2 Mose 21 - ŊMALƐ KRƆŊKRƆŊ LƐ

Bɔ ni ahiɛ nyɔji ahã

¹ “Agbɛnɛ okɛ mlai nɛɛ ashwie Israelbii lɛ ahiɛ.

² Kɛji ohe Hebrinyo akɛ nyɔŋ lɛ esɔ̃mɔ afii ekpaa, ni afi ni ji kpawo lɛ nɔ lɛ aŋmɛɛ ehe ni eye ehe tswaa.

³ Kɛji ekome eba lɛ, ekome nɔŋŋ eya. Shi kɛji ekɛ eŋa ba lɛ, no lɛ eŋa lɛ kɛ lɛ aya.

⁴ Kɛji enuŋtsɔ lɛ ehã lɛ ŋa, ni ekɛ yoo lɛ efɔ bihii loo biyei lɛ, no lɛ yoo lɛ kɛ ebii lɛ etsɔ̃ enuŋtsɔ lɛ nɔ, ni nuu lɛ kome too aya.

⁵ Shi kɛji nyɔŋ lɛ gba mli kpoo ekɛɛ akɛ, ‘Miisumɔ minuŋtsɔ lɛ kɛ miŋa kɛ mibii lɛ, ni misumɔɔɔ akɛ mashi amɛ maya mayaye mihe lɛ,’

⁶ no lɛ enuŋtsɔ lɛ kɛ lɛ aya Nyɔŋmɔ hiɛ, ni ehã edamɔ jamɔhe lɛ shinaa lɛ naa loo shinaatso lɛ he, ni enuŋtsɔ lɛ kɛ fitii agbu nyɔŋ lɛ toi, ni nyɔŋ lɛ asɔ̃mɔ enuŋtsɔ lɛ ewala gbii abɔ fɛɛ.

⁷ “Kɛji nuu ko hɔ̃ɔ ebiyoo akɛ nyɔŋ lɛ, biyoo nɛɛ akatsɔ̃ gbɛ nɔ ni hii nyɔji tsɔ̃ɔ yeɔ amɛhe lɛ nɔ eye ehe.

⁸ Kɛ nyɔŋ yoo nɛɛ esaaa enuŋtsɔ lɛ hiɛ akɛ eeeŋɔ lɛ efee eŋa lɛ, no lɛ ehã abakpɔ̃ lɛ. Nuŋtsɔ lɛ bɛ hegbɛ ni ehɔ̃ɔ lɛ ehãa maŋsɛɛnyo, ejaakɛ no lɛ eku eshiwoo mli.

⁹ Kɛji nuŋtsɔ lɛ kɛ nyɔŋ yoo lɛ hã ebinuu gbãlã lɛ, nuŋtsɔ lɛ kɛ nyɔŋ yoo nɛɛ ahi shi akɛ ebiyoo.

¹⁰ Kɛji nuŋtsɔ lɛ yaŋɔ yoo ni ji enyɔ ebafata nyɔŋyoo lɛ he lɛ, no akahã etse nyɔŋyoo lɛ daaŋ ŋmaa kɛ ehebo kɛ egblãshihilɛ mli gbɛnaa nii nɔ.

¹¹ Kɛji nuŋtsɔ lɛ tsuuu nibii etɛ̃ nɛɛ ahe ehãaa nyɔŋ yoo lɛ, no lɛ nyɔŋ yoo lɛ aye ehe tswaa, ni nuŋtsɔ lɛ bɛ hegbɛ akɛ aheɔ eyi shika ko.”

Awuiyeli he mlai

¹² “Mɔ ni aaatswa enyɛmi gbɔmɔ nɔ, ni mɔ lɛ aaagbo lɛ, lɛ hu agbe lɛ.

¹³ Kɛjeee ka eyawo lɛ, shi osharã naa ni, enine kpa yɛ mɔ lɛ nɔ lɛ, no lɛ ejo foi eyaba abo yɛ he ko ni mato mahã nyɛ.

¹⁴ Shi kɛji mɔ ko to ŋaa fɔŋ yɛ enyɛmi gbɔmɔ he, ni eje gbɛ eyatua lɛ, ni egbe lɛ, ni no sɛɛ lɛ eyaba abo yɛ mifɔleshãa latɛ lɛ naa tete po, ajie lɛ kɛje jɛi ni ayagbe lɛ.

¹⁵ “Mɔ fɛɛ mɔ ni aaagba etsɛ loo enyɛ ma lɛ agbe lɛ.

¹⁶ “Mɔ fɛɛ mɔ ni aaaju gbɔmɔ lɛ, eyahɔɔ lɛ jio, eto lɛ akɛ nyɔŋ ehã ehe jio, agbe lɛ.

¹⁷ “Mɔ fɛɛ mɔ ni aaalomɔ etsɛ loo enyɛ lɛ agbe lɛ.

¹⁸ “Kɛji hii miinɔ ni mɔ kome tswa enaanyo lɛ tɛ aloo ema lɛ atswɛrɛ, ni mɔ lɛ tsɔɔɔ mli gbooo, shi efee lɛ hela kɛkã shi lɛ,

¹⁹ kɛji helatsɛ lɛ na ete shi ekoŋŋ, ni emɔ tso mli enyiɛ kɛje kpo lɛ, mɔ ni tswa lɛ nɔ lɛ eye ehe, shi moŋ ewo be ni helatsɛ lɛ efite lɛ he nyɔmɔ, ni ekwɛ koni atsa helatsɛ lɛ ni ehe atã kwrakwra.

²⁰ “Kɛji mɔ ko kɛ tso tswa enyɔŋ nuu loo nyɔŋ yoo, ni nyɔŋ lɛ nyɔ yɛ enine naa lɛ, ja atɔ nyɔŋ lɛ he owele yɛ nuŋtsɔ lɛ nɔ.

²¹ Shi kɛji je tsɛre nyɔŋ lɛ nɔ gbi kome loo gbii enyɔ lɛ, akatɔ owele yɛ nuŋtsɔ lɛ nɔ, ejaakɛ nyɔŋ lɛ ni egbo lɛ, lɛ nuŋtsɔ lɛ, eshika ni elaaje ni.

²² “Kɛji hii miinɔ ni amɛkɛ nɔmɔ lɛ yapila yoohɔlɔ, ni emusu lɛ fite, shi eyeee lɛ awui kroko kɛfataaa he lɛ, agbe nuu mɔ ni pila yoohɔlɔ lɛ shika gbele. Yoo wu lɛ aaatsɔ̃ɔ nyɔmɔ ni ekɛfɔ̃ɔ nuu lɛ nɔ nɛ, shi moŋ bɔ ni saneyelɔi lɛ aaatsɔ̃ɔ lɛ nakai nuu lɛ awo.

²³ Shi kɛji sane fɔŋ ba yɛ sɛɛ lɛ, no lɛ oweletɔɔ lɛ afee atoŋ kɛ atoŋ, no ji akɛ wala atse wala,

²⁴ ni akɛ hiŋmɛi atse hiŋmɛi, ni akɛ nyanyɔŋ atse nyanyɔŋ, akɛ nane atse nane,

²⁵ akɛ la fala atse la fala, akɛ pilamɔ atse pilamɔ, ni akɛ kpelebi naa fala atse kpelebi naa fala.

²⁶ “Kɛji mɔ ko tswa enyɔŋ nuu loo nyɔŋ yoo hiŋmɛi nɔ, ni hiŋmɛi lɛ fite lɛ, ehã nyɔŋ lɛ aye ehe tswaa yɛ ehiŋmɛi lɛ hewɔ.

²⁷ Kɛji nuŋtsɔ lɛ fã enyɔŋ nuu loo nyɔŋ yoo nyanyɔŋ lɛ, eŋmɛɛ nyɔŋ lɛ he koni eyaye ehe tswaa yɛ enyanyɔŋ lɛ hewɔ.”

Kooloi anuŋtsɔmɛi asɔ̃

²⁸ “Kɛji tsina shi nuu loo yoo, ni mɔ lɛ gbo lɛ, atswia tsina lɛ tɛ ni agbe lɛ, ni akaye eloo lɛ, shi tsinatsɛ lɛ aye ehe.

²⁹ Shi kɛji tsina lɛ fɔɔ mɔ shimɔ kɛjɛ jeeŋmɔ, ni abɔ nɔtsɛ lɛ kɔkɔ yɛ he, shi fɛɛ sɛɛ lɛ ewooo ekooloo lɛ tsuŋ, ni eyagbe gbɔmɔ lɛ, atswia tsina lɛ tɛ, ni tsinatsɛ lɛ hu agbe lɛ.

³⁰ Shi kɛji aahe tsinatsɛ lɛ kpãtãmɔ nii lɛ, no lɛ bɔ fɛɛ bɔ ni aheɔ lɛ lɛ, ewo koni ekɛkpɔ̃ esusuma.

³¹ Kɛji tsina lɛ yashi mɔ ko binuu loo biyoo lɛ akɛ tsinatsɛ lɛ aye yɛ mla kome nɛɛ nɔŋŋ naa.

³² Kɛji tsina lɛ yashi nyɔŋ nuu loo nyɔŋ yoo lɛ tsinatsɛ lɛ ahã nyɔŋ lɛ nuŋtsɔ lɛ jwiɛtɛi shekel nyɔŋmai etɛ̃, ni no sɛɛ hu lɛ atswia tsina lɛ tɛ.

³³ “Kɛji mɔ ko shi bu naa eŋmɛ aloo eyatsa bu ni etsiii nɔ, ni tsina loo teji ko yagbee mli lɛ,

³⁴ mɔ ni tsa bu lɛ awo koolootsɛ lɛ ekooloo lɛ he nyɔmɔ koni bu tsɛ lɛ aŋɔ kooloo gbonyo lɛ.

³⁵ Kɛji mɔ ko tsina pila enaanyo tsina, ni kooloo lɛ gbo lɛ, mɛi enyɔ lɛ ahɔ̃ɔ tsina hiɛkãalɔ lɛ koni amɛja shika lɛ, ni kooloo ni egbo lɛ hu amɛja.

³⁶ Shi kɛji ale ato akɛ tsina lɛ fɔɔ mɔshimɔ kɛjɛ jeeŋmɔ, shi tsinatsɛ lɛ wooo tsina lɛ tsuŋ lɛ, no lɛ ekɛ tsina ato mɔ lɛ tsina lɛ najiaŋ ehã lɛ koni mɔ ni tsina yashi lɛ aŋɔ tsina ni egbo lɛ.”