1 Yohane 4 - ŊMALƐ KRƆŊKRƆŊ LƐ

Anɔkwale mumɔ lɛ kɛ shishiumɔ mumɔ lɛ

¹ Suɔmɔmɛi, nyɛkahea mumɔ fɛɛ mumɔ nyɛyea; shi moŋ nyɛkaa mumɔi lɛ nyɛkwɛa akɛ Nyɔŋmɔ mli amɛjɛ lo, ejaakɛ amalegbalɔi pii eba je lɛ mli.

² Enɛ nyɛkɛaayoo Nyɔŋmɔ Mumɔ lɛ. Mumɔ fɛɛ mumɔ ni jajeɔ faŋŋ akɛ Yesu Kristo eba yɛ heloo mli lɛ, Nyɔŋmɔ mli ejɛ.

³ Ni mumɔ fɛɛ mumɔ ni ejajeee akɛ Yesu Kristo eba yɛ heloo mli lɛ, jeee Nyɔŋmɔ mli ejɛ, shi moŋ no ji Kristo henyɛlɔ lɛ mumɔ lɛ ni nyɛnu ehe akɛ eeba, ni agbɛnɛ tete eyɛ je lɛ mli momo lɛ.

⁴ Mibii bibii, nyɛ lɛ nyɛjɛ Nyɔŋmɔ mli ni nyɛye amalegbalɔi lɛ anɔ kunim; ejaakɛ Mumɔ ni yɔɔ nyɛmli lɛ da fe mumɔ ni yɔɔ je lɛ mli lɛ.

⁵ Amɛ lɛ, je lɛ mli amɛjɛ, no hewɔ lɛ, amɛwieɔ akɛ mɛi ni jɛ je lɛ mli, ni je lɛ boɔ amɛ toi.

⁶ Wɔ lɛ, Nyɔŋmɔ mli wɔjɛ; mɔ ni le Nyɔŋmɔ lɛ, eboɔ wɔ toi mɔ ni jɛɛɛ Nyɔŋmɔ mli lɛ, ebooo wɔ toi. No wɔkɛyoɔ anɔkwale mumɔ lɛ kɛ shishiumɔ mumɔ lɛ.

Nyɔŋmɔ lɛ, suɔmɔ ji lɛ

⁷ Suɔmɔmɛi, nyɛhãa wɔsumɔsumɔa wɔhe; ejaakɛ suɔmɔ lɛ Nyɔŋmɔ mli ejɛ. Ni mɔ fɛɛ mɔ ni sumɔɔ mɔ lɛ, Nyɔŋmɔ fɔ lɛ ni ele Nyɔŋmɔ.

⁸ Mɔ ni sumɔɔɔ mɔ lɛ, eleee Nyɔŋmɔ; ejaakɛ Nyɔŋmɔ lɛ, suɔmɔ ji lɛ.

⁹ Enɛ mli Nyɔŋmɔ suɔmɔ ni ekɛsumɔɔ wɔ lɛ jeɔ kpo yɛ, Nyɔŋmɔ tsu lɛ diɛŋtsɛ eBi koome lɛ kɛba je lɛ mli, koni wɔtsɔ̃ enɔ wɔna wala.

¹⁰ Enɛ mli suɔmɔ lɛ yɔɔ, jeee akɛ wɔ ni wɔsumɔ Nyɔŋmɔ, shi moŋ lɛ ni esumɔ wɔ, ni etsu eBi lɛ akɛ ebafee wɔhe eshai lɛ ahe kpãtãmɔnɔ.

¹¹ Suɔmɔmɛi, kɛ Nyɔŋmɔ sumɔ wɔ nɛkɛ lɛ, esa akɛ wɔ hu wɔsumɔsumɔɔ wɔhe.

¹² Nyɔŋmɔ lɛ mɔ ko enako lɛ pɛŋ. Kɛji wɔsumɔɔ wɔhe lɛ, Nyɔŋmɔ hiɔ wɔmli, ni esuɔmɔ lɛ yeɔ emuu yɛ wɔmli.

¹³ Nɔ ni wɔkɛleɔ akɛ wɔhiɔ emli ni lɛ hu ehiɔ wɔmli ji akɛ ekɛ lɛ diɛŋtsɛ eMumɔ lɛ eko ehã wɔ.

¹⁴ Ni wɔ lɛ wɔna ni wɔmiiye odase akɛ Tsɛ lɛ etsu eBi lɛ akɛ je lɛ yiwalaherelɔ.

¹⁵ Mɔ fɛɛ mɔ ni jajeɔ faŋŋ akɛ Yesu ji Nyɔŋmɔ Bi lɛ, Nyɔŋmɔ hiɔ emli, ni lɛ hu ehiɔ Nyɔŋmɔ mli.

¹⁶ Ni wɔ lɛ wɔ́le, ni wɔ́he suɔmɔ ni Nyɔŋmɔ kɛsumɔɔ wɔ lɛ wɔye. Nyɔŋmɔ lɛ, suɔmɔ ji lɛ, ni mɔ ni hiɔ suɔmɔ mli lɛ, ehiɔ Nyɔŋmɔ mli, ni Nyɔŋmɔ hu hiɔ emli.

¹⁷ Enɛ mli suɔmɔ lɛ eye emuu yɛ, yɛ wɔmli akɛ wɔɔna ekãa yɛ Kojomɔ Gbi lɛ nɔ, ejaakɛ bɔ ni eyɔɔ lɛ, nakai wɔ hu wɔyɔɔ yɛ je nɛɛ mli.

¹⁸ Gbeyeishemɔ bɛ suɔmɔ mli, shi moŋ suɔmɔ ni eye emuu lɛ shwieɔ gbeyeishemɔ, ejaakɛ gbyeishemɔ mli yɛ piŋmɔ; ni mɔ ni sheɔ gbeyei lɛ, enako eye emuu yɛ suɔmɔ mli.

¹⁹ Wɔsumɔɔ Nyɔŋmɔ, ejaakɛ lɛ tsutsu esumɔ wɔ.

²⁰ Kɛji mɔ ko kɛɛ akɛ, “Miisumɔ Nyɔŋmɔ,” ni enyɛɔ enyɛmi lɛ, amalelɔ ji lɛ. Ejaakɛ mɔ ni sumɔɔɔ enyɛmi ni enaa lɛ lɛ, Nyɔŋmɔ ni enaaa lɛ lɛ, te aaafee tɛŋŋ ni eeenyɛ lɛ esumɔ hu?

²¹ Ni nɛkɛ kitã nɛɛ wɔna kɛjɛ eŋɔɔ, koni mɔ ni sumɔɔ Nyɔŋmɔ lɛ asumɔ enyɛmi hu.