2 Kronika 6 - ŊMALƐ KRƆŊKRƆŊ LƐ

Solomon kɛ maŋ lɛ wie

¹ Kɛkɛ ni Maŋtsɛ Solomon sɔle ni ekɛɛ akɛ, “Yehowa, oto akɛ obaahi atatu duŋ kpii lɛ mli.

² Shi agbɛnɛ, mima mɔɔ wulu mihã Bo akɛ oshihilɛhe kɛmiiya naanɔ.”

³ Agbɛnɛ Solomon tsɔ̃ ehiɛ ehã Israel asafo muu lɛ ni ewo shi yɛ jɛi lɛ, ni eba Yehowa dɛŋ jɔɔmɔ ehã amɛ

⁴ ekɛɛ akɛ, “Ajie Yehowa, Israel Nyɔŋmɔ lɛ, yi. Lɛ ewo mitsɛ David shi, ni asaŋ ehã eba mli bɔ ni ekɛɛ lɛ akɛ,

⁵ ‘Kɛjɛ gbi nɔ ni miyajie mimaŋ lɛ yɛ Ijipt shikpɔŋ lɛ nɔ kɛba nɛɛ, mikɔko maŋ ko maŋ ko akɛ he ni ama Sɔlemɔtsu yɛ ni aja mi yɛ jɛi; ni asaŋ mikɔko mɔ ko mɔ ko akɛ mimaŋ Israel nɔyelɔ.

⁶ Shi agbɛnɛ mikɔ Yerusalɛm akɛ he ni aja mi yɛ, ni mikɔ David hu akɛ mɔ ni aye mimaŋ Israelbii anɔ.’

⁷ “Kulɛ mitsɛ David to eyiŋ akɛ eeema Sɔlemɔtsu koni aja Yehowa, Israel Nyɔŋmɔ lɛ, yɛ jɛi.

⁸ Shi Yehowa kɛɛ lɛ akɛ: ‘Ofee jogbaŋŋ akɛ oto oyiŋ akɛ oooma Sɔlemɔtsu koni aja mi yɛ jɛi.

⁹ Shi kɛ̃lɛ jeee bo obaama Sɔlemɔtsu lɛ, shi omusuŋbi moŋ ni baama miSɔlemɔtsu lɛ ehã mi.’

¹⁰ “Agbɛnɛ Yehowa ehã eshiwoo lɛ eba mli nyɔŋma shishiishi, ejaakɛ mibaye mitsɛ sɛɛ yɛ Israel maŋtsɛ sɛi lɛ nɔ, ni mima Sɔlemɔtsu koni aja Yehowa, Israel Nyɔŋmɔ lɛ, yɛ jɛi,

¹¹ ni miwo Kpãŋmɔ Adeka lɛ ni kpãŋmɔ ni Yehowa kɛ Israel kpãŋ lɛ yɔɔ mli lɛ miyato jɛi.”

Solomon sɔlemɔ lɛ

¹² Agbɛnɛ Solomon ho edamɔ afɔleshãa latɛ lɛ hiɛ yɛ Israel asafo muu lɛ fɛɛ hiɛ.

¹³ Solomon kɛ akɔɔble etswa atrakwei ko ema kpo lɛ teŋ. Ekɛlɛ kɛ elɛɛmɔ fɛɛ ninetalɔi enumɔenumɔ kɛ ekwɔlɛ ninetalɔi etɛ̃. Solomon kwɔ edamɔ atrakwei lɛ nɔ. No sɛɛ lɛ, ekula shi yɛ Israel muu fɛɛ hiɛ, kɛkɛ ni ehole eniji anɔ kɛtee ŋwɛi,

¹⁴ ni esɔle ekɛɛ, “Yehowa, Israel Nyɔŋmɔ, nyɔŋmɔ ko nyɔŋmɔ ko bɛ ni tamɔ bo yɛ ŋwɛi kɛ shikpɔŋ lɛ nɔ fɛɛ. Otoɔ kpãŋmɔ ni okɛ otsuji ekpãŋ, ni ojieɔ osuɔmɔ ni sɛɛ efooo lɛ otsɔ̃ɔ mɛi fɛɛ ni kɛ amɛtsui fɛɛ boɔ bo toi lɛ.

¹⁵ Oye shi ni owo otsulɔ, mitsɛ David lɛ nɔ, akɛ ŋmɛnɛ gbi nɛɛ lɛ ohã nɔ fɛɛ nɔ ni okɛɛ lɛ eba mli.

¹⁶ No hewɔ lɛ, Yehowa, Israel Nyɔŋmɔ, agbɛnɛ ye shi kroko lɛ hu ni owo otsulɔ, mitsɛ David, lɛ nɔ, ni ji nɔ ni okɛɛ lɛ akɛ, ‘Mihaŋ nuu ni aaajɛ oshwiei lɛ ateŋ ata Israel maŋtsɛ sɛi lɛ nɔ lɛ abɔ bo kɛji amɛaaye mimlai lɛ anɔ kadikadi tamɔ ofee lɛ.’

¹⁷ Enɛ hewɔ lɛ, Yehowa, Israel Nyɔŋmɔ, hã shi fɛɛ shi ni awo otsulɔ David lɛ aba mli agbɛnɛ.

¹⁸ “Shi aso Nyɔŋmɔ kɛ gbɔmɛi aaabahi shi lɛɛlɛŋ yɛ shikpɔŋ lɛ nɔ? Naa, ŋwɛi kɛ ŋwɛi amli tete edaaa hãaa bo, aahu ni Sɔlemɔtsu ni mima nɛɛ.

¹⁹ Shi kɛ̃lɛ Yehowa, miNyɔŋmɔ, na otsulɔ he tsui koni obo esɔlemɔ toi, ni ofee nɔ ni ebiɔ bo lɛ.

²⁰ Ohiŋmɛi akã Sɔlemɔtsu nɛɛ he shwane kɛ nyɔɔŋ fɛɛ ejaakɛ owo shi akɛ jɛi aaaja bo yɛ. No hewɔ lɛ, ofainɛ, bo fai ni otsulɔ baakpa bo be mli ni etsɔ̃ ehiɛ ehã biɛ lɛ toi.

²¹ Ni obo otsulɔ kɛ omaŋ Israel sɔlemɔi ni amɛaasɔle be mli ni amɛtsɔ̃ amɛhiɛ amɛhã biɛ lɛ toi. Ni kɛji onu sɔlemɔ lɛ he yɛ ŋwɛi, oshihilɛhe lɛ, lɛ okɛfa wɔ.

²² “Kɛji mɔ ko tɔ̃ enaanyo nɔ ni abi lɛ koni ekã he kitã ni mɔ lɛ ba ebakã kitã lɛ yɛ afɔleshãa latɛ lɛ hiɛ yɛ Sɔlemɔtsu nɛɛ mli akɛ esane yɛ mli lɛ,

²³ no lɛ jɛɛ ŋwɛi he ni oyɔɔ lɛ ni obo toi ni okojo otsuji lɛ, ni owo mɔ fɔŋ lɛ nyɔmɔ, ni ohã emusu abua eyiteŋ, ni obu bemyelɔ lɛ bem, ni owo lɛ nyɔmɔ yɛ ejalɛ lɛ naa.

²⁴ “Kɛji omaŋ Israelbii tɔ̃ onɔ, ni no hewɔ lɛ, amɛhenyɛlɔi ye amɛnɔ kunim yɛ ta mli, ni fee sɛɛ lɛ amɛje amɛhe sɛɛ ni amɛkpale kɛba Sɔlemɔtsu nɛɛ mli ni amɛbaja bo, ni amɛkpa tɔ̃mɔ lɛ he fai koni okɛfa amɛ lɛ,

²⁵ jɛɛ ŋwɛi obo amɛ toi, ni okɛ amɛ aba shikpɔŋ ni okɛhã amɛ kɛ amɛtsɛmɛi lɛ nɔ ekoŋŋ.

²⁶ “Kɛji otsi ŋwɛi naa ni nu enɛɛɛ ejaakɛ omaŋ lɛ etɔ̃ onɔ, ni maŋ lɛ je ehe sɛɛ ni amɛsɔle amɛkpa bo fai be mli ni amɛtsɔ̃ amɛhiɛ amɛhã Sɔlemɔtsu nɛɛ yɛ piŋmɔ ni opiŋ amɛ lɛ hewɔ lɛ,

²⁷ no lɛ jɛɛ ŋwɛi ni okɛ omaŋ Israel tɔ̃mɔ lɛ afa amɛ, asaŋ otsɔ̃ɔ amɛ bɔ ni amɛaatsɔ̃ amɛba amɛjeŋ jogbaŋŋ amɛhã koni ohã nu anɛ shikpɔŋ ni okɛhã omaŋ lɛ akɛ amɛnɔ lɛ nɔ.

²⁸ “Kɛji hɔmɔ loo gbele hela ni eba shikpɔŋ lɛ nɔ jio, jeŋ dɔlɛ loo baalabii loo otukpɛi ni ebakpãtã ŋmɔshi nibii ahiɛ ni jio, aloo omaŋ lɛ henyɛlɔi ni ebasa omaŋbii komɛi ayi ewo amɛmaŋ mli ni jio, nɔ haomɔ fɛɛ haomɔ loo hela fɛɛ hela ni eji lɛ,

²⁹ bo omaŋ lɛ sɔlemɔ toi. Sɔlemɔ fɛɛ sɔlemɔ ni Israelnyo kome loo maŋ muu lɛ fɛɛ baasɔle, loo fai fɛɛ fai ni maŋbii komekomei kɛ haomɔ kɛ ŋkɔmɔ aaahole niji anɔ atsɔ̃ɔ Sɔlemɔtsu nɛɛ kɛkpa bo lɛ,

³⁰ jɛɛ ŋwɛi ni ji oshihilɛhe lɛ obo toi ni okɛfa. Bo pɛ ole gbɔmɔ yitsoŋ, no hewɔ lɛ, okɛ mɔ fɛɛ mɔ aye bɔ ni sa mɔ lɛ,

³¹ bɔ ni afee ni omaŋbii lɛ ashe bo gbeyei, asaŋ koni amɛhi shi bɔ ni bo otaoɔ bei fɛɛ ni amɛyɔɔ shikpɔŋ ni okɛhã wɔtsɛmɛi lɛ nɔ lɛ.

³² “Agbɛnɛ hu gbɔ ni ejeee Israelnyo shi moŋ enu ogbɛi kpeteŋkple lɛ kɛ ohewalɛ lɛ he kɛ bɔ ni ofee kralo be fɛɛ be ohã gbɔmɛi lɛ, ni eeejɛ shɔŋŋ eba biɛ ebasɔle yɛ Sɔlemɔtsu nɛɛ mli lɛ,

³³ jɛɛ ŋwɛi, ni ji oshihilɛhe lɛ, obo lɛ toi. Ofee nibii fɛɛ ni gbɔ lɛ kpaa he fai lɛ ohã lɛ, bɔ ni afee koni jeŋ gbɔmɛi fɛɛ anu ogbɛi lɛ he koni amɛshe bo gbeyei tamɔ omaŋ Israel sheɔ Bo lɛ, asaŋ koni amɛna amɛle akɛ Bo lɛɛlɛŋ ajaa yɛ Sɔlemɔtsu ni mima nɛɛ mli lɛ.

³⁴ “Kɛji omaŋ lɛ fã ta yɛ Bo ofamɔ naa koni amɛkɛ amɛhenyɛlɔi ayawu lɛ, he fɛɛ he ni amɛyɔɔ ni amɛaasɔle amɛtsɛ Bo, be mli ni amɛhiɛ miikwɛ maŋ nɛɛ gbɛ, ni ji maŋ ni Bo diɛŋtsɛ otse ohã ohe lɛ, kɛ Sɔlemɔtsu nɛɛ ni mima koni aja Bo yɛ mli nɛɛ gbɛ lɛ,

³⁵ jɛɛ ŋwɛi obo amɛsɔlemɔ kɛ faikpamɔ lɛ toi koni oye obua amɛ koni amɛye kunim.

³⁶ “Akɛni adesa ko bɛ ni efeee esha lɛ, kɛji omaŋ lɛ fee esha shi bo ni omli fu amɛ ni no hewɔ lɛ, oŋmɛ gbɛ ni amɛhenyɛlɔi ye amɛnɔ kunim yɛ ta mli, ni henyɛlɔi lɛ ŋɔ amɛ nom kɛtee shikpɔŋ kpɔŋ nɔ, jɛi kɛjɛ jio, ejekɛɛɛ jio,

³⁷ kɛji be mli ni amɛyɔɔ shikpɔŋ nɔ he ni aŋɔ amɛ nom kɛtee lɛ, amɛsusu nɔ ni amɛfee lɛ he, ni amɛbu amɛhe fɔ akɛ amɛtɔ̃, ni amɛfee esha lɛɛlɛŋ,

³⁸ ni kɛji no hewɔ lɛ, amɛje amɛhe sɛɛ, ni amɛkpa bo fai anɔkwale mli kɛ amɛtsui fɛɛ kɛ amɛyitsoŋ fɛɛ, yɛ shikpɔŋ nɔ he ni aŋɔ amɛ nom kɛtee lɛ, be mli ni amɛtsɔ̃ amɛhiɛ amɛmiikwɛ shikpɔŋ nɛɛ nɔ gbɛ, ni ji shikpɔŋ ni okɛhã amɛtsɛmɛi lɛ, kɛ maŋ nɛɛ ni bo diɛŋtsɛ otse akɛ omaŋ lɛ kɛ agbɛnɛ Sɔlemɔtsu nɛɛ hu ni mima koni aja bo yɛ mli lɛ,

³⁹ jɛɛ ŋwɛi ni ji oshihilɛ lɛ obo amɛsɔlemɔ kɛ faikpamɔ lɛ toi koni okɛ tɔ̃mɔ lɛ afa omaŋ lɛ.

⁴⁰ “Agbɛnɛ miNyɔŋmɔ, miikpa bo fai, naa wɔ mɔbɔ, ohiŋmɛi akã wɔhe, ni obo sɔlemɔ fɛɛ sɔlemɔ ni aaasɔle yɛ biɛ lɛ toi.

⁴¹ Oo Yehowa, miNyɔŋmɔ ee! Wo ohe nɔ ni obote ohejɔɔmɔhe lɛ mli, bo kɛ Kpãŋmɔ Adeka lɛ ji ohewalɛ lɛ he okadi lɛ. Ao! Yehowa, Nyɔŋmɔ, hã osɔfoi lɛ afee nii ni ja, ni ohã omɛi ni jaa bo lɛ amii ashɛ yɛ ejurɔ ni ofee amɛ lɛ hewɔ.

⁴² Oo! Yehowa, Nyɔŋmɔ, kaaku ohiɛ ofɔ̃ maŋtsɛ ni bo oto lɛ lɛ sɔlemɔ nɔ, ni okai osuɔmɔ ni sɛɛ efooo lɛ ni okɛsumɔ otsulɔ David lɛ.”