2 Mose 15 - ŊMALƐ KRƆŊKRƆŊ LƐ

Mose lala lɛ

¹ Kɛkɛ ni Mose kɛ Israelbii lɛ la nɛkɛ lala nɛɛ kɛjie Yehowa yi, ni amɛkɛɛ, “Mala majie Yehowa yi, ejaakɛ eye kunim kpeteŋkple kɛwo ehiɛ nyam; okpɔŋɔ kɛ enɔtalɔ lɛ etsirɛ amɛ ewo ŋshɔŋ.

² Yehowa ji mihewalɛ kɛ milala, ni lɛ etsɔ̃ miyiwalaherelɔ. Lɛ ji miNyɔŋmɔ, ni majie eyi, mitsɛmɛi aNyɔŋmɔ ni, ni mawo ehiɛ nyam.

³ Yehowa, lɛ tawulɔ ni. Ani jeee egbɛi ji Yehowa?

⁴ “Farao shwiilii lɛ kɛ eta lɛ eloo ewo ŋshɔŋ, ni etatsɛmɛi kpanakpanaa lɛ, amii amɛ nu yɛ Ŋshɔ Tsuru lɛ mli.

⁵ Ŋshɔ lɛ ha amɛnɔ, ni amɛshiu kɛtee nu shishi tamɔ tɛ.

⁶ Yehowa, ohewalɛ lɛ hiɛ eba nyam, Yehowa, ohewalɛ lɛ tserɛɔ henyɛlɔ mli.

⁷ Ogbojee lɛ naa sɔŋŋ lɛ, obutu mɛi ni te shi wo bo lɛ. Omlila lɛ gri wo amɛ, ni eshã amɛ tamɔ la shãa gbetseli.

⁸ Omu oshwie ŋshɔ lɛ nɔ, ni nu lɛ bua ehe naa, ni ŋshɔkei lɛ ho damɔ shi keikei, ŋshɔ teŋteŋ nu lɛ shɔ̃ etsɔ̃ kpɔ.

⁹ Henyɛlɔ lɛ kɛɛ, ‘Matiu amɛ mayamɔmɔ amɛ. Maja nomŋɔɔnii lɛ, mitsui aaanyɔ mimli. Magbala miklante ni makpãtã amɛhiɛ.’

¹⁰ Ohã kɔɔyɔɔ tswa, ni ŋshɔ lɛ ha amɛnɔ; amɛshiu tamɔ sumui yɛ nu hamahama lɛ mli.

¹¹ “Namɔ tamɔ Bo, Yehowa, yɛ nyɔŋmɔi lɛ ateŋ? Namɔ tsuɔ nyam nii ni yɔɔ gbeyei kɛ naakpɛɛ?

¹² Okpa oninejurɔ mli, ni shikpɔŋ lɛ mi amɛ.

¹³ Osuɔmɔ ni tsakeee lɛ naa lɛ okpala maŋ ni okpɔ̃ nɛɛ. Ohewalɛ naa lɛ otsɔ̃ɔ amɛ gbɛ kɛshɛ oshihilɛhe krɔŋkrɔŋ lɛ.

¹⁴ Jeŋ maji lɛ nu he, ni amɛhe kpokpo, ŋmiŋmi emɔmɔ Filistibii lɛ.

¹⁵ Agbɛnɛ shiofɔ̃ eshi Edom maŋtsɛmɛi lɛ anɔ, Moab kãkãlɔi lɛ ahe kpokpo; Kanaanbii fɛɛ ehao.

¹⁶ Gbeyei kɛ ŋmiŋmi eloo amɛ, onineshi tsiimɔ sɔŋŋ ehã amɛmu shi dɛoo kɛyaashi beyinɔ ni Yehowa, omaŋ lɛ aaaho, kɛyaashi mɛi ni okpɔ̃ lɛ aaaho.

¹⁷ Okɛ amɛ aaaba ni obato amɛ shi yɛ bo diɛŋtsɛ ogɔŋ lɛ nɔ.

¹⁸ Yehowa aaaye maŋtsɛ kɛaatee naanɔi anaanɔ.”

Miriam lala lɛ

¹⁹ Be ni Farao okpɔŋɔi lɛ kɛ eshwiilii lɛ kɛ ekpɔŋɔiatsɛmɛi lɛ bote ŋshɔ lɛ mli lɛ, Yehowa hã ŋshɔ lɛ mli nu lɛ ku esɛɛ ebaha amɛnɔ, shi Israelbii lɛ nyiɛ shikpɔŋ gbiŋ nɔ kɛtsɔ ŋshɔ lɛ mli kɛtee.

²⁰ Kɛkɛ ni gbalɔyoo Miriam, Aaron nyɛmiyoo lɛ, kɔ fao ehiɛ edɛ̃, ni yei lɛ fɛɛ kɔlɔ fabii kɛnyiɛ esɛɛ, ni amɛsha ni amɛjo.

²¹ Miriam wo lala ekɛɛ, “Nyɛlaa nyɛhãa Yehowa ejaakɛ eye kunim kɛwo ehiɛ nyam; etsirɛ okpɔŋɔ kɛ enɔtalɔ lɛ ewo ŋshɔŋ.”

Nu ni joɔ lɛ

²² Agbɛnɛ Mose kɛ Israelbii lɛ fã yɛ Ŋshɔ Tsuru lɛ naa kɛtee Shur ŋa lɛ nɔ. Amɛnyiɛ gbii etɛ̃ gbɛ yɛ ŋa lɛ nɔ ni amɛnaaa nu.

²³ Be ni amɛyashɛ he ko ni gbɛi ji Mara lɛ amɛyanina nu; shi Mara nu nɛɛ ehiii numɔ ejaakɛ eejoo. No hewɔ awo jɛi Mara lɛ.

²⁴ Kɛkɛ ni Israelbii lɛ wie huhuuhu amɛshi Mose amɛkɛɛ, “Mɛni wɔbaanu mɔ?”

²⁵ Mose bo etsɛ Yehowa, ni Yehowa tsɔ̃ɔ lɛ tso ko; ni be ni ekɔ ni eshɛ efɔ nu lɛ mli lɛ, nu lɛ baŋɔɔ. Jɛi Yehowa wo Israelbii lɛ kitã kɛ akpɔ yɛ, ni jɛi hu ekã amɛ yɛ,

²⁶ ni ekɛɛ, “Kɛji nyɛaaye Yehowa, ni ji nyɛNyɔŋmɔ lɛ, gbee nɔ kadikadi, ni nyɛaafee nɔ ni ja gbɛ yɛ ehiɛ, ni nyɛaaye ekpɔi kɛ kitãi fɛɛ anɔ lɛ, no lɛ helai ni mihã ye Ijiptbii lɛ eko eko yeŋ nyɛ, ejaakɛ mi ji Yehowa, nyɛtsalɔ lɛ.”

²⁷ Enɛ sɛɛ lɛ Israelbii lɛ ba Elim, he ni nubui nyɔŋma kɛ enyɔ kɛ amitsrɔbi tsei nyɔŋmai kpawo yɔɔ lɛ, ni amɛbato shi yɛ jɛi yɛ nu lɛ he.