2 Korintobii 9 - ŊMALƐ KRƆŊKRƆŊ LƐ

Nihãmɔ mli jɔɔmɔ

¹ Shi nɔ ni kɔɔ sɔ̃ɔmɔ ni akɛyaasɔ̃mɔ krɔŋkrɔŋbii lɛ he lɛ, ehĩaaa akɛ maŋma nyɛ nɔ ko.

² Ejaakɛ mile bɔ ni nyɛna he tsui ni mishwãa mifɔ̃ɔ nyɛnɔ mitsɔ̃ɔ Makedoniabii lɛ akɛ Akaiabii esaa amɛhe amɛto kɛjɛ nyɛsɛɛ afi lɛ beebe; ni nyɛmɔdɛŋbɔɔ lɛ ewo mɛi pii ahiɛdɔɔ.

³ Shi mitsu nyɛmimɛi lɛ, koni wɔshwãa ni wɔshwãa wɔfɔ̃ɔ nyɛnɔ lɛ akafee yaka yɛ enɛ gbɛfaŋ, ni nyɛsaa nyɛhe bɔ ni mikɛɛ lɛ;

⁴ ni kɛ Makedoniabii lɛ kɛ mi ba lɛ, amɛkabanina nyɛ akɛ nyɛsako nyɛhe, ni wɔhiɛ, misumɔɔɔ akɛ makɛɛ akɛ nyɛ nyɛhiɛ bagboi yɛ wɔhiɛ ni wɔkɛfɔ̃ nyɛnɔ nɛɛ mli.

⁵ No hewɔ lɛ, mijwɛŋ akɛ ehĩa akɛ makpa nyɛmimɛi lɛ afai ni amɛtsɔ̃ mihiɛ kɛba nyɛŋɔɔ ni amɛbasaa nɛkɛ nyɛjɔɔmɔ ni awo shi momo nɛɛ amɛto koni efee klalo akɛ jɔɔmɔ nɔ ko shi jeee nɔ ko ni akɛ hiɛjoomɔ miishɔ̃ yɛ nyɛdɛŋ.

⁶ Shi enɛ mikɛɔ akɛ, mɔ ni lɛteɔ nii ahe duɔ lɛ, ekɛ helɛtemɔ hu aaakpa; ni mɔ ni duɔ yɛ jɔɔmɔ mli lɛ, jɔɔmɔ mli nɔŋŋ eeekpa yɛ.

⁷ Mɔ fɛɛ mɔ ahã bɔ ni ekpɛ mli momo yɛ etsui mli, ni ekajɛ ŋkɔmɔyeli loo nɔnyɛɛ mli, ejaakɛ tsuijurɔnaa halɔ Nyɔŋmɔ sumɔɔ.

⁸ Shi Nyɔŋmɔ yɛ hewalɛ akɛ eeehã dromɔ fɛɛ atɛke nɔ ahã nyɛ, koni nyɛhe atua nyɛ kwraa yɛ nɔ fɛɛ nɔ mli daa nɛɛ ni nyɛna nii kɛtɛke nɔ hã nitsumɔ kpakpa fɛɛ nitsumɔ kpakpa;

⁹ tamɔ bɔ ni aŋma lɛ akɛ, “Egbɛɔ eshwãa ehãa ohiafoi lɛ; ejalɛ lɛ hiɔ shi kɛyaa naanɔ.”

¹⁰ Shi mɔ ni kɛ dumɔwui keɔ dulɔ ni ekɛ aboloo hu hãa yeli lɛ, eeehã nyɛ dumɔwui ni afa, ni eeehã nyɛjalɛ yibii lɛ hu ashwere;

¹¹ ni nyɛtsɔ̃mɔ niiatsɛmɛi yɛ nɔ fɛɛ nɔ mli, ni nyɛfee mlihilɔi kwraa, ni nyɛmlihilɛ lɛ ahã atsɔ wɔnɔ akɛ shidaa aha Nyɔŋmɔ;

¹² ejaakɛ nɛkɛ yelikɛbuamɔ nɛɛ he sɔ̃ɔmɔ lɛ, jeee fɛnemɔ kɛkɛ efɛneɔ krɔŋkrɔŋbii lɛ yɛ fimɔ mli, shi moŋ ehãa adaa Nyɔŋmɔ shi babaoo kɛtɛkeɔ nɔ hu.

¹³ Ejaakɛ odase kpakpa ni nɛkɛ sɔ̃ɔmɔ nɛɛ yeɔ lɛ hãa amɛwoɔ Nyɔŋmɔ hiɛ nyam yɛ ye ni nyɛyeɔ Kristo Sanekpakpa ni nyɛjajeɔ lɛ nɔ, kɛ mlihilɛ ni nyɛkɛyeɔ nyɛbuaa amɛ kɛ mɛi fɛɛ lɛ hewɔ,

¹⁴ ni amɛbaasɔle amɛhã nyɛ, ni amɛbaashwe nyɛ yɛ Nyɔŋmɔ dromɔ ni yɔɔ nyɛnɔ kɛtɛke nɔ lɛ hewɔ.

¹⁵ Shi shidaa ahã Nyɔŋmɔ yɛ enikeenii ni anyɛŋ agba lɛ hewɔ!