2 Korintobii 4 - ŊMALƐ KRƆŊKRƆŊ LƐ

Mumɔŋ jwetri yɛ su kpuji amli

¹ No hewɔ lɛ, akɛni akɛ sɔ̃ɔmɔ nɛɛ ehã wɔ yɛ Nyɔŋmɔ mɔbɔnalɛ naa lɛ, wɔnijiaŋ ejeee wui,

² shi wɔkwa hiɛgbejianii ni akɛtee lɛ, ni wɔbaaa wɔjeŋ yɛ kutumpɔo mli; ni asaŋ wɔkɛ nibii futuuu Nyɔŋmɔ wiemɔ lɛ, shi moŋ wɔkɛ anɔkwale lɛ wiemɔ faŋŋ jieɔ wɔhe yi wɔtsɔ̃ɔ gbɔmɔ fɛɛ gbɔmɔ henilee yɛ Nyɔŋmɔ hiɛ.

³ Shi kɛ ha aha wɔsanekpakpa lɛ hiɛ tete lɛ, mɛi ni laajeɔ lɛ amli kɛkɛ aha hiɛ yɛ,

⁴ amɛ ji mɛi amli ni je nɛɛ mli nyɔŋmɔ lɛ eshwila mɛi ni heee yeee lɛ ajwɛŋmɔi lɛ yɛ, koni Kristo ni ji Nyɔŋmɔ subaŋ lɛ anunyam Sanekpakpa la lɛ akakpɛ miihã amɛ.

⁵ Ejaakɛ jeee wɔ diɛŋtsɛ wɔhe wɔshiɛɔ, shi moŋ Kristo Yesu akɛ Nuŋtsɔ, kɛ wɔ hu akɛ nyɛtsuji yɛ Yesu hewɔ;

⁶ ejaakɛ Nyɔŋmɔ ni kɛɛ akɛ la ajɛ duŋ mli akpɛ lɛ, lɛ nɔŋŋ ekpɛ yɛ wɔtsuii amli hu, koni Nyɔŋmɔ anunyam he nilee la lɛ akpɛ yɛ Yesu Kristo hiɛ.

⁷ Shi wɔhiɛ nɛkɛ jwetri nɛɛ yɛ su kpuji amli, koni hewalɛ ni fa kɛtɛke nɔ lɛ afee Nyɔŋmɔ nɔ, ni jeee wɔnɔ.

⁸ Afĩfĩaa wɔ yɛ he fɛɛ he, shi kɛ̃lɛ wɔtsui esuuu; wɔfeɔ yaa, shi kɛ̃lɛ wɔnijiaŋ ejeko wui,

⁹ awaa wɔ yi, shi kɛ̃lɛ akwako wɔ; atswiaa wɔ shi, shi kɛ̃lɛ wɔpleneko.

¹⁰ Daa nɛɛ wɔhiɛ Yesu gbele lɛ yɛ wɔgbɔmɔtso lɛ mli kɛnyiɛ, koni Yesu wala lɛ hu aje kpo yɛ wɔgbɔmɔtso lɛ mli.

¹¹ Ejaakɛ wɔ ni wɔhiɛ kãmɔ nɛɛ, daa nɛɛ atu wɔ awo gbele dɛŋ yɛ Yesu hewɔ, koni Yesu wala lɛ hu aje kpo yɛ wɔgbɔmɔtsei ni baagboi lɛ amli.

¹² No hewɔ lɛ, agbɛnɛ gbele tsuɔ nii yɛ wɔmli, shi nyɛ lɛ, wala tsuɔ nii yɛ nyɛmli.

¹³ Shi akɛni wɔyɔɔ nakai hemɔkɛyeli mumɔ lɛ nɔŋŋ hewɔ lɛ, tamɔ bɔ ni aŋma akɛ, “Mihe miye hewɔ ni miwie” lɛ, wɔ hu wɔheɔ wɔyeɔ, ni no hewɔ lɛ, wɔwieɔ;

¹⁴ ejaakɛ wɔle akɛ mɔ ni tee Nuŋtsɔ Yesu shi lɛ, eeetee wɔ kɛ Yesu shi, ni ekɛ wɔ kɛ nyɛ fɛɛ aaadamɔ lɛ Nyɔŋmɔ lɛ ehiɛ.

¹⁵ Ejaakɛ nyɛhewɔ afeɔ fɛɛ, koni dromɔ ni fa babaoo lɛ atsɔ̃ mɛi pii ashidaa nɔ atɛke nɔ ahã Nyɔŋmɔ hiɛnyamwoo.

Wɔnyiɛɔ yɛ hemɔkɛyeli naa

¹⁶ No hewɔ ni wɔtsui efãaa lɛ, shi moŋ kɛ wɔkponɔgbɛ gbɔmɔ lɛ fiteɔ kwraa tete lɛ, kɛ̃lɛ wɔmli gbɔmɔ lɛ tsɔ̃ɔ ehee gbi fɛɛ gbi.

¹⁷ Ejaakɛ wɔmanehulu ni jaraaa ni asaŋ esɛɛ etsɛɛɛ nɛɛ, baahã wɔna naanɔ anunyam kpele ni jara wa aahu;

¹⁸ ejaakɛ wɔjeee mɛi ni kwɛɔ nii ni anaa lɛ, shi moŋ nii ni anaaa lɛ wɔkwɛɔ; ejaakɛ nii ni anaa lɛ hiɔ shi be fioo kɛkɛ, shi nii ni anaaa lɛ hiɔ shi kɛyashiɔ naanɔ.