2 Mose 2 - ŊMALƐ KRƆŊKRƆŊ LƐ

Mose fɔmɔ

¹ Be nɛɛ mli lɛ nuu ko ni jɛ Leviwe yaŋɔ Leviwe nɔŋŋ yoo ko.

² Yoo lɛ na musu, ni efɔ binuu. Ena akɛ abifao lɛ he yɛ fɛo, hewɔ lɛ ekɛ lɛ tee nyɔji etɛ̃.

³ Shi be ni eyanyɛɛɛ lɛ ekɛtee dɔŋŋ lɛ, etao adai kɛntɛŋ, ni ekɛ amã tsara he fɛɛ, ni ekɛ abifao lɛ ŋmɛ mli, ni eyashi lɛ ema glãi amli yɛ faa lɛ naa.

⁴ Belɛ abifao lɛ nyɛmiyoo damɔ sɛɛ flɛŋŋ eekwɛ nɔ ni aaaba enɔ.

⁵ Farao biyoo ba ehejuu yɛ faa lɛ naa, ni eweyei lɛ miishara shi yɛ faa lɛ toi. Kɛkɛ ni ehiŋmɛi gba kɛntɛŋ lɛ nɔ yɛ glãi lɛ ateŋ, ni etsu eweyei lɛ ateŋ mɔ kome ni eyawo kɛba.

⁶ Be ni Farao biyoo lɛ gbele naa lɛ, naa abifao kã mli ni eefo. Emusuŋ tsɔ̃ lɛ yɛ ehe, ni ekɛɛ, “Hebribii lɛ abihii lɛ eko nɛ.”

⁷ Kɛkɛ ni abifao lɛ nyɛmiyoo lɛ babi Farao biyoo lɛ akɛ, “Ani miyatsɛ Hebriyoo fufɔhãlɔ ko mibahã bo koni ehã lɛ fufɔ ehã bo lo?”

⁸ Farao biyoo lɛ to he ekɛɛ, “Hɛɛ! Yaa!” Gbekɛyoo lɛ tee ni eyatsɛ abifao lɛ nyɛ diɛŋtsɛ kɛba.

⁹ Ni Farao biyoo lɛ kɛɛ yoo ni ayatsɛ kɛba lɛ akɛ, “Hemɔ abifao nɛɛ koni oyakwɛ lɛ ohã mi, ni mawo bo nyɔmɔ.” Ehe abifao lɛ kɛtee ni eyakwɛ lɛ.

¹⁰ Be ni gbekɛ lɛ bada lɛ, yoo lɛ kɛ lɛ tee eyahã Farao biyoo lɛ, ni etsɔ̃ Farao biyoo bi. Ewo lɛ gbɛi akɛ Mose, ni ekɛɛ, “Ejaakɛ mijie lɛ kɛjɛ nu mli.”

Mose jo foi kɛtee Midian

¹¹ Mose bada. Gbi ko lɛ etee eyasara emaŋbii Hebribii lɛ, ni eyana nii ni ahãa amɛtsuɔ lɛ. Ehiŋmɛiŋ, ni Ijiptnyo ko tswa Mose nyɛmimɛi Hebribii lɛ eko nɔ.

¹² Mose kwɛ ehe biɛ kɛ biɛ, ni be ni enaaa mɔ ko lɛ, egbe Ijiptnyo lɛ, ni ekɛ lɛ tee shia mli.

¹³ Je tsɛre nɔ hu Mose tee eyasara enyɛmimɛi lɛ. Kɛkɛ lɛ naa Hebribii enyɔ ni miinɔ. Ebi mɔ ni eye sane fɔŋ lɛ akɛ, “Mɛni hewɔ ni oyiɔ onyɛmi Hebrinyo?”

¹⁴ Mɔ ni eye sane fɔŋ lɛ hã Mose hetoo akɛ, “Namɔ wo bo wɔnɔ lumɔ kɛ kojolɔ? Gbe otaoɔ ni ogbe mi tamɔ ogbe Ijiptnyo lɛ?” Kɛkɛ ni Mose tsui fã, ni ekɛɛ, “Ei, ana ale sane nɛɛ!”

^15-16 Be ni Farao nu nɛkɛ sane nɛɛ lɛ, etao Mose egbe. Shi Mose jo Farao naa foi kɛtee Midian shikpɔŋ lɛ nɔ, ni eyahi jɛi. Mose ta nubu ko naa, ni Yetro, ni ji Midian osɔfo lɛ, biyei kpawo lɛ ba jɛi koni amɛbasha nu amɛwo tsesei amli amɛhã amɛtsɛ toi lɛ ni amɛnu.

¹⁷ Shi tookwɛlɔi komɛi bashwie amɛ. Kɛkɛ ni Mose te shi ni efã oblayei lɛ ahe, ni ehã amɛtoi lɛ nu ehã amɛ.

¹⁸ Be ni oblayei lɛ ba amɛtsɛ ŋɔɔ lɛ, ebi amɛ akɛ, “Te fee tɛŋŋ ni nyɛba mra nɛkɛ ŋmɛnɛ lɛ?”

¹⁹ Amɛ jie naa akɛ, “Ijiptnyo ko bajie wɔ yɛ tookwɛlɔi lɛ adɛŋ, ni esaa esha nu tete ehã toi lɛ amɛnu.”

²⁰ Yetro bi ebiyei lɛ akɛ, “Ni nɛgbɛ nuu lɛ yɔɔ? Mɛɛ hewɔ nyɛshi lɛ? Nyɛyatsɛa lɛ kɛba koni ebaye nii.”

²¹ Mose kpɛlɛ̃, ni ekɛ Yetro hi shi. Yetro kɛ ebiyoo Zipora hã Mose gbãlã.

²² Zipora fɔ binuu, ni Mose wo lɛ Gershom ejaakɛ ekɛɛ, “Mibato gbɔ yɛ maŋsɛɛ shikpɔŋ nɔ.”

²³ Be kplaŋŋ sɛɛ lɛ Ijipt maŋtsɛ lɛ bagbo. Ni Israelbii lɛ dɔmɔ ŋtsɔi yɛ nyɔŋ ni ayeɔ amɛ lɛ hewɔ, ni amɛfo amɛtsɛ Nyɔŋmɔ.

²⁴ Nyɔŋmɔ nu amɛkɔmɔyeli lɛ, ni ekai kpãŋmɔ ni ekɛ Abraham kɛ Isak kɛ Yakob kpãŋ lɛ.

²⁵ Kɛkɛ ni ekwɛ nyɔŋ ni ayeɔ Israelbii lɛ, ni amɛsane bakã etsui nɔ.