2 Kronika 1 - ŊMALƐ KRƆŊKRƆŊ LƐ

Maŋtsɛ Solomon sɔle koni aduro lɛ nilee

¹ Solomon, ni ji Maŋtsɛ binuu lɛ, hã ehewalɛ he shi yɛ emaŋtsɛyelihei lɛ anɔ, ni Yehowa, eNyɔŋmɔ lɛ, jɔɔ lɛ ni etsɔ̃ gbɔmɔ wulu kpanaa diɛŋtsɛ.

² Maŋtsɛ Solomon tsɛ tabilɔi akpe akui, kɛ tabilɔi oha akui hu atatsɛmɛi lɛ, kɛ kojolɔi lɛ kɛ maŋtsɛyeli lɛ mli lumɛi lɛ, kɛ tsɛmɛi awei lɛ amli onukpai lɛ, kɛ Israel maŋtso muu lɛ fɛɛ akɛ

³ amɛbafata ehe. Kɛkɛ ni ekɛ amɛ tee jamɔhe ni yɔɔ Gibeon lɛ, ejaakɛ jɛi ji he ni Nyɔŋmɔ Kpee Buu lɛ ni Yehowa tsulɔ Mose fee be mli ni eyɔɔ shiaŋa lɛ nɔ lɛ yɔɔ lɛ.

⁴ (No be mli lɛ Maŋtsɛ David eyawo Nyɔŋmɔ Kpãŋmɔ Adeka lɛ yɛ Kiriat-Yearim kɛba Yerusalɛm, ni ekɛbato buu lɛ ni, lɛ David lɛ, esaa eto ehã adeka lɛ mli.)

⁵ Akɔɔble afɔleshãa latɛ lɛ ni Bezalel, Hur bi Uri binuu lɛ, fee lɛ hu ma shi yɛ Gibeon lolo yɛ Yehowa Kpee Buu Krɔŋkrɔŋ lɛ hiɛ. Solomon kɛ Israel asafo lɛ ja Yehowa yɛ jɛi.

⁶ Solomon tee akɔɔble afɔleshãa latɛ lɛ ni ma shi yɛ Yehowa hiɛ, yɛ Kpee Buu lɛ naa lɛ he, ni ekɛ kooloi akpe shã afɔle ni ashãa fɛɛ lɛ yɛ nɔ.

⁷ Nakai nyɔɔŋ lɛ mli lɛ Nyɔŋmɔ jie ehe kpo etsɔ̃ɔ Solomon, ni ekɛɛ, “Bi nɔ ni ooosumɔ akɛ mihã bo!”

⁸ Solomon kɛɛ Nyɔŋmɔ akɛ, “Osumɔ mitsɛ David jogbaŋŋ be fɛɛ be, ni ŋmɛnɛ ohã mibaye esɛɛ akɛ maŋtsɛ.

⁹ Yehowa Nyɔŋmɔ, agbɛnɛ hã shi ni owo mitsɛ David lɛ aba mli. Bo owo mi maŋ ni yifalɛ tamɔ shikpɔŋ mlu nɛɛ nɔ maŋtsɛ;

¹⁰ no hewɔ lɛ, dromɔ mi nilee kɛ hiɛshikãmɔ koni manyɛ omaŋ kpeteŋkple nɛɛ nɔ makwɛ.”

¹¹ Kɛkɛ ni Nyɔŋmɔ kɛɛ Solomon akɛ, “Akɛ ni obiii akɛ ahã ona nii kɛ jwiɛtɛi kɛ anunyam, ni asaŋ obiii akɛ ahã ogbe ohenyɛlɔi aloo ahã owala sɛɛ atsɛ tete, shi moŋ nɔ ni kã otsui nɔ ni obi ji akɛ aduro bo nilee kɛ hiɛshikãmɔ koni onyɛ mimaŋ ni miwo bo emaŋtsɛ lɛ nɔ okwɛ lɛ hewɔ lɛ,

¹² naa, miihã ona nilee kɛ hiɛshikãmɔ lɛ fɛɛ, ni no sɛɛ lɛ mahã ona nii kɛ jwetri kɛ anunyam fɛɛ hu bɔ ni maŋtsɛmɛi ni etsɔ̃ ohiɛ lɛ ateŋ eko kwraa naaa nakai, ni asaŋ mɛi ni baaba yɛ osɛɛ lɛ hu ateŋ mɔ ko mɔ ko naŋ nakai!”

Maŋtsɛ Solomon hewalɛ kɛ ninamɔ

¹³ Solomon shi Gibeon jamɔhe lɛ he ni Kpee Buu lɛ yɔɔ lɛ kɛba Yerusalɛm, ni ebaye Israel nɔ maŋtsɛ lɛ yɛ jɛi.

¹⁴ Solomon bua tabilɔi shwiilitsɛmɛi akpe kɛ ohai ejwɛ kɛ okpɔŋɔnɔtalɔi hu akpei nyɔŋma kɛ enyɔ anaa. Ehã amɛmli fã ko hi ehe yɛ Yerusalɛm, ni ejara fã ni shwɛ lɛ ewo maji srɔtoi komɛi amli.

¹⁵ Maŋtsɛ Solomon hã jwiɛtɛi kɛ shika hu bu tamɔ shikpɔŋ tɛ yɛ Yerusalɛm; ehã seda tso hu bu tamɔ sikamore tso ebu yɛ Israel gɔji lɛ ajɔi amli shikpɔji lɛ anɔ lɛ.

¹⁶ Maŋtsɛ Solomon okpɔŋɔi lɛ Ijipt kɛ Kilikia akɛjɛɔ. Ejarayelɔi lɛ yaheɔ amɛ kuikui kɛbaa, ni eko fɛɛ eko kɛ ejara.

¹⁷ Ni etayaa shwiilii lɛ Ijipt ashɛɔ kɛjɛɔ. Ekome jara ji jwiɛtɛi kukuji ohai ekpaa, ni okpɔŋɔ hu jara ji jwiɛtɛi kukuji oha kɛ nyɔŋmai enumɔ. Maŋtsɛ Solomon jarayelɔi nɛɛ nɔŋŋ anine nɔ tsɔ̃ɔ ni Hitbii amaŋtsɛmɛi lɛ kɛ Siria maŋtsɛmɛi lɛ fɛɛ naa tayaa shwiilii kɛ okpɔŋɔi amɛheɔ amɛ hu.