2 Mose 20 - ŊMALƐ KRƆŊKRƆŊ LƐ

Kitãi Nyɔŋma lɛ

¹ Ni Nyɔŋmɔ wie wiemɔi nɛɛ fɛɛ ekɛɛ:

² “Mi ji Yehowa, oNyɔŋmɔ lɛ, ni mi mijie bo yɛ nyɔŋyeli mli kɛjɛ Ijipt shikpɔŋ lɛ nɔ lɛ.

³ “Kaana nyɔŋmɔi krokomɛi yɛ misɛɛ.

⁴ “Kaafee amãgã ko loo nɔ ko ni tamɔ nii ni yɔɔ ŋwɛi loo nii ni yɔɔ shikpɔŋ lɛ nɔ loo nii ni yɔɔ nu mli yɛ shikpɔŋ lɛ shishi lɛ ohã ohe.

⁵ “Kaaja amɛ, ni kaasɔ̃mɔ amɛ hu, ejaakɛ mi Yehowa, oNyɔŋmɔ lɛ, Nyɔŋmɔ ni yeɔ awuŋã ji mi, ni miwoɔ tsɛmɛi kɛ bii anyɔmɔ yɛ tsɛmɛi lɛ atɔ̃mɔi ahewɔ kɛyashiɔ yinɔ ni ji etɛ̃ kɛ yinɔ ni ji ejwɛ tete ni nyɛɔ mi lɛ nɔ.

⁶ “Shi mɛi akpei abɔ fɛɛ ni sumɔɔ mi, ni amɛyeɔ mikitãi anɔ lɛ, misumɔɔ amɛ kɛ suɔmɔ ni tsakeee, ni minaa amɛ mɔbɔ.

⁷ “Kaahiɛ Yehowa, oNyɔŋmɔ lɛ, gbɛi mli yakayaka, ejaakɛ Yehowa ebuŋ mɔ ni tsɛɔ egbɛi yakayaka lɛ bem.

⁸ “Ohiɛ ahi hejɔɔmɔ gbi lɛ nɔ ni oye lɛ akɛ gbi krɔŋkrɔŋ.

⁹ Tsu nii gbii ekpaa ni ofee onii fɛɛ,

¹⁰ shi gbi ni ji kpawo lɛ, hejɔɔmɔ gbi ni hã Yehowa, oNyɔŋmɔ lɛ. No nɔ lɛ okatsu nɔ ko, bo jio, obinuu jio, obiyoo jio, owenuu jio, oweyoo jio, okooloo jio, ogbɔ ni ebato omaŋ jio.

¹¹ Ejaakɛ gbii ekpaa Yehowa kɛbɔ ŋwɛi kɛ shikpɔŋ kɛ ŋshɔ kɛ amɛmli nibii fɛɛ; ni gbi ni ji kpawo lɛ nɔ lɛ ejɔɔ ehe. No hewɔ ni Yehowa jɔɔ hejɔɔmɔ gbi lɛ, ni efee lɛ krɔŋkrɔŋ lɛ.

¹² “Wo otsɛ kɛ onyɛ koni owala sɛɛ atsɛ yɛ shikpɔŋ ni mi, Yehowa, oNyɔŋmɔ lɛ, kɛhãa bo lɛ nɔ.

¹³ “Kaagbe gbɔmɔ.

¹⁴ “Kaafite gbãlã.

¹⁵ “Kaaju.

¹⁶ “Kaaye amale odase yɛ onaanyo he.

¹⁷ “Ohiɛ akakɔ̃ onaanyo nɔ ko nɔ, eshĩa jio, eŋa jio, ewenuu jio, eweyoo jio, etsina jio, eteji jio, enɔ kroko jio, ohiɛ akakɔ̃ nɔ.”

Israelbii lɛ she gbeyei

¹⁸ Be ni Israelbii lɛ na bɔ ni ŋwɛi shimɔɔ, ni srawa gbalaa, ni tɛtɛrɛmantɛrɛ gbɛɔ, ni gɔŋ lɛ fãa lasu lɛ, amɛshe gbeyei, ni amɛkpokpo, ni amɛdamɔ sɛɛ flɛŋŋ.

¹⁹ Kɛkɛ ni amɛkɛɛ Mose akɛ, “Bo moŋ okɛ wɔ awie, ni wɔɔbo toi, shi kaahã Nyɔŋmɔ kɛ wɔ miiwie ni wɔbagboi.”

²⁰ Mose kɛɛ maŋ lɛ akɛ, “Nyɛkashea gbeyei, ejaakɛ kaa Nyɔŋmɔ ba nyɛ kaa, bɔ ni afee ni lɛ egbeyeishemɔ ahi nyɛmli daa koni nyɛkafee esha.”

²¹ Shi maŋ lɛ damɔ sɛɛ flɛŋŋ lolo; kɛkɛ ni Mose tsi ebɛŋkɛ duŋ kpii lɛ ni Nyɔŋmɔ yɔɔ mli lɛ.

Afɔleshãa latɛi ahe mlai

²² Yehowa kɛɛ Mose akɛ, “Kɛɛmɔ Israelbii lɛ akɛ, ‘Nyɛ diɛŋtsɛ nyɛna akɛ ŋwɛi mijɛ mikɛ nyɛ wie nɛɛ.

²³ Nyɛkafea mihenɔ jwiɛtɛi loo shika amãgãi; nyɛkafea eko eko nyɛhãa nyɛhe koni nyɛja amɛ nyɛfata mihe.

²⁴ Nyɛshɔ̃a su afɔleshãa latɛ nyɛhãa mi, ni no nɔ nyɛshãa afɔlei yɛ, shãa afɔlei kɛ shidaa afɔlei kɛ gwantɛŋi kɛ tsinai lɛ yɛ. He fɛɛ he ni mato mahã nyɛ akɛ aja mi yɛ lɛ, maba nyɛŋɔɔ yɛ jɛi ni majɔɔ nyɛ.

²⁵ Kɛji nyɛkɛ tɛ miima afɔleshãa latɛ nyɛhã mi lɛ, akɛ tɛ ni ako akama ejaakɛ ŋaa dade naa ni aaasa tɛ lɛ he pɛ ebule lɛ.

²⁶ Ni okafee atrakpoi owo afɔleshãa latɛ lɛ he koni akana oyayaiaŋ yɛ atrakpoi lɛ kwɔɔ mli.’ ”