2 Kronika 10 - ŊMALƐ KRƆŊKRƆŊ LƐ

Kooyigbɛ Akutsei lɛ tse atua

¹ Rehoboam yiŋ etee Shekem ejaakɛ Kooyigbɛ Akutsei lɛ fɛɛ anaa ebakpe shi yɛ jɛi koni amɛwo lɛ maŋtsɛ.

² Be ni Yeroboam, Nebat bi lɛ, nu he yɛ Ijipt, he ni ejo Maŋtsɛ Solomon naa foi kɛtee eyatee yɛ lɛ, eku esɛɛ eba.

³ Kɛkɛ ni Kooyigbɛ Akutsei lɛ tsu koni ayakpee Yeroboam abahã amɛ; ni amɛ kɛ lɛ fɛɛ tee amɛkɛ Rehoboam yawie akɛ,

⁴ “Jatsu ni otsɛ hã wɔtere lɛ tsii tsɔ̃ kwraa. Kɛji ogbɔ́ sɔɔmɔ ni otsɛ hã wɔsɔmɔ lɛ nɔ, ni shihilɛ mli fee mɛlɛo ehã wɔ lɛ, no lɛ wɔɔɔsɔmɔ bo.”

⁵ Rehoboam hã amɛ hetoo akɛ, “Nyɛhãa mi gbii etɛ̃ koni nyɛbahea sane lɛ hetoo.” Kɛkɛ ni maŋbii lɛ ku amɛsɛɛ ni amɛtee.

⁶ Kɛkɛ ni Maŋtsɛ Rehoboam tsɛ hii onukpai ni sɔmɔ etsɛ Solomon akɛ ŋaawolɔi lɛ ajina, ni ebi amɛ ŋaawoo ni ekɛɛ, “Te mihã maŋbii lɛ asane lɛ hetoo mikɛɛ tɛŋŋ?”

⁷ Hii onukpai lɛ jie maŋtsɛ lɛ naa akɛ, “Kɛji omli hi hã maŋbii nɛɛ, ni ofee nii ni sa amɛhiɛ ni ohã amɛ naajɔlɛ hetoo lɛ, no lɛ amɛaatsɔ̃mɔ otsuji daanɛɛ.”

⁸ Shi Rehoboam shi ŋaa ni hii onukpai lɛ wo lɛ lɛ sɛɛ, ni ekɛ obalahii ni ji etipɛŋfoi, ni asaŋ amɛ amɛ ji eŋaawolɔi agbɛnɛ lɛ tee sane lɛ he ajina.

⁹ Ekɛɛ amɛ akɛ, “Mɛɛ ŋaa nyɛwoɔ mi? Mɛɛ hetoo mihãa gbɔmɛi nɛɛ ni ebabi mi akɛ migbɔ́ sɔɔmɔ ni mitsɛ hã amɛsɔmɔɔ lɛ nɔ lɛ?”

¹⁰ Oblahii lɛ ni ji maŋtsɛ lɛ tipɛŋfoi lɛ kɛɛ Rehoboam akɛ, “Mɛi ni bakɛɛ bo akɛ, ‘Jatsu ni otsɛ hã wɔtere lɛ tsii tsɔ̃ kwraa, shi bo lɛ gbɔ́ nɔ koni efee mɛlɛo ehã wɔ’ lɛ, kɛɛmɔ amɛ akɛ, ‘Miwaosɛɛkpelɔ ti fe mitsɛ hɛ tete.

¹¹ Mitsɛ tere nyɛ jatsu ni tsii; shi mibaŋmɛ jatsu lɛ nɔ, ni ebaatsii aahu fe mitsɛ nɔ lɛ. Ekɛ kpãa yi nyɛ, shi mi lɛ mikɛ kpelebi baagwao nyɛ.’ ”

¹² Be ni gbii etɛ̃ lɛ shɛ lɛ Yeroboam kɛ maŋbii lɛ fɛɛ ba Maŋtsɛ Rehoboam ŋɔɔ bɔ ni eto amɛ lɛ.

¹³ Shi Rehoboam kɛ maŋbii lɛ ewieee kɛ naajɔlɛ. Ekwa ŋaa ni hii onukpai lɛ wo lɛ lɛ.

¹⁴ Maŋtsɛ Rehoboam ŋɔ oblahii lɛ aŋaawoo lɛ, ni ekɛɛ akɛ, “Mitsɛ tere nyɛ jatsu ni tsii, shi mijatsu lɛ baatsii aahu fe mitsɛ nɔ lɛ. Mitsɛ kɛ kpãa yi nyɛ; shi mi lɛ mikɛ kpelebi baagwao nyɛ.”

¹⁵ Belɛ Maŋtsɛ Rehoboam booo maŋbii lɛ toi ejaakɛ Nyɔŋmɔ ninenaa nitsumɔ ni, bɔ ni afee koni wiemɔ ni Yehowa tsɔ̃ Ahia, Shilonyo lɛ, nɔ ni ekɛ Nebat bi Yeroboam wie lɛ aba mli.

¹⁶ Be ni Israel fɛɛ na akɛ Maŋtsɛ Rehoboam booo amɛ toi lɛ, maŋ lɛ to he ni amɛkɛɛ akɛ, “Mɛɛ weku wɔ kɛ David kɛ eshwiei yɔɔ? Wɔkɛ Ishai shwiei lɛ bɛ weku! Israel hii nyɛhãa wɔyaa wɔshĩaiaŋ. Agbɛnɛ David we akwɛ lɛ diɛŋtsɛ ewe sane ni eye!” Kɛkɛ ni Israelbii lɛ yiŋ amɛtee amɛshĩai amli,

¹⁷ ni amɛshi Rehoboam koni eye Israelbii ni yɔɔ Yuda majimaji lɛ amli lɛ amaŋtsɛ.

¹⁸ Fee sɛɛ lɛ Maŋtsɛ Rehoboam tsu Hadoram, mɔ ni kwɛɔ gbɔmɛi ni anyɛɔ amɛnɔ amɛtsuɔ nii lɛ anɔ lɛ, Israelbii lɛ aŋɔɔ. Shi Israelbii lɛ tswia Hadoram tɛ ni amɛgbe lɛ. Enɛ hã Maŋtsɛ Rehoboam he fee oya ni eyabote shwiili mli, ni ejo foi kɛba Yerusalɛm.

¹⁹ Kɛjɛ nakai gbii lɛ anɔ kɛbashi ŋmɛnɛ lɛ, be fɛɛ be lɛ Israel Kooyigbɛ Akutsei lɛ tseɔ David we lɛ maŋtsɛyeli lɛ hiɛ atua.