2 Mose 13 - ŊMALƐ KRƆŊKRƆŊ LƐ

Kromɔbii anɔjɔɔmɔ

¹ Yehowa kɛɛ Mose akɛ,

² “Kromɔbi nuu fɛɛ kromɔbi nuu, ni ji binuu fɛɛ binuu ni gbeleɔ musu naa, yɛ Israelbii ateŋ lɛ ajɔɔ enɔ ahã mi, gbɔmɔ ni jio, kooloo ni jio, ajɔɔ enɔ ahã mi, ejaakɛ minɔ ni.”

Akpiti Gbijurɔ lɛ

³ Mose kɛɛ Israelbii lɛ akɛ, “Nyɛkaia nɛkɛ gbi nɛɛ, ni ji gbi nɔ ni nyɛje Ijipt nyɔŋyeli shishi lɛ, ejaakɛ nineshiwalɛ naa Yehowa jie nyɛ kɛje jɛi. No hewɔ lɛ, nyɛkayea masha nii.

⁴ Ŋmɛnɛ gbi nɛɛ nyɛmiishi Ijipt yɛ Nikpamɔ Nyɔɔŋ nɛɛ nɔ.

⁵ Kɛji Yehowa kɛ nyɛ yashɛ Kanaanbii kɛ Hitbii kɛ Amorbii kɛ Hivbii kɛ Yebusbii lɛ ashikpɔŋ kpakpa ni da ni yɔɔ frɔ̃frɔ̃ ni niyenii pii yɔɔ nɔ, nɔ ni ekã nyɛ kɛ nyɛtsɛmɛi lɛ kitã akɛ ekɛbaahã nyɛ, lɛ nɔ lɛ, jamɔ ni nyɛkɛja lɛ yɛ nyɔɔŋ nɛɛ nɔ nɛ:

⁶ Aboloo ni akɛ mã akpiti shã lɛ, nyɛyea lɛ gbii kpawo; shi gbi ni ji kpawo lɛ Yehowa gbijurɔ ni.

⁷ Aboloo ni akɛ mã akpiti shã lɛ nyɛyea lɛ gbii kpawo; akana masha aboloo ko yɛ nyɛŋɔɔ loo masha nɔ ko yɛ nyɛkpokpai anɔ he ko he ko.

⁸ Ni nakai gbi lɛ nɔ lɛ nyɛtsia tã, ni nyɛtsɔ̃a nyɛbii gbijurɔ nɛɛ shishi akɛ, ‘Nɔ ni Yehowa fee ehã wɔ be mli ni wɔjeɔ Ijipt lɛ hewɔ ni wɔfeɔ enɛ.’

⁹ Nyɛkaia gbijurɔ nɛɛ. Nyɛhãa efea tamɔ okadi ko ni fi nyɛnineshi aloo ni kpɛtɛ nyɛhiɛŋtso nɔ koni Yehowa mla lɛ akã nyɛdaaŋ, ejaakɛ nineshiwalɛ naa Yehowa jie nyɛ kɛje Ijipt.

¹⁰ No hewɔ lɛ, nyɛyea nɛkɛ akpɔ nɛɛ nɔ yɛ ebe lɛ mli.

Kromɔbii kpɔ̃mɔ

¹¹ “Kɛji Yehowa kɛ nyɛ yashɛ Kanaanbii ashikpɔŋ lɛ nɔ tamɔ bɔ ni ekã nyɛ kɛ nyɛtsɛmɛi lɛ kitã akɛ ekɛaahã nyɛ lɛ,

¹² binuu fɛɛ binuu ni gbeleɔ musu naa lɛ, nyɛjɔa enɔ nyɛhãa mi, Yehowa. Nyɛshiai amli kooloi akromɔ bihii hu Yehowa nii ni.

¹³ Teji kromɔ binuu fɛɛ kromɔ binuu lɛ nyɛkɛ too akpɔ̃a lɛ. Shi kɛji nyɛkpɔ̃ɔɔ lɛ lɛ, no lɛ aku ekuɛŋ. Shi gbɔmɔ kromɔbi fɛɛ kromɔbi lɛ nyɛkpɔ̃a lɛ.

¹⁴ Kɛji nyɛbii bi nyɛ wɔsɛɛ ko akɛ, ‘Ni te gbijurɔ nɛɛ shishi hu lɛ,’ nyɛkɛa amɛ akɛ, ‘Nineshiwalɛ naa Yehowa jie wɔ kɛje Ijipt he ni aye wɔ nyɔŋ yɛ lɛ.

¹⁵ Ejaakɛ be ni Farao kɛ kuɛŋtilɛ ekpɛlɛ̃ɛɛ kwrakwra akɛ eŋmɛ wɔ gbɛ koni wɔshi Ijipt lɛ, Yehowa gbe Ijipt shikpɔŋ lɛ nɔ kromɔbii fɛɛ kɛjɛ gbɔmɔ kromɔbi nɔ kɛyashi kooloo tete kromɔbi nɔ. Enɛ hewɔ ni kooloo fɛɛ kooloo ni gbeleɔ musu naa, ni ji nuu lɛ, wɔkɛshãa afɔle wɔhãa Yehowa lɛ, shi wɔkromɔ bihii lɛ, amɛ lɛ wɔkpɔ̃ɔ amɛ lɛ.

¹⁶ Nyɛhãa enɛ afea tamɔ okadi ko ni fi nyɛnine shi aloo ni kpɛtɛ nyɛhiɛŋtso nɔ ejaakɛ nineshiwalɛ naa Yehowa jie wɔ kɛje Ijipt.’ ”

Atatu kutuu kɛ la kutuu

¹⁷ Be ni Farao ŋmɛ Israelbii lɛ gbɛ akɛ amɛya lɛ, Nyɔŋmɔ kpalaaa amɛ kɛtsɔ̃ɔɔ Filistibii lɛ ashikpɔŋ lɛ nɔ gbɛ lɛ nɔ; tsɛbelɛ jɛi gbɛ lɛ jɛkɛɛɛ, ejaakɛ Nyɔŋmɔ kɛɛ, “Koni Israelbii lɛ kɛ ta ko akayakpe yɛ gbɛteŋ, ni no hã amɛshwa amɛhe ni amɛku amɛsɛɛ kɛtee Ijipt ekoŋŋ.”

¹⁸ No hewɔ lɛ, Nyɔŋmɔ kɛ Israelbii lɛ lɔgɔ shi kɛtsɔ̃ Ŋshɔ Tsuru lɛ he ŋa lɛ nɔ gbɛ. Israelbii lɛ fã yɛ Ijipt ni amɛsaa amɛhe amɛhã ta.

¹⁹ Mose loo Yosef gbonyowui lɛ kɛtee tamɔ bɔ ni Yosef ehã Israelbii lɛ ekã kitã amɛto lɛ. Yosef ekɛɛ Israelbii lɛ akɛ, “Nyɔŋmɔ aaakpɔ̃ nyɛ kɛ̃ be ko; kɛji be lɛ shɛ lɛ koni nyɛwo migbonyo wui lɛ kɛje biɛ.”

²⁰ Israelbii lɛ yiŋ kɛjɛ Sukot, ni amɛyato shi yɛ Etam yɛ ŋa lɛ naa.

²¹ Shwane mli lɛ Yehowa nyiɛɔ amɛhiɛ tamɔ atatu kutuu koni etsɔ̃ɔ amɛ gbɛ, ni nyɔɔŋ hu enyiɛɔ amɛhiɛ tamɔ atatu la kutuu koni ehã amɛna nii; ni amɛnyiɛ shwaneshwane kɛ nyɔɔŋnyɔɔŋ fɛɛ.

²² Shwane mli lɛ atatu kutuu lɛ ejeee amɛhiɛ, ni nyɔɔŋ hu la kutuu lɛ ejeee amɛhiɛ.