2 Mose 11 - ŊMALƐ KRƆŊKRƆŊ LƐ

Krɔmɔbii gboi

¹ Kɛkɛ ni Yehowa kɛɛ Mose akɛ, “Eshwɛ amanehulu wulu kome ni mahã aba Farao kɛ Ijipt nɔ, ni no sɛɛ lɛ eeehã nyɛje biɛ nyɛya. Be ni eeehã nyɛ fɛɛ nyɛya kwraa lɛ, shwiemɔ tete ebaashwie nyɛ kɛje biɛ.

² Agbɛnɛ kpã owo Israelbii lɛ atoiŋ akɛ nuu fɛɛ nuu kɛ yoo fɛɛ yoo amala jwiɛtɛi nii kɛ shika nii yɛ enaanyo Ijiptnyo dɛŋ.”

³ Yehowa hã Ijiptbii lɛ ahiɛ sɔ Israelbii lɛ. Anɔkwa, Farao tsuji lɛ kɛ emaŋbii lɛ fɛɛ buɔ Mose akɛ gbɔmɔ wulu diɛŋtsɛ yɛ Ijipt shikpɔŋ lɛ nɔ.

⁴ Ni Mose kɛɛ Farao akɛ, “Bɔ ni Yehowa kɛɛ nɛ: ‘Nyɔɔŋteŋ lɛ maje kpo makpa Ijipt,

⁵ ni Ijipt shikpɔŋ lɛ nɔ kromɔbii fɛɛ aaagboi kɛjɛ Farao kromɔbi ni baaye esɛɛ yɛ sɛi lɛ nɔ lɛ nɔ kɛyaashi nyɔŋyoo ni yɔɔ wiɛ sɛɛ lɛ kromɔbi lɛ tete nɔ. Kooloi po akromɔbii fɛɛ baagboi.

⁶ Ni aaawo yara babaoo yɛ Ijipt shikpɔŋ lɛ nɔ fɛɛ bɔ ni anako ehenɔ dã, ni asaŋ ehenɔ ko hu baŋ dɔŋŋ.

⁷ Shi yɛ Israelbii lɛ agbɛfaŋ lɛ, gbɔmɔ jio, kooloo jio, gbee tete shiŋ esɛŋ ewoŋ lɛ, koni nyɛkɛna nyɛle akɛ Yehowa miitsɔ̃ɔ srɔto ni yɔɔ Ijiptbii kɛ Israelbii ateŋ.

⁸ Nakai be lɛ otsuji fɛɛ aaakpeleke shi aaaba miŋɔɔ, ni amɛaabakoto mi amɛkɛɛ, Jee biɛ ni oya, bo kɛ maŋ lɛ fɛɛ ni yɔɔ oshishi lɛ, ni no sɛɛ lɛ matee.’ ”

⁹ Ni Yehowa kɛɛ Mose akɛ, “Farao ebaboŋ nyɛ toi bɔ ni afee ni minaakpɛɛ nii lɛ afa yɛ Ijipt shikpɔŋ lɛ nɔ.”

¹⁰ Mose kɛ Aaron fee nɛkɛ naakpɛɛ nibii nɛɛ fɛɛ amɛtsɔ̃ɔ Farao nɛ, shi Yehowa hã Farao kpliŋ etsui ni ehãaa Israelbii lɛ ashi eshikpɔŋ lɛ nɔ amɛya.