2 Kronika 11 - ŊMALƐ KRƆŊKRƆŊ LƐ

Shemaia gbalɛ lɛ

¹ Be ni Rehoboam shɛ Yerusalɛm lɛ, ebua Yuda kɛ Benyamin akutsei lɛ amli hii tabilɔi akpei oha kɛ nyɔŋmai kpaanyɔ anaa. Eyiŋtoo ji akɛ ekɛ Israel kooyigbɛ akutsei lɛ miiya ayawu ta koni akutsei lɛ abaje emaŋtsɛyeli lɛ shishi ekoŋŋ.

² Shi Nyɔŋmɔ kɛɛ Gbalɔ Shemaia akɛ,

³ eyakɛɛ Solomon bi Rehoboam ni ji Yuda maŋtsɛ lɛ kɛ Yuda kɛ Benyamin akutsei lɛ amli bii fɛɛ akɛ,

⁴ “Nyɛkayaa ni nyɛkɛ nyɛnyɛmimɛi lɛ yawua ta. Mɔ fɛɛ mɔ akpale aya ewe, ejaakɛ mi mihã nɔ ni eba lɛ ba.” Amɛbo Yehowa toi, ni no hewɔ lɛ, amɛyaaa dɔŋŋ koni amɛkɛ Yeroboam ayawu.

Rehoboam waje maji lɛ

⁵ Rehoboam hi Yerusalɛm, ni ehã atswa gbogboi awo Yuda shikpɔŋ lɛ nɔ maji wuji ni agbɛii baa nɛɛ ahe, ni akɛ wajewajee amɛ:

⁶ Betlehem kɛ Etam kɛ Tekoa,

⁷ kɛ Bet-Zur kɛ Soko kɛ Adullam,

⁸ kɛ Gat kɛ Maresha kɛ Zif,

⁹ kɛ Adoraim kɛ Lakish kɛ Azeka,

¹⁰ kɛ Zora kɛ Ayalon kɛ Hebron.

¹¹ Ehã awaje maji wuji nɛɛ jogbaŋŋ diɛŋtsɛ, ni eto tatsɛnukpa koni ekwɛ eko fɛɛ eko nɔ; asaŋ ebua niyenii kɛ mu kɛ wain hu naa eto eko fɛɛ eko mli, kɛ

¹² agbɛnɛ tsɛŋi kɛ akplɔi fɛɛ. Kɛtsɔ̃ nɛkɛ gbɛ nɔ lɛ Rehoboam ye Yuda kɛ Benyamin akutsei lɛ anɔ.

Osɔfoi kɛ Levibii kɛ amɛhe badɔmɔ Yudabii

¹³ Osɔfoi kɛ Levibii ni yɔɔ Israel kooyigbɛ kpokpai lɛ anɔ fɛɛ bua amɛhe naa kɛba wuoyi ni amɛkɛ amɛhe badɔmɔ Yuda.

¹⁴ Levibii nɛɛ shi amɛŋmɔji kɛ shikpɔji, ni amɛba Yuda kɛ Yerusalɛm ejaakɛ Maŋtsɛ Yeroboam kɛ maŋtsɛmɛi ni ba yɛ esɛɛ lɛ eŋmɛɛɛ amɛ gbɛ koni amɛtsu amɛnii akɛ Yehowa osɔfoi.

¹⁵ Yeroboam wo lɛ diɛŋtsɛ esɔfoi koni amɛsɔmɔ yɛ wɔji ajamɔhei lɛ kɛ tsinabi amãgãi ni efee lɛ.

¹⁶ Enɛ hã mɛi fɛɛ ni miitao akɛ amɛja Yehowa, Israel Nyɔŋmɔ lɛ, anɔkwale mli lɛ, fã kɛjɛ Israel akutsei lɛ fɛɛ amli kɛba Yerusalɛm bɔ ni afee ni amɛnyɛ amɛshã afɔle amɛhã amɛtsɛmɛi lɛ aNyɔŋmɔ lɛ.

¹⁷ Gbɔmɛi nɛɛ abaa lɛ bawo Solomon bi Rehoboam maŋtsɛyeli lɛ hewalɛ yɛ Yuda, ni amɛhã ehi shi shweshweeshwe afii etɛ̃ ejaakɛ amɛhi shi bɔ pɛ ni amɛhi shi yɛ David kɛ Solomon yinɔi lɛ amli lɛ.

Rehoboam ŋamɛi kɛ ebii

¹⁸ Rehoboam ŋɔ Mahalat akɛ eŋa. Mahalat tsɛ ji David bi Yerimot, ni enyɛ ji Abihai ni ji Ishai bi Eliab biyoo lɛ.

¹⁹ Amɛfɔ bihii etɛ̃: Yeush kɛ Shemaria kɛ Zaham.

²⁰ Fee sɛɛ lɛ Rehoboam yaŋɔ Maaka, Absalom biyoo lɛ, hu akɛ eŋa, ni ekɛ lɛ fɔ bihii ejwɛ: Abia kɛ Atai kɛ Ziza kɛ Shelomit.

²¹ Ŋamɛi fɛɛ ni Rehoboam ŋɔ ayifalɛ ji nyɔŋma kɛ kpaanyɔ, ni eto hemɛi hu nyɔŋmai ekpaa. Efɔ bihii nyɔŋmai enyɔ kɛ kpaanyɔ kɛ biyei hu nyɔŋmai ekpaa. Rehoboam sumɔ Absalom biyoo Maaka lɛ fe fɛɛ yɛ eŋãmɛi kɛ ehemɛi lɛ fɛɛ ateŋ.

²² Asaŋ ewo ekɛ Maaka bi Abia lɛ onukpa kɛ lumɔ hã enyɛmimɛi lɛ ejaakɛ Rehoboam to eyiŋ akɛ eeewo lɛ maŋtsɛ koni eye esɛɛ.

²³ Rehoboam ye hiɛshikãmɔ sane akɛ ejara ebihii lɛ fɛɛ ewowoo Yuda kɛ Benyamin shikpɔji lɛ anɔ maji wuji ni atswa gbogboi awo amɛhe lɛ amli akɛ lumɛi. Ehã amɛ niyenii babaoo, asaŋ ebibii yei babaoo ashi ehã amɛ akɛ amɛŋamɛi.