2 Mose 14 - ŊMALƐ KRƆŊKRƆŊ LƐ

Ŋshɔ Tsuru lɛ foo

¹ Kɛkɛ ni Yehowa kɛɛ Mose akɛ,

² “Kɛɛmɔ Israelbii lɛ akɛ amɛdɔ amɛyi ni amɛyato shi yɛ Pi-Hahirot hiɛ, yɛ Migdol kɛ Ŋshɔ Tsuru lɛ teŋ, yɛ Baal-Zefon masɛi. Nyɛtoa shi yɛ eŋlɛ nɔ, yɛ ŋshɔ lɛ naa.

³ No aaahã Farao asusu ni ekɛɛ akɛ, ‘Israelbii lɛ eyadu gbɛ yɛ gbɛteŋ, shiaŋa lɛ esa amɛyi’.

⁴ Mahã Farao akpliŋ etsui koni etiu nyɛ, ni no aaahã Farao kɛ eta lɛ fɛɛ ashe mi gbeyei, ni Ijiptbii baana ale akɛ mi ji Yehowa lɛ.” Israelbii lɛ fee bɔ ni akɛɛ amɛ lɛ.

⁵ Be ni ababɔ Ijipt maŋtsɛ lɛ amaniɛ akɛ Israelbii lɛ ejo foi amɛtee lɛ, Farao kɛ etsuji lɛ tsake amɛjwɛŋmɔ yɛ Israelbii lɛ ahe, ni amɛkɛɛ akɛ, “Kwɛ mɛni po wɔfee nɛɛ, ni wɔhã Israelbii lɛ kpa wɔ sɔ̃ɔmɔ ni amɛtee nɛɛ?”

⁶ No hewɔ lɛ, Farao saa lɛ diɛŋtsɛ etayaa shwiilii lɛ, ni eloo esraafoi efata ehe.

⁷ Esaa eŋɔ tayaa shwiilii ohai ekpaa ni aje gbɛ ahala, agbɛnɛ kɛ Ijipt shwiilii fɛɛ kɛ amɛnɔ tatsɛmɛi eshwie esɛɛ.

⁸ Shi Yehowa hã Ijipt maŋtsɛ Farao kpliŋ etsui, ni etiu Israelbii lɛ ni Yehowa hewalɛ nine ni tsii lɛ hiɛ amɛ kɛyaa lɛ.

⁹ Ijiptbii lɛ yi Israelbii lɛ asɛɛ kɛ Farao okpɔŋɔi kɛ tayaa shwiilii kɛ okpɔŋɔnɔtalɔi kɛ asraafoi fɛɛ. Ni amɛyanina Israelbii lɛ ni amɛto shi yɛ Ŋshɔ Tsuru lɛ naa, yɛ Pi-hahirot masɛi yɛ Baal-Zefon hiɛ.

¹⁰ Farao kɛ eta lɛ tsi bɛŋkɛ. Be ni Israelbii lɛ yaahole amɛhiŋmɛii anɔ lɛ, naa Farao kɛ Ijiptbii lɛ ni amɛnyiɛ amɛsɛɛ kɛmiiba. Gbeyei mɔmɔ Israelbii lɛ naakpa, ni amɛbolɔ amɛtsɛ Yehowa.

¹¹ Ni amɛkɛɛ Mose akɛ, “Ani gbonyobui ni bɛ Ijipt hewɔ ni okpala wɔ kɛba koni wɔbagboi yɛ ŋa nɛɛ nɔ nɛɛ? Mɛɛba oye wɔ nɛkɛ sane, ni oloo wɔ kɛjɛ Ijipt kɛba biɛ nɛɛ?

¹² Ani jeee wiemɔ ni wɔkɛ bo wie yɛ Ijipt lɛ nɛ akɛ, ‘Fɔ̃ɔmɔ ni ohã wɔsɔ̃mɔ Ijiptbii lɛ kɛkɛ?’ Shi faŋ nɔ moŋ ni wɔsɔ̃mɔ Ijiptbii lɛ fe nɔ ni wɔɔyagboi yɛ ŋa lɛ nɔ lɛ.”

¹³ Ni Mose here Israelbii lɛ nɔ ekɛɛ, “Nyɛkashea gbeyei! Nyɛdamɔa shi shiŋŋ ni nyɛkwɛa nyɛyiwala ni Yehowa baahere ŋmɛnɛ nɛɛ. Ejaakɛ Ijiptbii ni nyɛnaa ŋmɛnɛ nɛɛ lɛ, nyɛnaŋ amɛ dɔŋŋ kɛaatee naanɔ.

¹⁴ Yehowa baawu ahã nyɛ, nyɛ lɛ nyɛfea diŋŋ”.

¹⁵ Yehowa kɛɛ Mose akɛ, “Mɛɛba ni obolɔɔ otsɛɔ mi? Kɛɛmɔ Israelbii lɛ akɛ amɛya amɛhiɛ.

¹⁶ Shi bo lɛ, wo otso lɛ nɔ ni okpã onine mli yɛ ŋshɔ lɛ nɔ koni ogba ŋshɔ lɛ mli enyɔ koni Israelbii lɛ anyiɛ shikpɔŋ gbiŋ nɔ kɛtsɔ̃ ŋshɔ lɛ teŋ kɛya.

¹⁷ Mahã Ijiptbii lɛ akpliŋ amɛtsui koni amɛnyiɛ Israelbii lɛ asɛɛ, ni maye Farao kɛ eta shwiilii kɛ ekpɔŋɔnɔtalɔi lɛ fɛɛ anɔ kunim.

¹⁸ Ni kɛji miye Farao kɛ eta shwiilii kɛ ekpɔŋɔnɔtalɔi lɛ anɔ lɛ, Ijiptbii aaana amɛle akɛ mi ji Yehowa.”

¹⁹ Kɛkɛ ni Nyɔŋmɔ bɔfo lɛ ni nyiɛ Israelbii lɛ ata lɛ hiɛ lɛ gbala ehe shi eyaje amɛsɛɛgbɛ, ni atatu kutuu lɛ je amɛhiɛgbɛ ni eyashi yɛ amɛsɛɛgbɛ,

²⁰ yɛ Ijiptbii ata lɛ kɛ Israelbii ata lɛ teŋ. Shwane lɛ atatu lɛ woɔ Ijiptbii lɛ hiɛ duŋ, ni nyɔɔŋ lɛ ekpɛɔ ehãa Israelbii lɛ. No hewɔ lɛ, gbi lɛ nyɔɔŋ lɛ mli fɛɛ lɛ mɛnɛɛmɛi nyɛɛɛ mɛnɛɛmɛi abɛŋkɛ.

²¹ Mose kpã enine mli yɛ ŋshɔ lɛ nɔ, ni Yehowa hã bokã kɔɔyɔɔ ko ni naa wa batswa nakai nyɔɔŋ lɛ mli fɛɛ, ni ehã ŋshɔ lɛ gbala kɛtee sɛɛ, yɛ biɛ kɛ biɛ, ni emli gba enyɔ, ni eshi shikpɔŋ gbiŋ efɔ̃ shi yɛ eteŋ,

²² ni Israelbii lɛ yi shikpɔŋ gbiŋ lɛ nɔ yɛ ŋshɔ lɛ teŋ, ni nu lɛ ma shi tamɔ gbogbo yɛ amɛninejurɔ kɛ amɛbɛku.

²³ Ijiptbii lɛ tiu Israelbii lɛ ni amɛnyiɛ amɛsɛɛ kɛbote ŋshɔ lɛ mli. Amɛkɛ Farao okpɔŋɔi kɛ etayaa shwiilii kɛ ekpɔŋɔnɔtalɔi lɛ fɛɛ.

²⁴ Ni maŋkɛ mra mli lɛ Yehowa jɛ atatu kutuu kɛ la kutuu lɛ mli ekwɛ Ijiptbii ata lɛ, ni ehao amɛ.

²⁵ Ehã amɛshwiilii lɛ anaji lɛ bɔi fuu, ni ekɛwo Ijiptbii lɛ hejaramɔ. Kɛkɛ ni Ijiptbii lɛ kɛɛ akɛ, “Nyɛhãa wɔjoa Israelbii lɛ anaa foi ejaakɛ Yehowa kɛ wɔ miiwu miihã amɛ.”

²⁶ Shi Yehowa kɛɛ Mose akɛ, “Kpã onine mli yɛ ŋshɔ lɛ nɔ koni ŋshɔ lɛ abaha Ijiptbii kɛ amɛtayaa shwiilii kɛ amɛkpɔŋɔnɔtalɔi lɛ anɔ.”

²⁷ No hewɔ lɛ, Mose kpã enine mli yɛ ŋshɔ lɛ nɔ. Ni jetsɛremɔ mli leebi lɛ ŋshɔ lɛ yiridi kɛjɛ biɛ kɛ biɛ kɛmiiba abatsa ekoŋŋ, ni Ijiptbii lɛ wo foi, shi amɛkɛ ŋshɔ lɛ bakpe, ni Yehowa hã Ijiptbii lɛ ahiɛ kpãtã yɛ ŋshɔ lɛ teŋ.

²⁸ Ŋshɔ lɛ ku esɛɛ ba, ni ebaha Farao shwiilii kɛ okpɔŋɔiatsɛmɛi kɛ eta muu lɛ fɛɛ ni tiu Israelbii lɛ kɛtee ŋshɔ lɛ mli lɛ nɔ; eshwɛɛɛ amɛteŋ mɔ kome tete po.

²⁹ Shi Israelbii lɛ nyiɛ shikpɔŋ gbiŋ nɔ kɛtsɔ̃ ŋshɔ lɛ teŋ, ni nu lɛ tsɔ̃ tamɔ gbogbo hã amɛ yɛ amɛninejurɔ kɛ amɛbɛku.

³⁰ Nakai gbi lɛ, bɔ ni Yehowa fee ehere Israelbii lɛ ayiwala kɛjɛ Ijiptbii adɛŋ nɛ, ni Israelbii lɛ na Ijiptbii lɛ jwere ŋshɔ lɛ naa ni amɛgboi.

³¹ Ni Israelbii lɛ na Yehowa hewalɛ wulu ni ejie lɛ kpo etsɔ̃ɔ Ijiptbii lɛ, ni Israelbii lɛ she Yehowa gbeyei, ni amɛhe Yehowa kɛ etsulɔ Mose amɛye.