2 Korintobii 1 - ŊMALƐ KRƆŊKRƆŊ LƐ

Ŋamɔ

¹ Paulo, ni ji Kristo Yesu bɔfo yɛ Nyɔŋmɔ suɔmɔ naa lɛ, kɛ wɔnyɛmi Timoteo lɛ ŋma wolo nɛɛ yahã Nyɔŋmɔ asafo ni yɔɔ Korinto lɛ kɛ hetselɔi lɛ fɛɛ ni yɔɔ Akaia muu lɛ fɛɛ lɛ.

² Dromɔ kɛ hejɔlɛ ni jɛ wɔTsɛ Nyɔŋmɔ lɛ kɛ wɔNuŋtsɔ Yesu Kristo dɛŋ lɛ ahã nyɛ.

Paulo daa Nyɔŋmɔ shi yɛ yelikɛbuamɔ hewɔ

³ Ajɔɔ Nyɔŋmɔ, wɔNuŋtsɔ Yesu Kristo Tsɛ lɛ, mɔ ni ji musuŋtsɔlɛtsɛ kɛ miishɛjemɔ fɛɛ Nyɔŋmɔ lɛ.

⁴ Eshɛjeɔ wɔmii yɛ wɔmanehului lɛ fɛɛ mli, koni wɔ hu wɔnyɛ wɔkɛ miishɛjemɔ ni Nyɔŋmɔ kɛshɛjeɔ wɔ diɛŋtsɛ wɔmii lɛ ashɛje mɛi ni naa amanehulu lɛ amii.

⁵ Ejaakɛ bɔ ni Kristo amanehului lɛ baa wɔnɔ kɛtɛkeɔ nɔ lɛ, nakai nɔŋŋ kɛ̃ Kristo hewɔ lɛ wɔmiishɛjemɔ hu faa kɛtɛkeɔ nɔ.

⁶ Shi kɛji amanehulu wɔna jiŋŋ, nyɛmiishɛjemɔ kɛ yiwalaheremɔ hewɔ ni; ni kɛji wɔmii ashɛjeɔ hu jiŋŋ, nyɛmiishɛjemɔ ni hãa nyɛkɛ tsuishitoo mĩaa nyɛhiɛ kɛnaa nakai amanehului ni wɔnaa lɛ nɔŋŋ hewɔ ni.

⁷ Ni wɔhiɛ ni kã nyɛnɔ lɛ gbugbãaa, ejaakɛ wɔle akɛ bɔ ni nyɛnaa amanehului lɛ eko lɛ, nakai nɔŋŋ kɛ̃ nyɛnaa miishɛjemɔ lɛ hu eko.

⁸ Ejaakɛ anyɛmimɛi, wɔsumɔɔɔ akɛ wɔkɛ wɔmanehului ni wɔna yɛ Asia lɛ atee nyɛ, akɛ wɔna nɔ tsɔ̃ fe bɔ ni wɔɔnyɛ po, ni wɔhiɛ kãaa wala nɔ tete,

⁹ shi moŋ wɔ diɛŋtsɛ wɔna faŋŋ akɛ gbele fɔbuu kã wɔnɔ, koni wɔkɛ wɔhiɛ akafɔ̃ wɔ diɛŋtsɛ wɔhe nɔ, shi moŋ wɔkɛfɔ̃ Nyɔŋmɔ ni teɔ gbohii ashi lɛ nɔ;

¹⁰ Nyɔŋmɔ ni jie wɔ kɛjɛ gbele ni yɔɔ gbeyei tamɔ nɛkɛ nɛɛ mli, ni ebaajie wɔ, ni wɔhiɛ kã nɔ akɛ ebaaya nɔ ejie wɔ,

¹¹ kɛji nyɛfata he kɛkpa fai nyɛhã wɔ, koni mɛi pii ada shi ahã wɔ yɛ dromɔ keenii ni akɛhã wɔ yɛ mɛi pii afaikpamɔ lɛ hewɔ.

Paulo tsake egbɛfãa lɛ he gbɛjianɔtoo

¹² Shi wɔshwãa lɛ nɛ: wɔhenilee odase ni eyeɔ wɔ akɛ hetsemɔ kɛ tsui krɔŋŋ yɛ Nyɔŋmɔ hiɛ wɔkɛba wɔjeŋ yɛ je nɛɛ mli, titri lɛ yɛ wɔkɛ nyɛteŋ shihilɛ mli, ni jeee heloo gbɛfãŋ nilee naa, shi moŋ Nyɔŋmɔ dromɔ naa.

¹³ Ejaakɛ wɔŋmaaa nyɛ nibii krokomɛi fe nii ni nyɛkaneɔ ni asaŋ nyɛle, ni mihiɛ kã nɔ akɛ nyɛaale kɛwula shi hu,

¹⁴ tamɔ bɔ ni nyɛna nyɛle wɔ hu fã kɛ fã akɛ nyɛshwãanɔ ji wɔ, tamɔ bɔ ni nyɛ hu nyɛ ji wɔshwãanɔ yɛ Nuŋtsɔ Yesu Kristo Gbi lɛ nɔ lɛ.

¹⁵ Enɛ nɔ mikɛ mihiɛ fɔ̃ hewɔ mito miyiŋ akɛ maba nyɛŋɔɔ tsutsu lɛ koni nyɛna dromɔ shii enyɔ,

¹⁶ no ji, ni mibatsɔ̃ nyɛŋɔɔ kɛya Makedonia, ni asaŋ maku misɛɛ kɛjɛ Makedonia maba nyɛŋɔɔ ekoŋŋ, koni nyɛyajie mi gbɛ kɛya Yudea.

¹⁷ Belɛ ni mito miyiŋ nakai lɛ, yiŋ flɛflɛ mikɛfee? Aloo miyiŋ ni mito lɛ, gbɔmɔ jwɛŋmɔ mikɛto, ni makɛɛ “hɛɛ”, “hɛɛ”, kɛ “dabi” “dabi”, fɛɛ shi kome?

¹⁸ Shi anɔkwafo ji Nyɔŋmɔ akɛ wɔwiemɔ ni wɔkɛ nyɛ wie lɛ ejeee nɔ ni kɛɔ “hɛɛ” kɛ “dabi” fɛɛ shi kome.

¹⁹ Ejaakɛ Nyɔŋmɔ Bi Yesu Kristo mɔ ni mikɛ Silvano kɛ Timoteo shiɛ ehe sane yɛ nyɛteŋ lɛ, ejeee “hɛɛ” kɛ “dabi” fɛɛ shi kome, shi moŋ eji “hɛɛ”.

²⁰ Ejaakɛ lɛ ji Nyɔŋmɔ shiwoi abɔ ni yɔɔ nɛɛ fɛɛ “hɛɛ”; ni no hewɔ wɔtsɔ̃ɔ enɔ wɔkɛɔ “Amen” kɛwoɔ Nyɔŋmɔ hiɛ nyam lɛ.

²¹ Shi Nyɔŋmɔ ji mɔ ni hãa wɔ kɛ nyɛ fɛɛ fiɔ shi yɛ Kristo mli, ni efɔ wɔ mu;

²² lɛ nɔŋŋ esɔo wɔnaa, ni ekɛ Mumɔ lɛ ehã wɔ akɛ yibaafoo nɔ yɛ wɔtsuii amli hu.

²³ Shi mi lɛ, miitsɛ Nyɔŋmɔ ni ebaye odase eshi mi kɛji ejeee anɔkwale akɛ nyɛyibaamɔ hewɔ minako maba Korinto lɛ.

²⁴ Jeee akɛ nyɛhemɔkɛyeli lɛ nyɔŋ wɔyeɔ, ejaakɛ nyɛdamɔ shi shiŋŋ yɛ hemɔkɛyeli lɛ mli, shi moŋ wɔfata nyɛhe kɛmiitsu nii kɛhã nyɛmiishɛɛnamɔ.