2 Mose 24 - ŊMALƐ KRƆŊKRƆŊ LƐ

Asɔo Kpãŋmɔ lɛ naa

¹ Ni Yehowa kɛɛ Mose akɛ, “Bo kɛ Aaron kɛ Nadab kɛ Abihu kɛ Israel onukpai lɛ ateŋ mɛi nyɔŋmai kpawo akwɔ gɔŋ lɛ kɛba miŋɔɔ koni nyɛbaja yɛ sɛɛ flɛŋŋ.

² Mose, okome pɛ otsi obɛŋkɛ Yehowa; mɛi ni eshwɛ lɛ akatsi amɛbɛŋkɛ, ni maŋbii lɛ hu kɛ bo akakwɔ kɛmiiba.”

³ Mose ba ni ebajaje Yehowa wiemɔi lɛ kɛ akpɔi lɛ fɛɛ etsɔ̃ɔ maŋ lɛ. Ni maŋ lɛ fɛɛ here nɔ kɛ gbee kome amɛkɛɛ, “Wiemɔi fɛɛ ni Yehowa ewie lɛ wɔɔye nɔ.”

⁴ Mose ŋmala Yehowa wiemɔi lɛ fɛɛ eshwie shi. Kɛkɛ ni ete shi leebi maŋkpa, ni ema afɔleshãa latɛ yɛ gɔŋ lɛ shishi, ni ehole tɛi nyɔŋma kɛ enyɔ edamɔ shi yɛ Israel akutsei nyɔŋma kɛ enyɔ lɛ anaa.

⁵ Ni etsu Israelbii lɛ ateŋ oblahii komɛi, ni amɛkɛ tsina hii yashã afɔle kɛ shidaa afɔle amɛhã Yehowa.

⁶ Mose kɛ lá lɛ fã wo lalakãi amli, ni lá lɛ fã ni shwɛ lɛ efɔ̃ eshwie afɔleshãa latɛ lɛ he.

⁷ Agbɛnɛ ekɔ kpãŋmɔ wolo lɛ, ni ekane yɛ maŋbii lɛ atoiŋ. Kɛkɛ ni maŋbii lɛ kɛɛ akɛ, “Nii fɛɛ ni Yehowa ekɛɛ lɛ wɔɔfee, ni wɔɔbo lɛ toi.”

⁸ Enɛ sɛɛ lɛ Mose wo lá lɛ, ni ekɛshwã maŋbii lɛ anɔ, ni ekɛɛ amɛ akɛ, “Naa, kpãŋmɔ ni Yehowa kɛ nyɛ ekpãŋ yɛ nɛkɛ wiemɔi nɛɛ fɛɛ he lɛ nɔ lá nɛ.”

⁹ Kɛkɛ ni Mose kɛ Aaron kɛ Nadab kɛ Abihu kɛ Israel onukpai nyɔŋmai kpawo lɛ kwɔ gɔŋ lɛ kɛtee,

¹⁰ ni amɛyana Israel Nyɔŋmɔ lɛ. Amɛna ni enanemaahei lɛ efee tamɔ he ko ni akɛ safiro tɛ eka; safiro tɛ nɛɛ mlitsemɔ lɛ enɔ bɛ shikpɔŋ nɛɛ nɔ.

¹¹ Nyɔŋmɔ efeee Israel onukpai nɛɛ nɔ fɔŋ ko, shi amɛna Nyɔŋmɔ kɛ amɛhiŋmɛi, ni amɛye nii ni amɛnu nɔ ko.

Mose yɛ Sinai Gɔŋ lɛ nɔ

¹² Ni Yehowa kɛɛ Mose akɛ, “Kwɔɔ kɛba miŋɔɔ yɛ gɔŋ lɛ nɔ ni obamɛ, ni mikɛ tɛi tɛtɛrɛbii ni maŋmala mlai lɛ kɛ kitãi lɛ yɛ nɔ lɛ baahã bo, ni okɛtsɔ̃ɔ maŋ lɛ nii.”

¹³ Kɛkɛ ni Mose kɛ etsulɔ Yoshua te shi, ni Mose kwɔ kɛtee Nyɔŋmɔ gɔŋ lɛ nɔ.

¹⁴ Shi ekɛɛ maŋ onukpai lɛ akɛ, “Nyɛhia biɛ nyɛmɛa wɔ kɛyashi beyinɔ ni wɔɔku wɔsɛɛ kɛba. Aaron kɛ Hur kɛ nyɛ yɛ biɛ. Kɛji mɔ ko hiɛ sane ko lɛ akɛyahã amɛ.”

¹⁵ Kɛkɛ ni agbɛnɛ Mose kwɔ gɔŋ lɛ kɛtee eyiteŋ, ni atatu lɛ baha gɔŋ lɛ nɔ.

¹⁶ Ni Yehowa anunyam la lɛ kpeleke shi kɛba Sinai gɔŋ lɛ nɔ. Atatu lɛ ye gbii ekpaa ni eha gɔŋ lɛ nɔ, ni gbi ni ji kpawo lɛ Yehowa jɛ atatu lɛ mli etsɛ Mose.

¹⁷ Yehowa anunyam lɛ, kɛji Israelbii lɛ miikwɛ lɛ, amɛnaa lɛ yɛ gɔŋ lɛ yiteŋ tamɔ la grigri ni kpãtãa nii ahiɛ.

¹⁸ Mose kwɔ gɔŋ lɛ, ni ebote atatu lɛ mli. Eye nyɔɔŋnyɔɔŋ kɛ shwaneshwane gbii nyɔŋmai ejwɛ yɛ gɔŋ lɛ nɔ.