2 Mose 18 - ŊMALƐ KRƆŊKRƆŊ LƐ

Yetro yasara Mose

¹ Yetro, Midian osɔfo lɛ ni ji Mose shaanuu lɛ nu nibii fɛɛ ni Nyɔŋmɔ efee ehã Mose kɛ emaŋ Israel lɛ he, no ji bɔ ni Yehowa jie Israel kɛjɛ Ijipt lɛ.

² Kɛkɛ ni Yetro, Mose shaanuu lɛ, yiŋ etee Mose ŋɔɔ. Eŋɔ Zipora, Mose ŋa lɛ ni Mose hã eku esɛɛ etee Midian lɛ,

³ kɛ Mose bihii enyɔ lɛ efata ehe kɛtee. Bihii nɛɛ ateŋ mɔ kome gbɛi ji Gershom, ejaakɛ Mose kɛɛ, “Miyato gbɔ yɛ maŋsɛɛ”,

⁴ ni mɔ kome lɛ hu gbɛi ji Eliezer ejaakɛ Mose kɛɛ, “Mitsɛ Nyɔŋmɔ lɛ ji mɔ ni wa mi, ni ehe mi kɛje Farao dɛŋ gbele mli.”

⁵ Yetro, Mose shaanuu lɛ, kɛ Mose ŋa lɛ kɛ ebihii enyɔ lɛ ba Mose ŋɔɔ yɛ ŋa lɛ nɔ he ni Israelbii lɛ eyato shi yɛ, yɛ Nyɔŋmɔ Gɔŋ lɛ he lɛ.

⁶ Ni Yetro hã ayakɛɛ Mose akɛ, “Mi oshaanuu, mi kɛ oŋa kɛ obihii enyɔ lɛ miiba oŋɔɔ.”

⁷ No hewɔ lɛ, Mose je kpo ekɛ eshaanuu lɛ yakpe. Mose koto lɛ ni eshwɔ enaa; amɛflaflaa amɛhe, ni amɛba Mose buu lɛ mli.

⁸ Ni Mose gba eshaanuu lɛ nibii fɛɛ ni Yehowa fee Farao kɛ Ijiptbii yɛ Israelbii lɛ ahewɔ lɛ. Egba lɛ haomɔi hu ni ba Israelbii lɛ anɔ yɛ amɛgbɛfãa lɛ mli, kɛ bɔ ni fee ni Yehowa jie amɛ yɛ mli.

⁹ Yetro mii shɛ ehe yɛ ejuji fɛɛ ni Yehowa efee yɛ Israelbii lɛ ahewɔ, akɛ ejie amɛ yɛ Ijipt nyɔŋyeli shishi.

¹⁰ Ni Yetro kɛɛ, “Ajie Yehowa yi, lɛ mɔ ni ejie nyɛ yɛ Farao kɛ Ijiptbii lɛ adɛŋ, ni ejie emaŋ lɛ yɛ Ijiptbii anɔyeli shishi lɛ.

¹¹ Kpaako mina mile akɛ Yehowa fe nyɔŋmɔi fɛɛ ejaakɛ eto Ijiptbii lɛ kpa, akɛni amɛwo amɛhe amɛhã Israelbii lɛ, ni Yehowa ba amɛ shi.”

¹² Ni Yetro, Mose shaanuu lɛ, yashã shãa afɔle kɛ afɔlei krokomɛi ehã Yehowa, ni Aaron kɛ Israel onukpai lɛ fɛɛ ba koni amɛ kɛ Mose shaanuu lɛ abaye nii yɛ he krɔŋkrɔŋ lɛ.

Kojolɔiwoo

¹³ Enɔ jetsɛremɔ leebi lɛ, Mose ho eta shi, ni ekura maŋbii lɛ ateŋ saji, ni maŋ lɛ jwere enɔ kɛjɛ leebi kɛyashi gbɛkɛ.

¹⁴ Be ni Mose shaanuu lɛ na nibii fɛɛ ni Mose tsuɔ ehãa maŋ lɛ, ekɛɛ lɛ akɛ, “Mɛni ji nɔ ni otsuɔ ohãa maŋ lɛ nɛɛ? Mɛɛba okome too ota shi, ni maŋ lɛ fɛɛ jwere onɔ nɛkɛ leebileebi jenamɔ nɛɛ?”

¹⁵ Mose hã lɛ hetoo ekɛɛ, “Ebaa lɛ nakai ejaakɛ maŋbii lɛ baa amɛbabiɔ mi Nyɔŋmɔ daaŋ gbee.

¹⁶ Kɛji amɛna sane ko lɛ amɛkɛbaa miŋɔɔ, ni mikuraa, ni mitsɔ̃ɔ amɛ Nyɔŋmɔ akpɔi kɛ nɔ ni Nyɔŋmɔ kɛɛ.”

¹⁷ Mose shaanuu lɛ kɛɛ lɛ akɛ, “Nɔ ni ofeɔ nɛɛ ehiii.

¹⁸ Ebaatɔ bo kɛ maŋ lɛ fɛɛ hu. Nitsumɔ nɛɛ fa tsɔ̃ hã bo; okome too onyɛŋ otsu.

¹⁹ Agbɛnɛ bo migbee toi; mawo bo ŋaa, ni Nyɔŋmɔ aye abua bo. Bo lɛ feemɔ maŋbii lɛ anaadamɔlɔ yɛ maŋbii lɛ kɛ Nyɔŋmɔ teŋ koni okɛ amɛsaji lɛ ashwie Nyɔŋmɔ hiɛ;

²⁰ ni otsɔ̃ɔ amɛ Nyɔŋmɔ akpɔi, nɔ ni ekɛɛ lɛ, ni ohã amɛle bɔ ni sa akɛ amɛba amɛjeŋ amɛhã, kɛ nɔ ni sa akɛ amɛfee.

²¹ Ni asaŋ halamɔ maŋ lɛ fɛɛ mli hii ni aaanyɛ atsu gbɛnaa ni abaahã amɛ lɛ he nii, mɛi ni amɛsheɔ Nyɔŋmɔ gbeyei hu, ni amɛ ji anɔkwafoi ni heee nyɔɔŋnii, koni oto amɛ kui anɔkwɛlɔi: mɛi nyɔŋmanyɔŋma kui kɛ mɛi nyɔŋmai enumɔenumɔ kui kɛ mɛi ohaoha kui kɛ akpeakpe kui anɔkwɛlɔi.

²² Ohã amɛ amɛkura saji ni baaba maŋbii lɛ ateŋ lɛ be fɛɛ be. Sane wulu fɛɛ sane wulu lɛ, no lɛ akɛba ohiɛ; shi saji bibii fɛɛ lɛ kui anɔkwɛlɔi lɛ aye, bɔ ni afee ni amɛkɛmɔ mli amɛhã bo koni efo tsɔ́ ehã bo.

²³ Bɔ ni Nyɔŋmɔ fãa bo nɛ. Kɛji ofee nakai lɛ, ooonyɛ nitsumɔ nɛɛ naa odamɔ, ni maŋbii nɛɛ fɛɛ hu aaayashɛ amɛshɛɛhe yɛ hejɔlɛ mli.”

²⁴ Mose bo eshaanuu lɛ toi, ni efee nɔ ni ekɛɛ lɛ lɛ fɛɛ.

²⁵ Ehala maŋ lɛ fɛɛ mli hii ni aaanyɛ atsu gbɛnaa ni abaahã amɛ lɛ he nii, ni eto amɛ kui anɔkwɛlɔi: mɛi nyɔŋma nyɔŋma kui kɛ mɛi nyɔŋmai enumɔenumɔ kui kɛ mɛi ohaoha kui kɛ mɛi akpeakpe kui anɔkwɛlɔi.

²⁶ Nɔkwɛlɔi nɛɛ kuraa maŋbii lɛ ateŋ saji be fɛɛ be. Saji wuji lɛ amɛkɛbaa Mose ŋɔɔ; shi saji bibii fɛɛ lɛ amɛ diɛŋtsɛ amɛkuraa.

²⁷ Fee sɛɛ lɛ Mose shaanuu Yetro kɛ lɛ ye shɛɛ, ni Yetro ku esɛɛ etee emaŋ.