2 Mose 23 - ŊMALƐ KRƆŊKRƆŊ LƐ

Jalɛ saneyeli

¹ “Kaawie nɔ ni bɛ mli. Kaafi gbɔmɔ fɔŋ sɛɛ kɛmiiye kutumpɔo odase.

² Kaanyiɛ mɛi ni yi fa sɛɛ kɛyafee efɔŋ, ni kaanyiɛ nɔ ni mɛi pii kɛɔ sɛɛ ni okɛɛ nɔ ko ni aaahã atsɔ sane hiɛ abu shi,

³ asaŋ kaasaa ohiafo sane he ohã lɛ yɛ saneyeli mli.

⁴ “Kɛji ona ohenyɛlɔ tsina loo teji ni edu gbɛ lɛ kplamɔ lɛ obahã lɛ.

⁵ Kɛ oyanina mɔ ni kɛ bo yeee kɛ eteji ni teji lɛ jatsu tsii fe lɛ lɛ, kwɛmɔ ni okaho amɛhe otee, shi moŋ ye obua nɔtsɛ lɛ koni awo kooloo lɛ nɔ adamɔ shi.

⁶ “Kaatsɔ̃ ohiafo sane hiɛ obu shi yɛ saneyeli mli.

⁷ Kaafo sane ofɔ̃ mɔ nɔ, ni kaagbe jalɔ kɛ mɔ ni he bɛ sane ko mli ejaakɛ mihaŋ efɔŋfeelɔ aye ehe kɔkɔɔkɔ.

⁸ Kaahe nyɔɔŋnii ejaakɛ nyɔɔŋnii shwilaa nɔkwɛlɔ, ni efiteɔ mɔ ni sane ja sane.

⁹ “Nyɛkawaa gbɔ yi, akɛ ni nyɛle bɔ ni gbɔ tsui nuɔ nii ahe ehãa lɛ, ejaakɛ nyɛ hu nyɛyatsɔ̃mɔ gbɔi yɛ Ijipt dã.”

Afi ni ji kpawo lɛ kɛ gbi ni ji kpawo lɛ

¹⁰ “Ahu shikpɔŋ lɛ nɔ, ni akpa enɔ nibaanii lɛ kɛyashi afii ekpaa;

¹¹ shi afi ni ji kpawo lɛ nɔ lɛ ahã shikpɔŋ lɛ ajɔɔ ehe ni ekã shi efolo koni omaŋ lɛ mli ohiafoi lɛ ana enɔ nii amɛkɔlɔ amɛye, ni nɔ ni aaashwɛ lɛ ŋaŋ kooloi hu ana aye. Nakai nɔŋŋ ofee owain trom kɛ omutso trom.

¹² “Otsu nii gbi ekpaa, shi gbi ni ji kpawo lɛ okɛjɔɔ ohe, bɔ ni afee ni otsina kɛ oteji ajɔɔ amɛhe, ni nyɔŋ yoo bi kɛ ogbɔ awo amɛtsui.

¹³ “Nibii fɛɛ ni mikɛɛ nyɛ lɛ nyɛyea nɔ. Nyɛkatsĩa nyɔŋmɔi krokomɛi agbɛii ata, akanu yɛ nyɛnaa tete.”

Gbii juji etɛ̃ lɛ

¹⁴ “Daa afi lɛ nyɛyea gbii juji etɛ̃ nyɛhãa mi.

¹⁵ Nyɛyea Akpiti Gbijurɔ lɛ. Bɔ ni miwo nyɛ ehe kitã lɛ, nyɛyea aboloo ni akɛ mã akpiti shã. Nyɛyea lɛ gbii kpawo yɛ be ni ato lɛ, ni ji Abib nyɔɔŋ lɛ nɔ, ejaakɛ no nɔ nyɛshi Ijipt shikpɔŋ lɛ nɔ. No be lɛ mli lɛ mɔ ko akaba mi jamɔ ni ehiɛɛɛ edɛŋ afɔle.

¹⁶ “Nyɛyea Nikpamɔ Gbijurɔ lɛ ni ji ŋmɔshinii lɛ mli klɛŋklɛŋ yibii agbijurɔ lɛ; ni nyɛyea Ŋmaa naabuamɔ kɛtoo Gbijurɔ lɛ yɛ afi lɛ naagbee mli, be ni nyɛbuaa ŋmɔshi nii anaa nyɛtoɔ lɛ.

¹⁷ Daa afi lɛ nyɛteŋ nuu fɛɛ nuu abaja Nuŋtsɔ Nyɔŋmɔ lɛ shii etɛ̃ yɛ nɛkɛ gbii juji etɛ̃ nɛɛ anɔ.

¹⁸ “Kooloo ni akɛbaashã afɔle ahã mi lɛ, nyɛkɛ masha aboloo akafataa he; ni kooloo ni akɛshã afɔle ahã mi lɛ, nyɛkahãa je miitsɛre emli fɔ lɛ nɔ.

¹⁹ “Klɛŋklɛŋ ŋmɔshinii ni nyɛbaakpa lɛ nyɛkɛbaa Yehowa, nyɛNyɔŋmɔ lɛ, we lɛ. Akahoo toobi kɛ lɛ nɔŋŋ enyɛ fufɔ mli nu.”

Shiwoi kɛ akpɔi

²⁰ “Naa, miwo bɔfo gbɛ ni enyiɛ nyɛhiɛ koni ebaa nyɛyi yɛ gbɛteŋ koni ekɛ nyɛ ayashɛ he ni misaa mito lɛ.

²¹ Nyɛkwɛa ni ahia yɛ egbɛfaŋ, ni nyɛyea ewiemɔ nɔ. Nyɛkatsea ehiɛ atua; ekɛ ewiemɔ lɛ nɔtɔmɔ ekeŋ nyɛ, ejaakɛ ehiɛ mihewalɛ.

²² Shi kɛji nyɛye egbee nɔ pɛpɛɛpɛ, ni nyɛfee nɔ ni mikɛɛ nyɛ lɛ fɛɛ lɛ, no lɛ matsɔ̃ henyɛlɔ mahã nyɛhenyɛlɔi, ni mikɛ mɛi ni kɛ nyɛ tswaa baatswa.

²³ Mibɔfo lɛ aaanyiɛ nyɛhiɛ kɛyanina Amorbii lɛ kɛ Hitbii lɛ kɛ Perizbii lɛ kɛ Kanaanbii lɛ kɛ Hivbii lɛ kɛ Yebusbii lɛ, ni makpãtã amɛhiɛ butubutu.

²⁴ Nyɛkajaa ni nyɛkasɔ̃mɔa amɛnyɔŋmɔi lɛ, asaŋ nyɛkakasea gbɔmɛi nɛɛ anifeemɔ nii hu, shi moŋ nyɛbutua amɛnyɔŋmɔi lɛ, ni nyɛkumɔa amɛshiui lɛ butubutu nyɛshwiea shi.

²⁵ Kɛji nyɛsɔ̃mɔ mi, Yehowa nyɛNyɔŋmɔ lɛ, madro nyɛ niyenii kɛ nu, ni makɔ hela yɛ nyɛteŋ mashɛ mafɔ̃ kwraa.

²⁶ Yoo sharakeŋ, ni anaŋ yoo kene yɛ nyɛshikpɔŋ lɛ nɔ. Mahã nyɛwala sɛɛ atsɛ.

²⁷ “Mahã miheŋmiŋmi atsɔ̃ nyɛhiɛ amɔmɔ maji lɛ fɛɛ dani nyɛaayanina amɛ, ni maŋ fɛɛ maŋ nɔ ni nyɛaashɛ lɛ aaajija yɛ nyɛhiɛ.

²⁸ Matsu sosomootii kɛaatsɔ̃ nyɛhiɛ. Mashwie Hivbii lɛ kɛ Kanaanbii lɛ kɛ Hitbii lɛ yɛ nyɛhiɛ.

²⁹ Shi moŋ mishwieŋ amɛ yɛ nyɛhiɛ yɛ afi kome nɔ koni shikpɔŋ lɛ akabatsɔ̃ amaŋfɔ̃, koni ŋaŋ kooloi ayi bafa yɛ nɔ wo nyɛ.

³⁰ Fiofio mibashwie amɛ yɛ nyɛhiɛ kɛyaashi beyinɔ ni nyɛyi aaafa, ni nyɛaaŋɔ shikpɔŋ lɛ.

³¹ Mafo husu mahã nyɛ kɛjɛ Ŋshɔ Tsuru lɛ naa kɛyashi Filistibii lɛ aŋshɔ lɛ naa, agbɛnɛ kɛjɛ shiaŋa lɛ nɔ kɛyashi Eufrate Faa lɛ naa, ejaakɛ mahã nyɛye shikpɔŋ lɛ nɔ bii lɛ anɔ kunim koni nyɛshwie amɛ.

³² Amɛ gbɔmɛi lɛ jio, amɛnyɔŋmɔi lɛ jio, nyɛkɛ amɛ akakpãŋa kpãŋmɔ ko.

³³ Nyɛkahãa amɛhia shikpɔŋ lɛ nɔ ni amɛmiihã nyɛfee esha nyɛshi mi. Ejaakɛ kɛji nyɛsɔ̃mɔ amɛnyɔŋmɔi lɛ, bɔ fɛɛ bɔ ni fee lɛ eeetsɔ̃ tsɔne ehã nyɛ.”