2 Kronika 2 - ŊMALƐ KRƆŊKRƆŊ LƐ

Solomon saa ehe hã Sɔlemɔtsu lɛ maa

¹ Maŋtsɛ Solomon to eyiŋ akɛ ebaama Sɔlemɔtsu koni aja Yehowa yɛ jɛi, kɛ maŋtsɛ we hu ehã ehe.

² Ehala mɛi akpei nyɔŋmai kpawo akɛ jatsu terelɔi. Ehala mɛi akpei kpaanyɔ hu koni amɛyagba tɛ yɛ gɔji lɛ anɔ; ni ehala mɛi akpei etɛ̃ kɛ ohai ekpaa akɛ nitsulɔi lɛ anɔkwɛlɔi.

³ Kɛkɛ ni Maŋtsɛ Solomon tsu Tiro Maŋtsɛ Hiram ŋɔɔ, ni ayakɛɛ lɛ akɛ, “Bɔ ni ofee ohã mitsɛ David, ni obahã lɛ tsenedrutsei ekɛma shĩa ehi mli lɛ, nakai nɔŋŋ mitaoɔ koni ofee ohã mi hu.

⁴ Naa, mibama Sɔlemɔtsu mikɛwo Yehowa, miNyɔŋmɔ lɛ, hiɛ nyam. Abaato tsu nɛɛ krɔŋkrɔŋ ahã lɛ, ni abaashã tsofakɛŋmai yɛ jɛi, ni akɛ aboloo baama Yehowa hiɛ yɛ jɛi daa, ni asaŋ abaashã shãa afɔlei yɛ jɛi akɛja lɛ daa leebi kɛ gbɛkɛ kɛ hejɔɔmɔ gbii lɛ hu, kɛji shɛ nyɔji hei, kɛ gbii juji krokomɛi ni akɛwoɔ Yehowa, wɔNyɔŋmɔ lɛ, hiɛ nyam lɛ anɔ. Gbɛnaa nitsumɔ ni kã shi hã Israel nɛ kɛmiiya naanɔ.

⁵ Tsu ni mibama lɛ baada kpeteŋkple diɛŋtsɛ ejaakɛ wɔNyɔŋmɔ lɛ eda fe nyɔŋmɔi krokomɛi fɛɛ.

⁶ Ni namɔ po aaanyɛ ama tsu ni Nyɔŋmɔ baaho mli? Ejaakɛ ŋwɛi kɛ ŋwɛii amli ŋwɛi tete nyɛɛɛ lɛ ato. No hewɔ lɛ, namɔ ji mi ni mimaa tsu mihãa lɛ akɛ ja he kɛkɛ ni abaashã tsofakɛŋma yɛ ahã lɛ.

⁷ No hewɔ lɛ, hã mi nuu ŋaalɔ mɔ ni le shika kɛ jwiɛtɛi kɛ akɔɔble kɛ dade he nitsumɔ, ni asaŋ ele samaloo kɛ mama afaseo tsuru kɛ mama tsuru faa kɛ mama bluu mliwoo hu. Efee mɔ ko ni le samayeli hu koni ebafata ŋaalɔi ni mitsɛ David etao amɛ eto yɛ Yuda kɛ Yerusalɛm fɛɛ lɛ ahe kɛtsu nii lɛ ahã mi.

⁸ Asaŋ miitao hu koni omaje mi seda tsei kɛ saiprɛs tsei kɛ junipa tsei kɛjɛ Lebanon, ejaakɛ mile akɛ otsuji ahe esa pam kɛ Lebanon tsogbamɔ. Mawo mitsuji agbɛ koni amɛbafata otsuji lɛ ahe

⁹ koni amɛsaa tsei babaoo amɛhã mi, ejaakɛ tsu ni mibama lɛ baada kpeteŋkple diɛŋtsɛ, ni ebaafee naakpɛɛ hu.

¹⁰ Mibahã bo ŋmãa mamu ni tsiimɔ ji nsɛnitɛ wulu lɛ akpei enyɔ, kɛ abele nsɛnitɛ wulu lɛ akpei enyɔ, kɛ wain Iitai akpei ohai ejwɛ kɛ mu litai akpei ohai ejwɛ hu yɛ otsuji ni ji tsogbalɔi lɛ ahewɔ.”

¹¹ Kɛkɛ ni Huram, Tiro maŋtsɛ lɛ, hã Solomon ewolo lɛ hetoo. Ekɛɛ yɛ wolo ni eŋma emaje Solomon lɛ mli akɛ, “Suɔmɔ ni Yehowa sumɔ emaŋ lɛ hewɔ ni ewo bo amɛmaŋtsɛ lɛ.

¹² Ajie Yehowa, Israel Nyɔŋmɔ, lɛ ni bɔ ŋwɛi kɛ shikpɔŋ lɛ yi akɛ ehã Maŋtsɛ David bi nilelɔ kɛ hiɛshikãlɔ kɛ jwɛŋlɔ fɛɛ ni baama Sɔlemɔtsu ehã Yehowa, kɛ maŋtsɛ we hu ehã lɛ diɛŋtsɛ emaŋtsɛyeli lɛ.

¹³ Miwo nuu ŋaalɔ kɛ jwɛŋlɔ kpanaa ko gbɛ koni ebana bo. Egbɛi ji Huram-abi, mitsɛ gbɔmɔ lɛ.

¹⁴ Enyɛ ni fɔ lɛ lɛ ejɛ Dan akutso lɛ mli; shi etsɛ lɛ Tironyo ni. Ele shika kɛ jwiɛtɛi kɛ akɔɔble kɛ dade kɛ tɛ kɛ tso fɛɛ he nitsumɔ; asaŋ ele samaloo kɛ mama afaseo tsuru kɛ mama bluu kɛ mama tsuru faa kɛ klala mliwoo. No ji ele ŋaa fɛɛ ŋaa tsumɔ, ni eeba koni ebafata oŋaalɔi lɛ, ni ji otsɛ David, minuŋtsɔ lɛ, ŋaalɔi lɛ ahe.

¹⁵ No hewɔ lɛ, tamɔ owo shi lɛ, okɛ ŋmaa mamu lɛ kɛ abele mamu lɛ kɛ wain lɛ amaje otsuji lɛ;

¹⁶ ni wɔbaatoo Lebanon tsei bɔ fɛɛ bɔ ni otaoɔ wɔbahã bo. Wɔbaafimɔ tsei lɛ wɔkɛtsara, ni wɔbaaloo amɛ wɔwo ŋshɔŋ kɛba Yopa koni ohã abaloo kɛya Yerusalɛm.”

Aje Sɔlemɔtsu lɛ maa shishi

¹⁷ Maŋtsɛ Solomon hã akane gbɔi fɛɛ ni yɔɔ Israel shikpɔŋ lɛ nɔ lɛ tamɔ etsɛ David hã afee lɛ. Amɛyibɔ fee akpei oha kɛ nyɔŋmai enumɔ kɛ etɛ̃ kɛ ohai ekpaa.

¹⁸ Eto amɛteŋ mɛi akpei etɛ̃ kɛ ohai ekpaa akɛ nitsulɔi lɛ anɔkwɛlɔi koni ajwɛŋ nitsumɔi lɛ anɔ atsu.