2 Mose 1 - ŊMALƐ KRƆŊKRƆŊ LƐ

Awa Israelbii lɛ yi yɛ Ijipt

¹ Yakob musuŋ bihii ni fata ehe kɛtee Ijipt lɛ agbɛii nɛ, mɔ fɛɛ mɔ kɛ ewe:

² Ruben kɛ Simeon kɛ Levi kɛ Yuda,

³ Isakar kɛ Zebulon kɛ Benyamin,

⁴ Dan kɛ Naftali kɛ Gad kɛ Asher.

⁵ Yakob shwiei lɛ fɛɛ ayibɔ ji nyɔŋmai kpawo. Shi ebi Yosef lɛ, lɛ lɛ eyɛ Ijipt momo.

⁶ Fee sɛɛ lɛ Yosef kɛ enyɛmimɛi lɛ kɛ nakai yinɔbii lɛ fɛɛ bagboi.

⁷ Shi amɛshwiei, ni ji Israelbii lɛ, fɔfɔɔ ni amɛshwere babaoo. Amɛyi bafa, ni amɛna hewalɛ naakpa diɛŋtsɛ, ni amɛyi Ijipt shikpɔŋ lɛ nɔ tɔ.

⁸ Agbɛnɛ maŋtsɛ hee ko ni leee Yosef baye Ijipt nɔ.

⁹ Maŋtsɛ nɛɛ kɛɛ emaŋbii lɛ akɛ, “Nyɛkwɛa, Israelbii lɛ ayi efa, ni amɛna hewalɛ hu fe wɔ.

¹⁰ Nyɛhãa wɔkɛ amɛ ayea ŋaa mli koni amɛyi akafa dɔŋŋ ni ebaba akɛ be ni ta ehe shi lɛ amɛyafata wɔhenyɛlɔi lɛ moŋ ahe ni akɛ wɔ miiwu koni amɛjo foi kɛshi shikpɔŋ lɛ nɔ.”

¹¹ No hewɔ lɛ, Ijiptbii lɛ totoo nitsumɔ nɔkwɛlɔi yɛ Israelbii lɛ anɔ koni amɛkɛ nitsumɔi keketekeketei awa amɛ yi. Israelbii mamɔ nitoo maji ni ji Pitom kɛ Rameses amɛhã Farao.

¹² Shi babaoo ni Ijiptbii lɛ waa Israelbii lɛ yi lɛ, babaoo moŋ ni Israelbii lɛ ayi faa ni amɛshwereɔ ji no. Enɛ hã Ijiptbii lɛ atsui su Israelbii lɛ anɔ.

¹³ No hewɔ lɛ, amɛhiɛ Israelbii lɛ nyɔji ahiɛmɔ shɛii.

¹⁴ Amɛhã amɛnaa su, ni amɛfo ntayaa, ni amɛtsu ŋmɔshi nitsumɔi srɔtoi, ni enɛ hã jeŋ shihilɛ je Israelbii lɛ atsine.

¹⁵ Kɛkɛ ni Ijipt maŋtsɛ lɛ kɛɛ Shifra kɛ Pua, ni ji Hebriyei yoofɔlɔi lɛ, akɛ,

¹⁶ “Kɛji nyɛtee Hebri yei lɛ fɔmɔ ni nyɛna yɛ sɛi ni yoofɔyoo lɛ taa nɔ efɔɔ lɛ shishi akɛ bi lɛ nuu ni lɛ, nyɛgbea lɛ; shi kɛji yoo ni lɛ ehi shi.”

¹⁷ Shi yoofɔlɔi lɛ yashe Nyɔŋmɔ gbeyei, ni amɛfeee nɔ ni Ijipt maŋtsɛ lɛ kɛɛ amɛ lɛ, shi moŋ amɛhere gbekɛbii hii lɛ ayiwala.

¹⁸ Enɛ hã Ijipt maŋtsɛ lɛ tsɛ yoofɔlɔi lɛ, ni ebi amɛ akɛ, “Mɛni nyɛfeɔ nɛɛ? Mɛɛba ni nyɛhãa gbekɛbii hii lɛ ayi naa wala lɛ?”

¹⁹ Yoofɔlɔi lɛ kɛɛ Farao akɛ, “Ejaakɛ Hebriyei lɛ tamɔɔɔ Ijipt yei lɛ; amɛ lɛ amɛyɛ kamkam bɔ ni be ni yoofɔlɔ lɛ kɛɛ eshɛɔ amɛŋɔɔ lɛ amɛfɔ momo.”

^20-21 Akɛni yoofɔlɔi lɛ yashe Nyɔŋmɔ gbeyei hewɔ lɛ, Nyɔŋmɔ to amɛ ejurɔ, ni eduro amɛ bii. Yɛ Israelbii lɛ agbɛfaŋ lɛ, amɛtee nɔ amɛshwere, ni amɛna hewalɛ naakpa.

²² Kɛkɛ ni Farao wo emaŋbii lɛ fɛɛ akpɔ akɛ, “Binuu fɛɛ binuu ni Hebri yoo aaafɔ lɛ nyɛshɛa lɛ nyɛfɔ̃a Nilo faa lɛ mli, shi biyoo lɛ nyɛhãa eyi ana wala.”