2 Kronika 7 - ŊMALƐ KRƆŊKRƆŊ LƐ

Sɔlemɔtsu lɛ nɔjɔɔmɔ

¹ Be ni Maŋtsɛ Solomon sɔle egbe naa lɛ, la jɛ ŋwɛi, ni ebabote nibii ni akɛbaashã shãa afɔle lɛ kɛ afɔlei krokomɛi lɛ amli, ni eshã fɛɛ. Kɛkɛ ni Yehowa anunyam la lɛ yi Sɔlemɔtsu lɛ obɔ.

² Yehowa anunyam la nɛɛ ni eyi Sɔlemɔtsu lɛ hewɔ lɛ, osɔfoi lɛ nyɛɛɛ Yehowa Sɔlemɔtsu lɛ mli abote.

³ Be ni Israelbii lɛ na la lɛ ni jɛ ŋwɛi lɛ kɛ Yehowa anunyam la lɛ ni ebayi Sɔlemɔtsu lɛŋ obɔ̃ lɛ, amɛkɛ amɛhiɛiaŋ bumɔ shi, yɛ he ko ni aka jɛi tɛ, ni amɛja Yehowa, ni amɛda lɛ shi yɛ emlihilɛ kɛ esuɔmɔ ni sɛɛ efooo kɛmiiya naanɔ lɛ hewɔ.

⁴ Kɛkɛ ni Solomon kɛ maŋ muu lɛ fɛɛ shã afɔlei amɛkɛhã Yehowa.

⁵ Maŋtsɛ Solomon kɛ maŋ muu lɛ fɛɛ shã afɔlei amɛkɛhã Yehowa. Maŋtsɛ Solomon shã afɔle kɛ tsinai akpei nyɔŋmai enyɔ kɛ enyɔ, kɛ toi hu akpei oha kɛ nyɔŋmai enyɔ, ni lɛ maŋtsɛ lɛ, kɛ maŋ muu lɛ fɛɛ kɛgbele Nyɔŋmɔ Sɔlemɔtsu lɛ naa.

⁶ Osɔfoi lɛ damɔ amɛgbɛhe ni ato ahã amɛ lɛ, ni Levibii lɛ damɔ shi amɛmiikwɛ osɔfoi lɛ ahiɛ, ni amɛmiikpã bɛji ni Maŋtsɛ David kɛwo jamɔ lɛ mli koni akɛjie Yehowa yi lɛ akɛ, “Yehowa, esuɔmɔ sɛɛ efooo kɛmiiya naanɔ” lɛ. Nakai be mli lɛ Israel muu lɛ fɛɛ eho edamɔ shi.

⁷ No sɛɛ lɛ, Solomon tsuu kpo ni yɔɔ Yehowa Sɔlemɔtsu lɛ hiɛ lɛ he, ni efee lɛ krɔŋkrɔŋ ejaakɛ eshã shãa afɔlei lɛ kɛ shidaa afɔlei lɛ ahe fɔi lɛ yɛ jɛi, ejaakɛ akɔɔble afɔleshãa latɛ lɛ ni lɛ, Solomon lɛ, efee lɛ edaaa hãaa shãa afɔle lɛ kɛ niyenii afɔle lɛ kɛ fɔi lɛ fɛɛ.

⁸ Nakai be lɛ mli nɔŋŋ ni Solomon kɛ Israel asafo kpeteŋkple diɛŋtsɛ lɛ fɛɛ ye Asesei Agbijurɔ lɛ kɛyashi gbii kpawo. Mɛi jɛ kooyigbɛ shɔŋŋ yɛ Lebo-Hamat aahu kɛyashwie Ijipt faa lɛ naa niiaŋ tɔ̃ɔ yɛ wuoyigbɛ amɛba amɛbaye afi lɛ eko.

⁹ Amɛjɔɔ afɔleshãa latɛ lɛ nɔ gbii kpawo, ni amɛye gbijurɔ lɛ hu gbii ejwɛ, ni gbi ni ji kpaanyɔ lɛ nɔ lɛ amɛkpe naagbee kpee.

¹⁰ Ni enɔ jetsɛremɔ, ni ji nyɔŋ ni ji kpawo lɛ nɔ gbi nyɔŋmai enyɔ kɛ etɛ̃ lɛ, Maŋtsɛ Solomon wo maŋ lɛ gbɛ, ni amɛtetee amɛshĩai kɛ miishɛɛ kɛ nyamɔ yɛ jɔɔmɔ ni Yehowa ejɔɔ David kɛ Solomon kɛ Israelbii lɛ ahewɔ.

Nyɔŋmɔ jie ehe kpo etsɔ̃ɔ Solomon ekoŋŋ

¹¹ Be ni Maŋtsɛ Solomon gbe Yehowa Sɔlemɔtsu lɛ kɛ maŋtsɛ shĩa lɛ maa naa, ni asaŋ nibii fɛɛ ni lɛ, Solomon lɛ, eto eyiŋ akɛ ebaafee ewo Yehowa Sɔlemɔtsu lɛ mli kɛ agbɛnɛ lɛ diɛŋtsɛ eshĩa lɛ hu mli lɛ, etsu fɛɛ etã lɛ,

¹² Yehowa jie ehe kpo etsɔ̃ɔ lɛ gbi ko nyɔɔŋ. Yehowa kɛɛ Solomon akɛ, “Minu osɔlemɔ lɛ, ni miŋɔ Sɔlemɔtsu nɛɛ akɛ he ni ashã afɔle yɛ akɛhã mi.

¹³ Be fɛɛ be ni matsi ŋwɛi naa ni no hewɔ lɛ, nu enɛɛɛ, aloo mafã ni baalabii aaabaye shikpɔŋ lɛ nɔ ŋmɔshinii, aloo mahã gbele hela aaabote mimaŋbii ateŋ lɛ,

¹⁴ kɛji mimaŋbii lɛ, ni ji mi diɛŋtsɛ minii lɛ, ba amɛhe shi amɛhã mi, ni amɛsɔle amɛkpa fai, ni amɛtao misɛɛgbɛ, ni amɛje amɛhe sɛɛ ni amɛkpa amɛshihilɛ gbohii lɛ, no lɛ mi hu majɛ ŋwɛi mabo amɛ toi, ni mikɛ amɛtɔ̃mɔi lɛ aaafa amɛ, ni mahã amɛshikpɔŋ lɛ ashwere ekoŋŋ.

¹⁵ Kɛjɛ kɛyaa nɛɛ lɛ mihiŋmɛi baahi Sɔlemɔtsu nɛɛ he, ni mabo sɔlemɔi fɛɛ ni aaasɔle yɛ mli toi,

¹⁶ ejaakɛ miŋɔ Sɔlemɔtsu nɛɛ, ni mitsuu he mifee lɛ krɔŋkrɔŋ koni aja mi yɛ mli kɛya naanɔ. Mihiŋmɛi baakã he, ni mitsui aaakã nɔ, ni mabu he daa.

¹⁷ Ni bo ogbɛfaŋ lɛ, kɛji ooobo mi toi bɔ ni otsɛ David fee lɛ, ni oooye mikpɔi kɛ mimlai lɛ anɔ, ni ooofee nibii fɛɛ ni miwo bo amɛhe kitã lɛ,

¹⁸ no lɛ mibahã omaŋtsɛyeli lɛ ama shi shiŋŋ bɔ ni mi kɛ otsɛ David kpãŋ lɛ akɛ, ‘Oshwie ni baata Israel maŋtsɛ sɛi lɛ nɔ ebɔŋ bo’ lɛ.

¹⁹ Shi kɛji bo kɛ omaŋbii lɛ, nyɛkwa mikpɔi kɛ mimlai ni mikɛshwie nyɛhiɛ nɛɛ, ni moŋ nyɛtee nyɛyasɔmɔ nyɔŋmɔi komɛi ni nyɛja amɛ lɛ,

²⁰ no lɛ mibashwie nyɛ kɛje shikpɔŋ ni mikɛhã nyɛ nɛɛ nɔ, ni Sɔlemɔtsu nɛɛ ni mitsuu he mifee lɛ krɔŋkrɔŋ koni aja mi yɛ mli lɛ hu mibabule lɛ koni etsɔ̃ amaŋfɔ̃, ni majimaji fɛɛ kɛaabu abɛ, ni abaanyɛ lɛ.

²¹ “Ni mɔ fɛɛ mɔ ni aaaho yɛ nɛkɛ sɔlemɔtsu nɛɛ ni yɔɔ gbɛi kpeteŋkple ŋmɛnɛ nɛɛ he lɛ, ehe aaajɔ̃ ehe, ni eeebi akɛ, ‘Mɛni hewɔ Yehowa fee shikpɔŋ nɛɛ kɛ Sɔlemɔtsu nɛɛ hu nɛkɛ?’

²² Mɛi aaabua he akɛ, ‘Amɛkwa Yehowa, ni ji amɛtsɛmɛi aNyɔŋmɔ lɛ, mɔ ni yahere amɛtsɛmɛi lɛ yɛ Ijipt shikpɔŋ lɛ nɔ kɛba lɛ, ni amɛkɛ amɛhe yahã nyɔŋmɔi komɛi, ni amɛja amɛ ni amɛsɔmɔ amɛ. Enɛ hewɔ Yehowa ehã nɛkɛ nɔ fɔŋ nɛɛ eba amɛnɔ nɛɛ.’ ”