĩahwĩabii ni kãa kɔŋ nɔ lɛ naa, yɛ amɛshishigbɛ tsamɔhe yɛ efod lɛ mlifii nɔ lɛ ŋwɛi.

²⁸ Akɛ kpãa bluu aŋmɔlɔ tsitsinɔhaa nii lɛ he gai lɛ akpɛtɛ efod lɛ he gai lɛ, koni tsitsinɔhaanii lɛ akã efod lɛ mlifiinii lɛ nɔ, koni ekaje he.

²⁹ “No hewɔ lɛ, kɛji Aaron miiba He Krɔŋkrɔŋ lɛ, ekɛ Israel akutsei lɛ agbɛii ni aŋmala yɛ tsitsinɔhaanii lɛ nɔ lɛ miiba mi, Yehowa, mihiɛ koni makai amɛ daa.

³⁰ Ni okɛ Urim kɛ Turim lɛ awo tsitsinɔhaanii lɛ mli, bɔ ni afee ni amɛhi Aaron tsui nɔ kɛji eeba mihiɛ krɔŋkrɔŋ lɛ, koni Aaron anyɛ ale miyiŋtoo yɛ Israelbii lɛ ahe be fɛɛ be.”

Osɔfoi ahewulamɔ nibii krokomɛi

³¹ “Okɛ kuŋtu bluu sɔŋŋ akpɛ efod lɛ shishi atade yuu lɛ.

³² Ajie kuɛ awo atade lɛ he, ni akɛ mama ni alo abaŋ kuɛ lɛ naa kɛkpe koni ekagba.

³³ Okɛ kuŋtu bluu kɛ kuŋtu afaseo kɛ kuŋtu tsuru fɔɔ afee kpɔbii kokrobii kɛbɔle atade lɛ naamuu lɛ, kɛkpe, ni shika ŋmɛji atsotsoro kpɔbii lɛ ateiaŋ kɛkpe nɛkɛ:

³⁴ shika ŋmɛlɛ kome kɛ kpɔ kokroo kome kɛbɔle atade yuu lɛ naamuu lɛ kɛkpe.

³⁵ Atade nɛɛ Aaron awo ni ekɛsɔ̃mɔ akɛ osɔfo koni kɛ eeba mi, Yehowa, mihiɛ yɛ He Krɔŋkrɔŋ lɛ jio, eeje kpo yɛ jɛi jio, anu ŋmɛji lɛ agbɛɛmɔ koni ekagbo.

³⁶ “Otswia shika ŋmiiŋmi fɛtɛfɛtɛ, ni oŋma yɛ nɔ, tamɔ nii ni aŋma yɛ wolonaasɔomɔ nɔ nɔ, akɛ, ‘Afee lɛ krɔŋkrɔŋ ahã Yehowa.’

³⁷ Okɛ shika ni atswia fɛtɛfɛtɛ nɛɛ akpɛtɛ mama bluu nɔ, ni okɛfi osɔfonukpa fai lɛ ni eta fai lɛ hiɛ.

³⁸ Nii nɛɛ ahi Aaron hiɛnaa tuuŋtu koni tɔ̃mɔi fɛɛ ni Israelbii lɛ etɔ̃ yɛ nikee lɛ hãmɔ mli lɛ akã Aaron nɔ.

³⁹ Ni okɛ kpãa yɛŋ futafuta alo flaka lɛ, ni okɛ klala fɛɛfɛo akpɛ fai lɛ, ni okɛ abui alo nii owo mlifiinii lɛ mli.

⁴⁰ “Aaron bihii lɛ hu, okpɛ flakai kɛ mlifiinii kɛ faii ohã amɛ. Ofee nibii nɛɛ ni efee nyam kɛ fɛo.

⁴¹ Okɛ nibii nɛɛ awula onyɛmi Aaron kɛ ebihii lɛ hu ofata ehe, ni ofɔ amɛ mu, ni owo amɛ osɔfo, ni otsuu amɛhe koni amɛye osɔfo amɛhã mi.

⁴² Okpɛ klala tswakoto ohã amɛ koni amɛwo kɛkete amɛyayaiaŋ kɛjɛ hɛ kɛyashi shuɔ.

⁴³ Aaron kɛ ebihii lɛ awo tswakoto nɛɛ kɛji amɛmiiba Kpee Buu lɛ mli aloo kɛ amɛmiibɛŋkɛ afɔleshãa latɛ lɛ he kɛbasɔ̃mɔ yɛ Kpee Buu Krɔŋkrɔŋ lɛ mli koni amɛkaloo musu ni amɛgboi. Enɛ atsɔ̃ akpɔ ni kã shi kɛmiiya naanɔ hã Aaron kɛ eshwiei ni baaba yɛ esɛɛ lɛ.”