2 Korintobii 13 - ŊMALƐ KRƆŊKRƆŊ LƐ

Naagbee kɔkɔbɔɔ kɛ ŋaawoo

¹ Nyɛŋɔɔ ni mibaa nɛɛ ji nɔ ni ji shii etɛ̃. Odasefoi enyɔ loo etɛ̃ adaaŋ wiemɔ naa lɛ sane fɛɛ sane ama shi.

² Mɛi ni efee esha sa lɛ kɛ mɛi ni eshwɛ lɛ fɛɛ, mikɛɛ amɛ mito momo, ni asaŋ miikɛɛ amɛ mato be mli ni mibɛ nyɛŋɔɔ nɛɛ akɛ, tamɔ bɔ ni mikɛɛ be ni miba nyɛŋɔɔ nɔ ni ji shi enyɔ lɛ, kɛ miba ekoŋŋ lɛ mikɛ amɛhe ekeŋ amɛ,

³ ejaakɛ nyɛmiitao naakpɛɛ okadi ko ni nyɛkɛaana akɛ Kristo wieɔ yɛ mimli, Kristo mɔ ni gbedeee yɛ nyɛmli, shi moŋ ehe waa yɛ nyɛmli lɛ.

⁴ Ejaakɛ asɛŋ lɛ yɛ gbedemɔ mli, shi Nyɔŋmɔ hewalɛ naa lɛ, ehiɛ kã; ni wɔ hu wɔgbedeɔ yɛ emli; shi Nyɔŋmɔ hewalɛ lɛ naa lɛ, wɔ kɛ lɛ hiɛ aaakãmɔ ahã nyɛ.

⁵ Nyɛkaa nyɛ diɛŋtsɛ nyɛhe nyɛkwɛa akɛ nyɛyɛ hemɔkɛyeli lɛ mli lo? Nyɛtaoa nyɛ diɛŋtsɛ nyɛmli nyɛkwɛa. Aloo nyɛleee yɛ nyɛ diɛŋtsɛ nyɛhe akɛ Yesu Kristo yɛ nyɛmli? Kɛ nyɛleee nakai lɛ, mɛi ni esaaa kwraa ji nyɛ.

⁶ Shi mihiɛ kã nɔ akɛ nyɛaale akɛ wɔ lɛ wɔjeee mɛi ni esaaa.

⁷ Shi miikpa Nyɔŋmɔ fai, koni nyɛkafee nɔ ko fɔŋ ko kwraa, jeee koni wɔ lɛ wɔfee tamɔ mɛi ni sa hewɔŋ, shi moŋ koni nyɛ lɛ nyɛfee ekpakpa, ni wɔ lɛ wɔfee tamɔ mɛi ni esaaa.

⁸ Ejaakɛ wɔnyɛŋ nɔ ko wɔfee wɔshi anɔkwale lɛ, shi moŋ kɛ nɔ ko wɔɔfee lɛ, wɔɔfee wɔhã anɔkwale lɛ.

⁹ Ejaakɛ wɔnaa miishɛɛ kɛ wɔfee gbedee ni nyɛ lɛ nyɛyɛ hewalɛ lɛ; shi nɔ he fai ni wɔkpaa ji nyɛ emuuyeli.

¹⁰ No hewɔ hu ni miŋmaa enɛ be ni mibɛ nyɛŋɔɔ nɛɛ, koni kɛ miba nyɛŋɔɔ lɛ, mikɛ nyɛ akaye waa, yɛ hegbɛ ni Nuŋtsɔ lɛ ehã mi ni mikɛsaa shi jeee ni mikɛfite lɛ naa.

¹¹ Naagbee lɛ, anyɛmimɛi, nyɛmii ashɛa, nyɛyea emuu, nyɛshɛjea nyɛhe mii, nyɛjwɛŋmɔ afea ekome, nyɛhĩa shi yɛ hejɔlɛ mli, ni suɔmɔ kɛ hejɔlɛ Nyɔŋmɔ lɛ kɛ nyɛ aaahi shi.

¹² Nyɛŋaŋaa nyɛhe kɛ naashwɔmɔ krɔŋkrɔŋ. Mɛi krɔŋkrɔŋi lɛ fɛɛ miibi nyɛ.

¹³ Nuŋtsɔ Yesu Kristo dromɔ lɛ kɛ Nyɔŋmɔ suɔmɔ lɛ Kɛ Mumɔ Krɔŋkrɔŋ naanyobɔɔ lɛ kɛ nyɛ fɛɛ ahi shi. Amen.