1 Yohane 5 - ŊMALƐ KRƆŊKRƆŊ LƐ

¹ Mɔ fɛɛ mɔ ni heɔ yeɔ akɛ Yesu ji Kristo lɛ, Nyɔŋmɔ fɔ lɛ. Ni mɔ fɛɛ mɔ ni sumɔɔ mɔ ni fɔ lɛ lɛ, esumɔɔ mɔ ni efɔ lɛ hu.

Yesu Kristo he odaseyeli

² Kɛji wɔsumɔɔ Nyɔŋmɔ ni wɔyeɔ ekitãi lɛ anɔ lɛ, no wɔkɛleɔ akɛ wɔsumɔɔ Nyɔŋmɔ bii lɛ.

³ Ejaakɛ enɛ ji suɔmɔ ni wɔkɛsumɔɔ Nyɔŋmɔ lɛ akɛ wɔye ekitãi lɛ anɔ; ni ekitãi lɛ waaa,

⁴ ejaakɛ nɔ fɛɛ nɔ ni Nyɔŋmɔ fɔ lɛ, eyeɔ je lɛ nɔ kunim; ni kunim ni wɔye je lɛ nɔ ji wɔhemɔkɛyeli.

⁵ Ni namɔ ji mɔ ni yeɔ je lɛ nɔ kunim lɛ, akɛ ja mɔ ni heɔ yeɔ akɛ Yesu ji Nyɔŋmɔ Bi lɛ?

⁶ Yesu Kristo ji mɔ ni tsɔ̃ nu kɛ lá mli kɛba, jeee nu kɛkɛ mli, shi moŋ nu kɛ lá mli. Ni Mumɔ lɛ ji mɔ ni yeɔ odase lɛ, ejaakɛ Mumɔ lɛ ji anɔkwale lɛ.

⁷ Shi mɛi etɛ̃ ji mɛi ni yeɔ odase lɛ, ejaakɛ Mumɔ lɛ ji anɔkwale lɛ.

⁸ Mumɔ lɛ kɛ nu lɛ kɛ lá lɛ, ni mɛi etɛ̃ nɛɛ feɔ ekome.

⁹ Kɛji wɔhe gbɔmɛi odase lɛ wɔye lɛ, Nyɔŋmɔ odase lɛ da fe no; ni Nyɔŋmɔ odase lɛ ji akɛ eye odase yɛ eBi lɛ he.

¹⁰ Mɔ ni heɔ Nyɔŋmɔ Bi lɛ eyeɔ lɛ, eyɛ odase yɛ lɛ diɛŋtsɛ emli, mɔ ni heee Nyɔŋmɔ eyeee lɛ, ehã Nyɔŋmɔ etsɔ̃ amalelɔ, ejaakɛ eheko odase ni Nyɔŋmɔ ye yɛ eBi lɛ he lɛ eyeko.

¹¹ Ni enɛ ji odase lɛ, akɛ Nyɔŋmɔ kɛ naanɔ wala ehã wɔ, ni nɛkɛ wala nɛɛ yɛ eBi lɛ mli.

¹² Mɔ ni yɔɔ Bi lɛ, eyɛ wala; mɔ ni bɛ Nyɔŋmɔ Bi lɛ, ebɛ wala hu.

Naanɔ wala

¹³ Miiŋma nyɛ nii nɛɛ, koni nyɛ mɛi ni nyɛheɔ Nyɔŋmɔ Bi lɛ gbɛi lɛ nɔ nyɛyeɔ lɛ, nyɛna nyɛle akɛ nyɛyɛ naanɔ wala.

¹⁴ Ni ekãa ni wɔyɔɔ yɛ ehiɛ lɛ ji akɛ, kɛji wɔba nɔ ko yɛ esuɔmɔ naa lɛ, eboɔ wɔ toi.

¹⁵ Ni kɛji wɔle akɛ nɔ fɛɛ nɔ ni wɔbaa lɛ lɛ, eboɔ wɔ toi lɛ, belɛ wɔle akɛ nii ni wɔba lɛ lɛ, wɔnine eshɛ nɔ.

¹⁶ Kɛji mɔ ko na enyɛmi miifee esha ni jeee esha ni kɛ mɔ yaa gbele mli lɛ, eba Nyɔŋmɔ, ni eeehã lɛ wala, no ji mɛi ni feɔ esha ni jeee esha ni kɛ mɔ yaa gbele mli lɛ. Esha ko yɛ ni kɛ mɔ yaa gbele mli; jeee enɛ hewɔ mikɛɔ akɛ eba Nyɔŋmɔ.

¹⁷ Nɔ fɛɛ nɔ ni ejaaa gbɛ lɛ esha ni, shi esha ko yɛ ni kɛ mɔ eyaaa gbele mli.

¹⁸ Wɔle akɛ mɔ fɛɛ mɔ ni Nyɔŋmɔ fɔ lɛ lɛ, efeee esha; shi moŋ mɔ ni Nyɔŋmɔ fɔ lɛ lɛ, ekwɛɔ ehe nɔ, ni mɔ fɔŋ lɛ etaaa ehe.

¹⁹ Wɔle akɛ wɔjɛ Nyɔŋmɔ mli, ni jeŋ muu lɛ fɛɛ yɛ efɔŋ nɔyeli shishi.

²⁰ Wɔle akɛ Nyɔŋmɔ Bi lɛ eba, ni ehã wɔ jwɛŋmɔ koni wɔle anɔkwafo lɛ. Ni wɔyɛ anɔkwafo lɛ mli, yɛ eBi Yesu Kristo lɛ mli, mɔ ni ji anɔkwa Nyɔŋmɔ lɛ kɛ naanɔ wala lɛ.

²¹ Mibii bibii, nyɛkwɛa nyɛhe ni ahĩa yɛ wɔji ahe.