2 Korintobii 3 - ŊMALƐ KRƆŊKRƆŊ LƐ

Kpãŋmɔ Hee lɛ sɔ̃ɔlɔi

¹ Aso wɔbɔ̃i wɔhe yijiemɔ ekoŋŋ? Aloo ehĩa wɔ akɛ wɔhiɛɔ yijiemɔ woji kɛbahãa nyɛ loo kɛjɛɔ nyɛdɛŋ tamɔ bɔ ni ehĩaa mɛi komɛi lɛ lo?

² Nyɛ diɛŋtsɛ ji wɔwolo ni aŋma yɛ wɔtsuii amli ni mɛi fɛɛ le ni amɛkaneɔ lɛ,

³ ni ajie nyɛ faŋŋ atsɔ̃ɔ akɛ nyɛ ji Kristo wolo ni wɔsɔ̃mɔɔ yɛ he, ni jeee blɛgi akɛŋma, shi moŋ Nyɔŋmɔ hiɛkãalɔ lɛ Mumɔ lɛ, jeee yɛ tɛi tɛtɛrɛi anɔ, shi moŋ yɛ tsuii ni ji heloo taoi anɔ.

⁴ Shi Kristo hewɔ wɔkɛ wɔhiɛ fɔ̃ɔ Nyɔŋmɔ nɔ nɛɛ.

⁵ Jeee akɛ wɔsa yɛ wɔnyɛmɔ naa, ní wɔɔjwɛŋ akɛ nɔ ko jɛ wɔ diɛŋtsɛ wɔmli, shi wɔsalɛ lɛ Nyɔŋmɔ mli ejɛ;

⁶ lɛ ehã wɔtsɔ̃mɔ mɛi ni sa akɛ akɛfee kpãŋmɔ hee lɛ sɔ̃ɔlɔi, jeee nɔ ni aŋma shi moŋ Mumɔ nɔ; ejaakɛ nɔ ni aŋma lɛ gbeɔ mɔ; shi Mumɔ lɛ hãa mɔ yi naa wala.

⁷ Shi kɛ gbele sɔ̃ɔmɔ ni akpɛ yɛ tɛi tɛtɛrɛi anɔ lɛ yɛ nyam bɔ ni Israelbii lɛ nyɛɛɛ Mose hiɛ akwɛ yɛ ehiɛ nyam ni sɛɛ foɔ lɛ hewɔ po lɛ,

⁸ ani Mumɔ sɔ̃ɔmɔ lɛ efeŋ nyam fe no?

⁹ Ejaakɛ kɛ fɔbuu sɔ̃ɔmɔ lɛ yɛ nyam lɛ, ani jalɛ sɔ̃ɔmɔ lɛ efeŋ nyam kɛtekeŋ nɔ aahu?

¹⁰ Ejaakɛ anunyam lɛ ni fa babaoo tsɔ̃ lɛ hewɔ lɛ, nɔ ni yɔɔ nyam lɛ bɛ nyam yɛ enɛ gbɛfaŋ.

¹¹ Ejaakɛ kɛ nɔ ni hoɔ kɛyaa lɛ yɛ nyam lɛ, belɛ nɔ ni hiɔ shi lɛ yɛ nyam aahu fe no.

¹² Agbɛnɛ akɛni wɔyɔɔ nɛkɛ hiɛnɔkãmɔ nɛɛ hewɔ lɛ, wɔfeɔ ekãa babaoo,

¹³ ni wɔfeee tamɔ Mose ni kɛ hiɛhaanɔ ha ehiɛ, koni Israelbii lɛ akwɛ nɔ ni hoɔ kɛyaa lɛ naagbee lɛ.

¹⁴ Shi moŋ aŋa amɛjwɛŋmɔ naa. Ejaakɛ kɛbashi ŋmɛnɛ gbi nɛɛ nɔ lɛ nakai hiɛhaanɔ lɛ nɔŋŋ ha kpãŋmɔ momo lɛ kanemɔ lɛ nɔ; ajieko shi akɛ Kristo mli esɛɛ foɔ yɛ.

¹⁵ Shi kɛbashi ŋmɛnɛ gbi nɛɛ nɔ lɛ, be fɛɛ be ni akaneɔ Mose wolo lɛ, hiɛhaanɔ ha amɛtsui nɔ;

¹⁶ shi kɛ amɛku amɛsɛɛ kɛba Nuŋtsɔ lɛ ŋɔɔ lɛ, aaajie hiɛhaanɔ lɛ.

¹⁷ Shi Nuŋtsɔ lɛ ji Mumɔ lɛ, ni he ni Nuŋtsɔ lɛ Mumɔ lɛ yɔɔ lɛ, jɛi heyeli yɔɔ.

¹⁸ Shi wɔ fɛɛ ni wɔkɛ hiɛ kpetekplee kwɛɔ Nuŋtsɔ lɛ anunyam lɛ tamɔ akwɛɔ ashwishwɛ mli lɛ, wɔmiitsake wɔmiitsɔ̃mɔ nakai subaŋ lɛ nɔŋŋ kɛmiijɛ anunyam mli kɛmiiya anunyam mli, tamɔ bɔ ni ejeɔ Nuŋtsɔ ni ji Mumɔ lɛ ŋɔɔ lɛ.