2 Mose 12 - ŊMALƐ KRƆŊKRƆŊ LƐ

Hehoo lɛ

¹ Ni Yehowa kɛɛ Mose yɛ Ijipt shikpɔŋ lɛ nɔ akɛ,

² “Nɛkɛ nyɔɔŋ nɛɛ aaatsɔ̃ afi mli klɛŋklɛŋ nyɔɔŋ kɛ afi shishijee ahã nyɛ.

³ Nyɛkɛ Israelbii lɛ fɛɛ awie akɛ, Nyɔɔŋ nɛɛ nɔ gbi ni ji nyɔŋma lɛ, Israelbii fɛɛ amɔmɔ toobi kome kome yɛ amɛtsɛmɛi awei lɛ anaa, shĩa fɛɛ shĩa lɛ toobi kome.

⁴ Shi kɛji shĩa lɛ bii faaa hãaa toobi muu lɛ yeli lɛ, no lɛ shĩatsɛ lɛ kɛ ekuuŋnyo, mɔ ni shĩa tsa enɔ lɛ nɔ lɛ, aye yɛ mɛi lɛ ayifalɛ naa. Nyɛteŋ mɔ fɛɛ mɔ akane mɛi abɔ ni fa hã toobi lɛ yeli.

⁵ Nyɛŋɔa toobi ni kpa bɛ ehe, nuu ni eye afi, yɛ too gwantɛŋi loo too abotiai lɛ ateŋ.

⁶ Nyɛkɛ toobi nɛɛ ato kɛyashi nyɔɔŋ lɛ nɔ gbi nyɔŋma kɛ ejwɛ lɛ nɔ koni Israelbii fɛɛ agbegbee amɛ gbɛkɛnaashi.

⁷ Akɛ lá lɛ eko adiki shĩai hei ni abaaye yɛ lɛ agboi lɛ ashinaatsei enyɔ lɛ kɛ yiteŋ nɔ lɛ hu he.

⁸ Aye loo lɛ nakai nyɔɔŋ lɛ mli nɔŋŋ. Ashã, ni akɛ aboloo ni akɛ mã akpiti shã kɛ shwie ni joɔ aye.

⁹ Akaye lɛ eŋmɔŋ, ni akɛ nu akahoo, shi moŋ ashã, eyitso kɛ eshuɔji kɛ emlinii lɛ fɛɛ.

¹⁰ Nyɛkashwɛa eko nyɛtoa ni je tsɛre nɔ. Shi kɛji eko shwɛ ni je tsɛre nɔ lɛ, nyɛwoa mli la ni nyɛshãa.

¹¹ Ni bɔ ni nyɛye lɛ nɛ. Nyɛfimɔa nyɛmliteiaŋ, ni nyɛwoa nyɛtokotai, ni nyɛdɛ̃hiɛmɔtsei ahiɛa nyɛdɛ̃, ni nyɛyea lɛ paopao, shi Yehowa Hehoo ni.

¹² “Ejaakɛ matsɔ̃ Ijipt shikpɔŋ lɛ nɔ kɛho nakai nyɔɔŋ lɛ mli, ni magbe Ijipt shikpɔŋ lɛ nɔ kromɔbi fɛɛ kromɔbi, gbɔmɔ ni jio, kooloo ni jio, koni mahã Ijipt nyɔŋmɔi lɛ fɛɛ ahe guɔ agbo, mi ji Yehowa.

¹³ Lá lɛ aaatsɔ̃ shĩai amli ni nyɛyɔɔ lɛ ahe okadi. Kɛji mina lá lɛ pɛ mateke nyɛ, ni mikpataŋ nyɛhiɛ be ni matswia Ijipt gbɔmɛi kɛ kooloi nii lɛ.

¹⁴ Nɛkɛ gbi nɛɛ atsɔ̃ kaimɔ gbi ahã nyɛ, ni nyɛye lɛ akɛ Yehowa gbi jurɔ, ni etsɔ̃ akpɔ ehã nyɛ kɛ nyɛshwiei kɛya naanɔ.”

Akpiti Gbijurɔyeli lɛ

¹⁵ “Aboloo ni akɛ mã akpiti shã nɛɛ nyɛyea lɛ gbii kpawo. Shi klɛŋklɛŋ gbi lɛ nɔ beebe lɛ, nyɛjiea masha fɛɛ masha yɛ nyɛshĩai amli. Ejaakɛ mɔ fɛɛ mɔ ni baaye masha aboloo yɛ gbii kpawo nɛɛ eko nɔ lɛ, aaakpãtã ehiɛ yɛ Israel.

¹⁶ Klɛŋklɛŋ gbi lɛ nɔ lɛ akpe kpee krɔŋkrɔŋ kɛja Nyɔŋmɔ, ni gbi ni ji kpawo lɛ hu nɔ lɛ akpe kpee krɔŋkrɔŋ nakai nɔŋŋ. Akatsu nitsumɔ ko nitsumɔ ko yɛ gbii nɛɛ amli ja nitsumɔ ni kɔɔ nɔ ni mɔ fɛɛ mɔ aaaye he kɛkɛ.

¹⁷ Nyɛyea nɛkɛ akpiti gbijurɔ nɛɛ nyɛkɛkaia gbi nɔ ni mijie nyɛ fɛɛ yuu kɛje Ijipt shikpɔŋ lɛ nɔ lɛ. No hewɔ lɛ, nyɛyea gbijurɔ nɛɛ, nyɛ kɛ nyɛshwiei fɛɛ, ni etsɔ̃ akpɔ ehã nyɛ kɛya naanɔ.

¹⁸ Nyɛbɔ̃ia aboloo ni akɛ mã akpiti shã nɛɛ yeli kɛyashi nyɔɔŋ lɛ gbi nyɔŋmai enyɔ kɛ ekome lɛ gbɛkɛ.

¹⁹ Akana masha ko yɛ nyɛshiai amli gbii kpawo, ejaakɛ mɔ fɛɛ mɔ ni aaaye masha nii lɛ, gbɔ ni jio, Israel fɔmɔbi ni jio, ehiɛ aaakpãtã yɛ Israelbii ateŋ.

²⁰ Nyɛkayea masha nii, nyɛyea akpiti yɛ nyɛshihilɛhei fɛɛ.”

Klɛŋklɛŋ Hehoo lɛ

²¹ Kɛkɛ ni Mose tsɛ Israel onukpai lɛ fɛɛ kɛbakpe, ni ekɛɛ amɛ akɛ, “Nyɛjiea toi nyɛtoa yɛ nyɛwekui lɛ anaa, ni nyɛgbea kɛyea Hehoo lɛ.

²² Nyɛkɛ lá lɛ awoa lalakã mli, ni nyɛkɛ ŋshɔŋ kotsa atsɔ lá nɛɛ mli koni nyɛkɛdiki agbo lɛ shinaatsei enyɔ lɛ kɛ yiteŋ nɔ lɛ hu, ni nyɛteŋ mɔ ko mɔ ko akajea kpo kɛba shinaashi kɛyashi leebi.

²³ Ejaakɛ Yehowa baaho koni eyatswia Ijiptbii nii. Kɛji ena lá lɛ yɛ shinaatsei enyɔ lɛ kɛ eyiteŋ nɔ lɛ he pɛ, Yehowa baateke nyɛshiai lɛ, ni eŋmɛŋ hiɛkpãtãlɔ lɛ gbɛ ni ebote nyɛshĩai lɛ amli koni ebatswia nyɛ nii.

²⁴ Nyɛyea gbɛjianɔtoi nɛɛ anɔ, ni etsɔ̃ akpɔ ehã nyɛ kɛ nyɛbii kɛya naanɔ.

²⁵ Ni kɛji nyɛyashɛ shikpɔŋ ni Yehowa kɛbaahã nyɛ lɛ nɔ lɛ, tamɔ bɔ ni ewo shi eto lɛ, nyɛhiɛa nɛkɛ jamɔ nɛɛ mli.

²⁶ Ni kɛji nyɛbii aaabi nyɛ akɛ, ‘Te nyɛjamɔ nɛɛ shishi hu?’ lɛ,

²⁷ nyɛkɛa amɛ akɛ, ‘Yehowa Hehoo afɔle ni, ejaakɛ be ni etswia Ijiptbii lɛ nii lɛ, eho Israelbii ashĩai lɛ ahe yɛ Ijipt ni etɛ̃ wɔshĩai lɛ eshĩ.’ ” Kɛkɛ ni Israelbii lɛ mamɔ amɛyi shi, ni amɛja Yehowa,

²⁸ ni Israelbii lɛ gbɛlɛ mli, ni amɛyafee bɔ ni Yehowa ekɛɛ Mose kɛ Aaron akɛ afee lɛ pɛpɛɛpɛ.

Kromɔbii lɛ agbele

²⁹ Gbi lɛ nyɔɔŋteŋ lɛ Yehowa tswia Ijipt shikpɔŋ lɛ nɔ kromɔbii fɛɛ nii, kɛjɛ Farao kromɔbi lɛ ni baaye etsɛ sɛɛ yɛ maŋtsɛ sɛi lɛ nɔ lɛ nɔ, kɛyashi gboklɛfonyo ni kã kpabu mli lɛ kromɔbii kɛ shĩa kooloi akromɔbii fɛɛ nɔ.

³⁰ Kɛkɛ ni Farao te shi nakai nyɔɔŋ lɛ mli nɔŋŋ, lɛ kɛ etsuji fɛɛ kɛ Ijiptbii fɛɛ, ni amɛwo yara waa yɛ Ijipt fɛɛ, ejaakɛ eyashwɛɛɛ shĩa ko ni gbonyo bɛ mli.

³¹ Nakai nyɔɔŋ lɛ mli nɔŋŋ ni Farao tsu ni ayatsɛ Mose kɛ Aaron kɛba, ni ekɛɛ amɛ akɛ, “Nyɛjea mimaŋbii ateŋ nyɛyaa, nyɛ kɛ Israelbii lɛ, nyɛyasɔ̃mɔa Yehowa tamɔ bɔ ni nyɛbi lɛ.

³² Nyɛkɛ nyɛtoi kɛ nyɛtsinai lɛ hu ayaa tamɔ bɔ ni nyɛkɛɛ lɛ. Kɛfee lɛ nyɛsɔlea eko nyɛhãa mi koni jɔɔmɔ lɛ eko anina mi hu.”

³³ Ni Ijiptbii lɛ tsirɛ Israelbii lɛ ayisɛɛ akɛ amɛhe afee oya ni amɛshi amɛshikpɔŋ lɛ nɔ, ejaakɛ amɛkɛɛ, “Nyɛbaahã wɔ fɛɛ wɔgboi.”

³⁴ Israelbii lɛ hole amɛmai ni nako asha ni yɔɔ tsesei amli lɛ, ni amɛfimɔ tsesei lɛ amɛwowoo amɛmamai amli, kɛkɛ ni amɛhole amɛtswia amɛkɔ̃ji.

³⁵ Nakai be mli lɛ Israelbii lɛ efee bɔ ni Mose ekɛɛ amɛ lɛ, ni amɛmala jwiɛtɛi nii kɛ shika nii kɛ mamai yɛ Ijiptbii lɛ adɛŋ.

³⁶ Yehowa hã Ijiptbii lɛ ahiɛ sɔ Israelbii lɛ, ni amɛhãhãa amɛ nibii ni amɛbibii amɛ lɛ. No hewɔ lɛ, Israelbii lɛ kpakpla Ijiptbii lɛ ahenii kɛtee.

Israelbii lɛ shi Ijipt

³⁷ Kɛkɛ ni Israelbii lɛ yi mli kɛjɛ Rameses kɛtee Sukot, hii ni nyiɛ amɛnane aaafee akpei ohai ekpaa, soro yei kɛ gbekɛbii.

³⁸ Maji srɔtoi anɔ bii babaoo hu fata he kɛtee kɛ agbɛnɛ toi kɛ tsinai babaoo diɛŋtsɛ.

³⁹ Ni amɛkɛ mã ni amɛkɛjɛ Ijipt lɛ eko shã mã akpiti keeki ejaakɛ eshako akɛ ni Ijiptbii lɛ shwie amɛ bɔ ni amɛwooo mɛɛ koni mã lɛ asha lɛ, ni no hewɔ hu lɛ amɛsako niyenii amɛtoko gbɛnyiɛmɔ lɛ.

⁴⁰ Be abɔ ni Israelbii lɛ ye yɛ Ijipt shikpɔŋ lɛ nɔ lɛ fɛɛ feɔ afii ohai ejwɛ kɛ nyɔŋmai etɛ̃.

⁴¹ Gbi ni amɛna afii ohai ejwɛ kɛ nyɔŋmai etɛ̃ nɛɛ nɔ pɛpɛɛpɛ ni Yehowa webii lɛ blublu shi Ijipt shikpɔŋ lɛ nɔ.

⁴² Ni akɛni Yehowa shi kpe nyɔɔŋnyɔɔŋ kɛjie Israelbii lɛ kɛje Ijipt hewɔ lɛ, nakai gbi lɛ nyɔɔŋ lɛ batsɔ̃ kpeshii nyɔɔŋ ehã Israelbii kɛ amɛyinɔi fɛɛ, ni amɛyeɔ lɛ akɛ Yehowa gbijurɔ.

Hehoo lɛ he akpɔi

⁴³ Ni Yehowa kɛɛ Mose kɛ Aaron akɛ, “Hehoo lɛ he akpɔi nɛ: Mɔkpɔŋ ko mɔkpɔŋ ko akaye eko.

⁴⁴ Shi nyɔŋ fɛɛ nyɔŋ ni akɛ shika he lɛ lɛ, ofo lɛ ketia dani eye eko.

⁴⁵ Mɔ ni ebato nyɛ gbɔ kɛ apaafonyo hu akaye eko.

⁴⁶ Shĩa fɛɛ shĩa aye enɔ, akɛ loo lɛ eko akaje kpo yɛ shĩa lɛ, asaŋ akajwa loo lɛ mli wui lɛ eko.

⁴⁷ Israel maŋ muu lɛ fɛɛ aye gbɛjianɔtoi nɛɛ anɔ.

⁴⁸ Shi kɛji gbɔ ni ebato gbɔ miitao akɛ eyeɔ Hehoo lɛ ekɛwo Yehowa hiɛ nyam lɛ, hã afolɔ ebihii lɛ fɛɛ ketia dani eba ni ebaye eko, ni eeetsɔ̃ tamɔ Israelnyo nɔŋŋ. Shi foolɔ ko foolɔ ko akaye eko.

⁴⁹ Mla kome akã shi ahã maŋnyo kɛ mɔ ni bato nyɛ gbɔ fɛɛ.”

⁵⁰ Israelbii lɛ fɛɛ fee bɔ ni Yehowa wo Mose kɛ Aaron kitã lɛ pɛpɛɛpɛ.

⁵¹ Ni nakai gbi lɛ nɔ nɔŋŋ lɛ Yehowa jie Israelbii lɛ kɛje Ijipt shikpɔŋ lɛ nɔ yɛ amɛkutsei lɛ anaa.