2 Mose 16 - ŊMALƐ KRƆŊKRƆŊ LƐ

Mana kɛ Trakɔkɔi lɛ

¹ Israelbii asafo lɛ fɛɛ fã kɛjɛ Elim kɛtee Sin ŋa ni kã Elim kɛ Sinai teŋ lɛ nɔ. Amɛyashɛ jɛi Ijipt shimɔ lɛ sɛɛ nyɔji enyɔ lɛ nɔ gbi ni ji nyɔŋma kɛ enumɔ lɛ nɔ.

² Israelbii asafo muu lɛ fɛɛ wie huhuuhu amɛshi Mose kɛ Aaron yɛ ŋa lɛ nɔ.

³ Amɛkɛɛ, “Yehowa hã wɔgboi yɛ Ijipt be ni wɔtara loo kɛ kukwɛii ahe ni wɔyeɔ nii wɔtɔrɔɔ lɛ moŋ kulɛ, ehi fe nɔ ni nyɛjie wɔ kɛba ŋa nɛɛ nɔ, ni nyɛkɛ hɔmɔ abagbe asafo muu nɛɛ fɛɛ nɛɛ.”

⁴ Ni Yehowa kɛɛ Mose akɛ, “Naa, mibahã aboloo ajɛ ŋwɛi anɛ ashwie shi ahã nyɛ. Daa gbi lɛ maŋbii lɛ aje kpo ayabua naa bɔ pɛ ni aaashɛ amɛyeli gbi kome. Mikɛ enɛ baaka amɛ makwɛ akɛ amɛaaye mimla lɛ nɔ aloo amɛyeŋ nɔ.

⁵ Shi gbi ni ji ekpaa lɛ nɔ lɛ, hã ni amɛsaa nɔ ni amɛbuaa naa daa gbi lɛ falɛ toi enyɔ amɛto.”

⁶ Kɛkɛ ni Mose kɛ Aaron kɛɛ Israelbii lɛ fɛɛ akɛ, “Ŋmɛnɛ gbɛkɛ nɛɛ lɛ nyɛaana nyɛle akɛ Yehowa ji mɔ ni jie nyɛ kɛje Ijipt shikpɔŋ lɛ nɔ lɛ.

⁷ Leebi lɛ nyɛaana Yehowa anunyam lɛ, ejaakɛ enu huhuuhu wiemɔi ni nyɛwieɔ nyɛshiɔ lɛ lɛ, ejaakɛ wɔ lɛ namɛi ji wɔ ni nyɛwieɔ huhuuhu nyɛshiɔ wɔ?”

⁸ Mose tee nɔ ekɛɛ amɛ akɛ, “Kɛji gbɛkɛ lɛ Yehowa hã nyɛ loo nyɛye, ni leebi lɛ ehã nyɛ aboloo nyɛye nyɛtɔrɔ, ejaakɛ enu huhuuhu wiemɔi ni nyɛwieɔ nyɛshiɔ lɛ lɛ, wɔ lɛ nɛgbɛ wɔdamɔ? Jeee wɔ nyɛwieɔ huhuuhu nyɛshiɔ lɛ, shi Yehowa mɔŋ ni.”

⁹ Kɛkɛ ni Mose kɛɛ Aaron akɛ, “Kɛɛmɔ Israelbii asafo muu lɛ fɛɛ akɛ, ‘Nyɛtsia nyɛbaa Yehowa hiɛ; enu nyɛ huhuuhu wiemɔi lɛ.’ ”

¹⁰ Be ni Aaron kɛ Israelbii asafo muu lɛ fɛɛ wieɔ lɛ, amɛkwɛ ŋa lɛ nɔ gbɛ, ni naa, Yehowa anunyam lɛ epue yɛ atatu lɛ mli.

¹¹ Ni Yehowa kɛɛ Mose akɛ,

¹² “Minu Israelbii lɛ ahuhuuhu wiemɔi lɛ. Kɛɛmɔ amɛ akɛ, ‘Gbɛkɛnaashi lɛ nyɛaaye loo, ni leebi lɛ nyɛaaye aboloo nyɛtɔrɔ, ni nyɛaana nyɛle akɛ mi ji Yehowa, nyɛNyɔŋmɔ lɛ.’ ”

¹³ Gbɛkɛnaashi mli lɛ trakɔkɔi baha Israelbii lɛ ashihilɛhe lɛ. Leebi mli lɛ bɔ nyɔ kɛbɔle Israelbii lɛ ahe fɛɛ kɛkpe kpula.

¹⁴ Be ni bɔ lɛ kpala lɛ, ana nibii tɛtɛrɛbii kokrobii bibiibii komɛi jwere ŋa lɛ nɔ fɛɛ tamɔ bɔ ni efĩ yɛ shikpɔŋ lɛ nɔ.

¹⁵ Be ni Israelbii lɛ na nibii nɛɛ, amɛbibii amɛhe akɛ, “Kolɛ mɛni nɛ?” Ejaakɛ amɛleee nɔ ni ji. Mose kɛɛ amɛ akɛ, “Aboloo ni Yehowa hã nyɛ koni nyɛye lɛ nɛ.

¹⁶ Ŋmaa nɛɛ he kitã ni Yehowa ewo nɛ: ‘Mɔ fɛɛ mɔ abua bɔ ni eeenyɛ eye naa, shi moŋ mɔ fɛɛ mɔ naa nii afee tsenesa loo gomer kome falɛ yɛ nyɛyibɔ naa. Mɔ fɛɛ mɔ akɔlɔ ahã mɛi abɔ ni ekɛyɔɔ ebuu mli lɛ.’ ”

¹⁷ Israelbii lɛ fee nakai. Mɛi komɛi kɔlɔ pii, ni mɛi komɛi kɔlɔ fioo.

¹⁸ Shi be ni akɛ tsenesa yaasusu lɛ, mɔ ni kɔlɔ pii lɛ enaaa eko yɛ sɛɛ, ni mɔ ni kɔlɔ fioo hu eshwɛɛɛ lɛ eko dani ashɛ. Mɔ fɛɛ mɔ na bɔ ni eeenyɛ eye.

¹⁹ Kɛkɛ ni Mose wo maŋbii lɛ shi ekɛɛ, “Mɔ ko akashwɛ eko ni je miitsɛre nɔ.”

²⁰ Shi kɛ̃lɛ mɛi komɛi eyabooo Mose toi ni amɛshwɛ eko. Be ni je tsɛre lɛ ewo gɔgɔmi, ni esha. Enɛ hã Mose mli wo amɛ la.

²¹ No hewɔ lɛ, agbɛnɛ daa leebi lɛ Israelbii lɛ yakɔlɔɔ ŋmaa lɛ, mɔ fɛɛ mɔ lɛ, bɔ ni eeenyɛ eye kɛkɛ. Kɛji hulu naa wa lɛ esereɔ.

²² Gbi ni ji ekpaa lɛ nɔ lɛ, amɛkɔlɔ daa gbi niyenii lɛ falɛ toi enyɔ, mɔ kome nɔ tsenesai enyɔ, ni maŋbii lɛ ateŋ onukpai lɛ babɔ Mose amaniɛ.

²³ Kɛkɛ ni Mose kɛɛ akɛ, “Nɛkɛ ji bɔ ni Yehowa fã: ‘Wɔ lɛ hejɔɔmɔ gbi ni, Yehowa hejɔɔmɔ gbi krɔŋkrɔŋ lɛ ni. Nyɛshãa nɔ ni nyɛyɔɔ shãa, ni nyɛhoa nɔ ni nyɛyɔɔ hoomɔ. Nɔ ni baashwɛ lɛ nyɛkɛtoa ni je atsɛrea nɔ.’ ”

²⁴ Amɛkɛ nii ni shwɛ lɛ to ni je tsɛre nɔ tamɔ bɔ ni Mose kɛɛ amɛ lɛ; niyenii lɛ eshaaa lɛ, ewooo gɔgɔmi hu.

²⁵ Ni Mose kɛɛ maŋbii lɛ akɛ, “Nyɛyea enɛ ŋmɛnɛ ejaakɛ Yehowa hejɔɔmɔ gbi ji ŋmɛnɛ, ni no hewɔ lɛ, ŋmɛnɛ nyɛnaŋ eko yɛ ŋa lɛ nɔ nyɛkɔlɔ.

²⁶ Nyɛbuaa ŋmaa lɛ naa gbii ekpaa ejaakɛ gbi ni ji kpawo lɛ hejɔɔmɔ gbi ni, ni no nɔ lɛ eko baŋ.”

²⁷ Gbi ni ji kpawo lɛ nɔ lɛ, mɛi komɛi je maŋbii lɛ ateŋ tee ŋmaa kɔlɔmɔ, shi amɛyanaaa eko amɛkɔlɔ.

²⁸ Kɛkɛ ni Yehowa kɛɛ Mose akɛ, “Kɛyaashi mɛɛ beyinɔ nɔŋŋ nyɛaakwa mikitãi kɛ mimlai lɛ?

²⁹ Nyɛnaaa akɛ ni Yehowa hã nyɛ hejɔɔmɔgbi lɛ, no hewɔ ni ehãa nyɛ gbii enyɔ niyenii yɛ gbi ni ji ekpaa lɛ nɔ lɛ? Mɔ fɛɛ mɔ ahi eshĩa, mɔ ko akaje egbɛhe yɛ gbi ni ji kpawo lɛ nɔ.”

³⁰ No hewɔ lɛ, Israelbii lɛ jɔɔ amɛhe yɛ gbi ni ji kpawo lɛ nɔ.

³¹ Israelbii lɛ wo niyenii nɛɛ gbɛi akɛ mana. Edalɛ tamɔ mlɛ bibii, ni eyɛɔ futafuta, ni eŋɔɔmɔ tamɔ akpãanɔɔ kɛ wo.

³² Kɛkɛ ni Mose kɛɛ maŋ lɛ akɛ, “Kitã ni Yehowa ewo nɛ, ‘Nyɛkɛ niyenii nɛɛ tsenesa kome falɛ atoa nyɛhãa nyɛshwiei koni amɛbana ŋmaa ni mikɛlɛ nyɛ yɛ ŋa lɛ nɔ be mli ni mijie nyɛ kɛje Ijipt shikpɔŋ lɛ nɔ lɛ.’ ”

³³ Kɛkɛ ni Mose kɛɛ Aaron akɛ, “Wo kpulu ni osusu mana tsenesa kome falɛ owo mli, ni okɛyama Yehowa hiɛ koni akɛto ahã nyɛshwiei yɛ yinɔi fɛɛ mli.”

³⁴ Aaron kɛ mana lɛ yama Kpãŋmɔ Adeka lɛ hiɛ tamɔ bɔ ni Yehowa fã Mose lɛ koni akɛto.

³⁵ Ni Israelbii lɛ ye mana afii nyɔŋmai ejwɛ kɛyashi amɛyanina shikpɔŋ ni amɛaanyɛ nɔ amɛhi. Amɛye mana lɛ kɛyashi beyinɔ ni amɛyashɛ Kanaan shikpɔŋ lɛ husu naa.

³⁶ (“Gomer” loo tsenesa kome feɔ “efa” loo yiteremɔ mlijaa nyɔŋma mli ekome.)