2 Korintobii 2 - ŊMALƐ KRƆŊKRƆŊ LƐ

¹ Shi mikpɛ mli yɛ mi diɛŋtsɛ miyiŋ akɛ mikɛ ŋkɔmɔyeli baŋ nyɛŋɔɔ dɔŋŋ.

² Ejaakɛ kɛ mihã nyɛye ŋkɔmɔ lɛ, namɔ baashɛje mimii akɛ mɔ nɔŋŋ ni mihã eye ŋkɔmɔ lɛ?

³ Ni miŋma nyɛ nɛkɛ nii nɛɛ nɔŋŋ, koni kɛ miba lɛ, mɛi ni kulɛ sa akɛ amɛhã mimii ashɛ mihe lɛ akahã miye ŋkɔmɔ, ejaakɛ mihiɛ kã nyɛ fɛɛ nyɛnɔ akɛ nyɛaana akɛ mimiishɛɛ ji nyɛ fɛɛ nyɛmiishɛɛ.

⁴ Shi mijɛ hejaramɔ pii kɛ tsuiyeli babaoo mli mikɛ yaafonui babaoo ŋma nyɛ, jeee ni nyɛwerɛ aho nyɛhe, shi moŋ ni nyɛna suɔmɔ babaoo ni misumɔɔ nyɛ.

Mɔ ni etɔ̃ yɛ nyɛteŋ lɛ akɛfa lɛ

⁵ Shi kɛ mɔ ko ehã aye ŋkɔmɔ lɛ, jeee mi ni ehã miye ŋkɔmɔ lɛ, shi, bɔ ni afee ni minaa akaya shɔŋŋ lɛ, ehã nyɛ fɛɛ nyɛye ŋkɔmɔ ko kɛ̃.

⁶ Nakai mɔ lɛ, ehiɛ ni mɛi pii ekã lɛ fa hã lɛ;

⁷ hewɔ lɛ agbɛnɛ nyɛkɛfaa lɛ moŋ ni nyɛshɛjea emii koni ŋkɔmɔyeli tuutu lɛ akahã enijiaŋ je wui.

⁸ No hewɔ lɛ, miikpa nyɛ fai ni nyɛma nyɛsuɔmɔ lɛ nɔ mi nyɛhã lɛ;

⁹ ejaakɛ enɛ hewɔ hu ni miŋma nyɛ wolo lɛ, koni mikɛna nɔ gbɔmɛi ni ji nyɛ, akɛ nyɛboɔ toi yɛ nɔ fɛɛ nɔ gbɛfaŋ lo.

¹⁰ Shi mɔ ni nyɛkɛ nɔ ko faa lɛ lɛ, mi hu mikɛfaa lɛ; ejaakɛ mi hu, nɔ ni mikɛfa lɛ, kɛ mikɛ nɔ ko efa lɛ, mikɛfa yɛ nyɛhewɔ yɛ Kristo hiɛ;

¹¹ koni Satan nine akashɛ wɔnɔ, ejaakɛ wɔle eŋaatsɔ̃i lɛ.

¹² Shi be ni miba Troia ni mibashiɛ Kristo Sanekpakpa lɛ ni agbele gbɛ ahã mi yɛ Nuŋtsɔ lɛ mli lɛ,

¹³ minaaa hejɔlɛ yɛ mimumɔ mli, ejaakɛ minaaa minyɛmi Tito hewɔ lɛ mishɛ amɛ, ni miyiŋ kɛtee Makedonia.

Kunimyeli yɛ Kristo mli

¹⁴ Shi shidaa ahã Nyɔŋmɔ, mɔ ni tsɔ̃ɔ Yesu Kristo nɔ nyiɛɔ wɔhiɛ be fɛɛ be yɛ ekunimyeli lɛ mli lɛ, ni etsɔ̃ɔ wɔnɔ ehãa enilee ŋmajee lɛ jeɔ kpo yɛ he fɛɛ he lɛ.

¹⁵ Ejaakɛ Kristo ŋmajee ni ekɛhãa Nyɔŋmɔ ji wɔ yɛ mɛi ni ahereɔ amɛyiwala lɛ kɛ mɛi ni laajeɔ lɛ fɛɛ ateŋ,

¹⁶ mɛi ni laajeɔ lɛ, eji gbele ŋma ni kɛ mɔ yaa gbele mli hã amɛ; shi mɛi krokomɛi lɛ, eji wala ŋma ni kɛ mɔ yaa wala mli hã amɛ. Ni namɔ sa hã nɛkɛ nitsumɔ?

¹⁷ Ejaakɛ wɔtamɔɔɔ mɛi pii ni kɛ nibii krokomɛi futuɔ Nyɔŋmɔ wiemɔ lɛ mli lɛ, shi moŋ wɔwieɔ lɛ ŋmiiŋmi bɔ ni ejɛ Nyɔŋmɔ ŋɔɔ lɛ yɛ Nyɔŋmɔ hiɛ, yɛ Kristo mli.