2 Kronika 16 - ŊMALƐ KRƆŊKRƆŊ LƐ

Yuda kɛ Israel teŋ naagbai

¹ Be ni Maŋtsɛ Asa na afi ni ji nyɔŋmai etɛ̃ kɛ ekpaa akɛ Yuda maŋtsɛ lɛ, Baasha ni ji Israel maŋtsɛ lɛ fã ta koni ebatua Yuda; ni ebɔi Rama maŋ lɛ wajemɔ kɛ gbogbo bɔ ni afee ni esa Yuda yi koni akanyɛ jɛi atee ni ajɛ jɛi aba hu.

² Ni fee nakai lɛ Asa jie Yehowa Sɔlemɔ we lɛ nitoohe lɛ mli shika kɛ jwiɛtɛi lɛ eko, ni ekɛtsu koni akɛyahã Siria Maŋtsɛ Ben-Hadad yɛ Damasko. Shɛɛ ni fata shika lɛ he ji akɛ,

³ “Kpãŋmɔ kã mi kɛ bo teŋ akɛ nanemɛi tamɔ bɔ ni eko hi mitsɛ kɛ bo hu otsɛ teŋ lɛ. Naa jwiɛtɛi kɛ shika ni mimaje bo. Kuu kpãŋmɔ ni kã okɛ Israel Maŋtsɛ Baasha teŋ lɛ mli koni ekɛ etabilɔi lɛ aje mishikpɔŋ lɛ nɔ aya.”

⁴ Ben-Hadad kpɛlɛ̃ nɔ ehã Asa, ni ewo etatsɛmɛi agbɛ ni amɛyatua Israel maji komɛi. Amɛshɔ̃ Iyon kɛ Dan kɛ Abel-Main kɛ Naftali kpokpai lɛ anɔ maji ni atoɔ niyenii yɛ amɛmli lɛ fɛɛ.

⁵ Be ni Baasha nu he lɛ ekpa nitsumɔ ni etsuɔ ekɛwajeɔ Rama lɛ, ni etee.

⁶ Kɛkɛ ni Asa bua hii anaa kɛjɛ Yuda heihei fɛɛ, ni ekɛ amɛ tee, ni ayaloo tɛi kɛ mplaŋi ni Baasha kɛtsuɔ nii ekɛwajeɔ Rama lɛ, ni ekɛtee ekɛyatswa gbogbo ewo Geba kɛ Mizpa maji lɛ ahe ekɛwaje amɛ.

Gbalɔ Hanani gbalɛ lɛ

⁷ Nɛkɛ be nɛɛ mli lɛ Gbalɔ Hanani ba Yuda Maŋtsɛ Asa ŋɔɔ, ni ebakɛɛ lɛ akɛ, “Akɛni okɛ ohe fɔ̃ Siria maŋtsɛ lɛ nɔ, shi okɛ ohe eyafɔɔɔ Yehowa, oNyɔŋmɔ lɛ, nɔ hewɔ lɛ bɛ ona akɛ Israel maŋtsɛ lɛ ta lɛ je odɛ̃ŋ?

⁸ Ani Etiopiabii lɛ kɛ Libiabii lɛ ayi faaa kwraa fe amɛ, asaŋ kɛ amɛtayaa shwiilii kɛ okpɔŋɔnɔtalɔi hu babaoo diɛŋtsɛ? Shi te ni nakai be lɛ okɛ ohe fɔ̃ Yehowa nɔ lɛ, ehã oye amɛnɔ kunim?

⁹ Yehowa, ehiŋmɛi kã je lɛ fɛɛ he, ni ehãa mɛi fɛɛ ni yeɔ lɛ anɔkwa kɛ amɛtsui fɛɛ lɛ naa hewalɛ. Oye kwashiai asane pam, ni no hewɔ lɛ, kɛjɛ kɛyaa nɛɛ lɛ, taitai sɔŋŋ ahe obaakã.”

¹⁰ Gbalɛ nɛɛ hã Asa mli fu moŋ bɔ sɔŋŋ ni ehã awo gbalɔ lɛ gboklɛ yɛ mɔɔŋ. Be nɛɛ mli nɔŋŋ ni Asa bɔi maŋbii lɛ ekomɛi niseniianiifeemɔ.

Asa ye hela

¹¹ Asa wala mli saji lɛ aŋmala kɛjɛ shishijee kɛyashi naagbee fɛɛ yɛ Yuda kɛ Israel Maŋtsɛmɛi ahe Saji Awolo lɛ mli.

¹² Nane hela ko bamɔ Asa yɛ efi ni ji nyɔŋmai etɛ̃ kɛ nɛɛhu akɛ Yuda maŋtsɛ lɛ nɔ. Hela lɛ mli bawo wu, shi fɛɛ sɛɛ lɛ Asa eyatiuuu Yehowa dɛŋ tsamɔ sɛɛ; shi moŋ eyadi tsofatsɛmɛi asɛɛ.

¹³ Asa tsɔ̃ esɛɛ yɛ efi ni ji nyɔŋmai ejwɛ kɛ ekome lɛ nɔ,

¹⁴ ni afu lɛ yɛ gbonyobu ni lɛ diɛŋtsɛ ekpɛ eto lɛ mli yɛ David Maŋ lɛ mli. Tsofakɛŋmai kpakpai srɔtoisrɔtoi diɛŋtsɛ akɛsaa egbonyo lɛ, ni ashɛre la gregre kpeteŋkple akɛfee eyara.