2 Mose 19 - ŊMALƐ KRƆŊKRƆŊ LƐ

Israelbii lɛ yɛ Sinai Gɔŋ lɛ he

¹ Gbi ni Israelbii lɛ yiŋ kɛjɛ Ijipt shikpɔŋ lɛ nɔ lɛ, enɔ nyɔji etɛ̃ pɛpɛɛpɛ ni amɛyashɛ Sinai ŋa lɛ nɔ.

² Refidim ji he ni amɛfã kɛjɛ dani amɛyashɛ Sinai ŋa lɛ nɔ lɛ, ni amɛbato shi yɛ Sinai Gɔŋ lɛ hiɛ.

³ Kɛkɛ ni Mose kwɔ gɔŋ lɛ kɛtee Nyɔŋmɔ ŋɔɔ. Yehowa jɛ gɔŋ lɛ nɔ etsɛ Mose, ni ekɛɛ lɛ akɛ, “Kɛɛmɔ Yakob shwiei, ni ji Israelbii, lɛ akɛ,

⁴ ‘Nyɛ diɛŋtsɛ nyɛna nɔ ni mifee Ijiptbii lɛ, kɛ bɔ ni mihiɛ nyɛ kɛ hewalɛ tamɔ okropɔŋ, ni mikɛ nyɛ bashɛ miŋɔɔ yɛ biɛ nɛɛ lɛ.

⁵ No hewɔ lɛ, agbɛnɛ kɛji nyɛaabo mi toi, ni nyɛaaye mikpãŋmɔ lɛ nɔ lɛ, no lɛ nyɛaatsɔ̃ mi diɛŋtsɛ minɔ yɛ maji fɛɛ ateŋ; ejaakɛ je lɛ fɛɛ lɛ minɔ ni.

⁶ Mibafee nyɛ osɔfoi abladei, mibafee nyɛ maŋ krɔŋkrɔŋ. Nɔ ni okɛɛ Israelbii lɛ nɛ.’ ”

⁷ Mose ku esɛɛ eba, ni ebatsɛ maŋ onukpai lɛ, ni ekɛɛ amɛ nɔ ni Yehowa fã akɛ ekɛɛ amɛ lɛ.

⁸ Ni maŋ tso muu lɛ fɛɛ here nɔ shi kome amɛkɛɛ, “Nibii fɛɛ ni Yehowa ekɛɛ lɛ wɔɔfee.” Mose hã Yehowa le hetoo ni maŋ lɛ hã lɛ.

⁹ Yehowa kɛɛ Mose akɛ, “Miiba oŋɔɔ yɛ atatu kpii mli koni kɛ mi kɛ bo miiwie lɛ, maŋ lɛ anu ni amɛhe bo hu amɛye kɛya naanɔ.”

¹⁰ Yehowa kɛɛ Mose akɛ, “Yaa maŋbii lɛ aŋɔɔ, ni otsuu amɛhe ŋmɛnɛ kɛ wɔ ni ohã amɛfɔ amɛtadei ahe,

¹¹ ni amɛsaa amɛhe amɛto gbi ni ji etɛ̃ lɛ, ejaakɛ nakai gbi lɛ Yehowa baakpleke shi kɛba gɔŋ lɛ nɔ yɛ maŋ muu lɛ fɛɛ hiŋmɛiŋ.

¹² Foo akrabatsa okɛtsi maŋ lɛ gbɛ, ni obɔ amɛ kɔkɔ akɛ, ‘Nyɛkwɛa ni ahĩa koni nyɛkakwɔa gɔŋ lɛ, aloo ni nyɛtaa ehusu lɛ he.’ Mɔ fɛɛ mɔ ni aaata gɔŋ lɛ he lɛ gbe aaagbe lɛ.

¹³ Mɔ ko mɔ ko nine akata nakai gbɔmɔ lɛ he, shi atswia lɛ tɛ aloo atsɛ̃rɛ lɛ gãi. Kooloo ni jio, gbɔmɔ ni jio, akahã eyi na wala. Shi kɛji akpã tɛtɛrɛmantɛrɛ lɛ, ni esɛɛ tsɛ aahu lɛ, no dani amɛba gɔŋ lɛ he.”

¹⁴ Mose kpeleke shi kɛjɛ gɔŋ lɛ nɔ kɛba maŋ lɛ ŋɔɔ, ni etsuu maŋ lɛ he, ni amɛfɔfɔɔ amɛtadei ahe.

¹⁵ Ni Mose kɛɛ amɛ akɛ, “Nyɛsaa nyɛhe nyɛtoa hã, wɔ bɛ mli, wɔsɛɛ. Nuu akaya yoo masɛi.”

¹⁶ Gbi ni ji etɛ̃ lɛ leebi lɛ ŋwɛi shimɔ, ni srawa gbala ni atatu kpii ko baha gɔŋ lɛ nɔ; tɛtɛrɛmantɛrɛ ko gbɛɛ waa naakpa, ni mɛi ni yɔɔ maŋ lɛ shitoohe lɛ fɛɛ kpokpo.

¹⁷ Kɛkɛ ni Mose kɛ maŋ lɛ je kpo kɛjɛ shitoohe lɛ koni amɛkɛ Nyɔŋmɔ ayakpe, ni amɛyadamɔ gɔŋ lɛ shishi.

¹⁸ Sinai Gɔŋ muu lɛ fɛɛ miije lasu, ejaakɛ Yehowa ekpeleke shi kɛba gɔŋ lɛ nɔ yɛ la mli. Lasu lɛ fãa kɛyaa ŋwɛi tamɔ flɔnɔɔ mli lasu, ni gɔŋ muu lɛ fɛɛ hoso waa naakpa.

¹⁹ Be ni tɛtɛrɛmantɛrɛ lɛ yaa nɔ gbɛɔ waa lɛ, kɛkɛ ni Mose wie, ni Nyɔŋmɔ here lɛ nɔ kɛ ŋwɛi shiimɔ.

²⁰ Be ni Yehowa kpeleke shi kɛba Sinai Gɔŋ lɛ yiteŋ lɛ, etsɛ Mose akɛ eba gɔŋ lɛ yiteŋ; ni Mose tee.

²¹ Yehowa kɛɛ lɛ akɛ, “Kpelekemɔ shi ni oyakɛɛ maŋ lɛ kpɔ́kpɔ́ɔkpɔ́ akɛ amɛkatse mli kɛmiiba Yehowa ŋɔɔ amɛbakwɛ nɔ ni yaa nɔ, koni amɛteŋ mɛi pii miiplenee.

²² Asaŋ hã osɔfoi lɛ ni bɛŋkɛɔ Yehowa atsuu amɛhe koni Yehowa akakpãtã amɛhiɛ.”

²³ Mose kɛɛ Yehowa akɛ, “Maŋ lɛ nyɛŋ Sinai Gɔŋ lɛ nɔ aba ejaakɛ bo diɛŋtsɛ okpã owo wɔtoiŋ akɛ, ‘Nyɛfoa akrabatsa nyɛwoa gɔŋ lɛ he nyɛfea lɛ krɔŋkrɔŋ.’ ”

²⁴ Kɛkɛ ni Yehowa kɛɛ Mose akɛ, “Kpelekemɔ shi oya ni okɛ Aaron akwɔ kɛba, shi kaahã osɔfoi lɛ kɛ maŋbii lɛ miiteke akrabatsa lɛ kɛkwɔ gɔŋ lɛ kɛba mi, Yehowa, miŋɔɔ koni mikaplene amɛ.”

²⁵ Mose kpeleke shi kɛba maŋbii lɛ aŋɔɔ, ni ebakɛɛ amɛ.