1 Yohane 3 - ŊMALƐ KRƆŊKRƆŊ LƐ

Nyɔŋmɔ bii

¹ Nyɛkwɛa suɔmɔ bɔ sɔŋŋ ni Tsɛ lɛ kɛsumɔ wɔ, akɛ atsɛ wɔ Nyɔŋmɔ bii, ni nakai wɔji! Enɛ hewɔ lɛ, je lɛ leee wɔ, ejaakɛ eleee Nyɔŋmɔ.

² Suɔmɔmɛi, agbɛnɛ lɛ Nyɔŋmɔ bii ji wɔ, ni anako ajie nɔ ni wɔbaatsɔ̃mɔ lɛ shi; shi wɔle akɛ, be ni aaajie no shi lɛ, wɔɔtamɔ Kristo, ejaakɛ wɔɔna lɛ bɔ ni eyɔɔ.

³ Ni mɔ fɛɛ mɔ ni yɔɔ hiɛnɔkãmɔ nɛɛ yɛ emli lɛ, etsuuɔ lɛ diɛŋtsɛ ehe, tamɔ bɔ ni lɛ ehe tse lɛ.

⁴ Mɔ fɛɛ mɔ ni feɔ esha lɛ eefee mlatɔ̃mɔnii hu; ni esha lɛ mlatɔ̃mɔ ni.

⁵ Ni nyɛle akɛ Kristo jie ehe kpo, koni ewo wɔhe eshai kɛya; ni esha ko bɛ emli.

⁶ Mɔ fɛɛ mɔ ni hiɔ emli lɛ, efeee esha; mɔ fɛɛ mɔ ni feɔ esha lɛ, enako lɛ ni asaŋ eleko lɛ.

⁷ Bii bibii, nyɛkahãa mɔ ko miihã nyɛdu gbɛ. Mɔ ni tsuɔ jalɛnii lɛ, jalɔ ji lɛ, tamɔ bɔ ni lɛ hu eji jalɔ lɛ.

⁸ Mɔ ni feɔ esha lɛ, ejɛ abonsam mli; ejaakɛ kɛjɛ shishijee beebe lɛ, abonsam feɔ esha. Enɛ hewɔ Nyɔŋmɔ Bi lɛ jie ehe kpo koni efite abonsam nitsumɔi lɛ.

⁹ Mɔ fɛɛ mɔ ni Nyɔŋmɔ fɔ lɛ lɛ, efeee esha, ejaakɛ esu yɛ emli, ni enyɛŋ esha efee, ejaakɛ Nyɔŋmɔ fɔ lɛ.

¹⁰ Enɛ mli Nyɔŋmɔ bii lɛ kɛ abonsam bii lɛ jieɔ amɛhe shi faŋŋ yɛ. Mɔ fɛɛ mɔ ni tsuuu jalɛnii lɛ, ejɛɛɛ Nyɔŋmɔ mli, nakai nɔŋŋ ji mɔ ni sumɔɔɔ enyɛmi hu.

Nyɛsumɔsumɔa nyɛhe

¹¹ Ejaakɛ enɛ ji sane ni nyɛnu kɛjɛ shishijee lɛ, akɛ wɔsumɔsumɔɔ wɔhe.

¹² Jeee tamɔ Kain ni jɛ mɔ fɔŋ lɛ mli ni egbe enyɛmi lɛ. Ni mɛɛ hewɔ egbe lɛ? Ejaakɛ enitsumɔi lɛ efɔ̃ɔji ni, shi enyɛmi lɛ nɔ lɛ ja.

¹³ Anyɛmimɛi, kɛji je lɛ miinyɛ nyɛ lɛ, nyɛhiɛ akafea nyɛ yaa.

¹⁴ Wɔle akɛ wɔfo mli kɛjɛ gbele mli kɛtee wala mli, ejaakɛ wɔsumɔɔ wɔnyɛmimɛi.

¹⁵ Mɔ fɛɛ mɔ ni nyɛɔ enyɛmi lɛ, gbɔmɔgbelɔ ji lɛ; ni nyɛle akɛ gbɔmɔgbelɔ ko gbɔmɔgbelɔ ko bɛ naanɔ wala yɛ emli.

¹⁶ Enɛ mli wɔyoɔ suɔmɔ lɛ yɛ, akɛ ekɛ ewala ŋmɛ shi yɛ wɔhewɔ, ni sa akɛ wɔ hu wɔ kɛ wɔwala ŋmɛɔ shi yɛ wɔnyɛmimɛi ahewɔ.

¹⁷ Shi mɔ ni yɔɔ je nɛɛ mli nii, ni enaa akɛ efi enyɛmi, ni emli joɔ yɛ enɔ lɛ, te aaafee tɛŋŋ ni Nyɔŋmɔ suɔmɔ lɛ aaahi emliŋ?

¹⁸ Mibii bibii, nyɛkahãa wɔsumɔa mɛi yɛ wiemɔ mli loo lilɛi nɔ kɛkɛ, shi moŋ yɛ nitsumɔ kɛ anɔkwale mli hu.

Wɔnaa ekãa yɛ Nyɔŋmɔ hiɛ

¹⁹ Ni no wɔkɛaale akɛ anɔkwale lɛ mli wɔjɛ, ni wɔɔtsɛ wɔtsui wɔŋmɛ wɔmli yɛ Nyɔŋmɔ hiɛ.

²⁰ Kɛji wɔtsui buɔ wɔ fɔ lɛ, Nyɔŋmɔ da fe wɔtsui, ni ele nii fiaa.

²¹ Kɛji wɔtsui ebuuu wɔ fɔ lɛ, wɔnaa ekaã yɛ Nyɔŋmɔ hiɛ.

²² Ni nɔ fɛɛ nɔ ni wɔbaa lɛ lɛ, wɔnaa yɛ edɛŋ, ejaakɛ wɔyeɔ ekitãi lɛ anɔ, ni wɔfeɔ nii ni sa ehiɛ.

²³ Ni enɛ ji ekitã lɛ, akɛ wɔhe eBi Yesu Kristo gbɛi lɛ nɔ wɔye, ni wɔsumɔsumɔɔ wɔhe, tamɔ bɔ ni ewo wɔ kitã lɛ.

²⁴ Ni mɔ ni yeɔ ekitãi lɛ anɔ lɛ hiɔ emli, ni lɛ hu ehiɔ emli; ni nɔ ni wɔkɛleɔ akɛ ehiɔ wɔmli ji Mumɔ ni ekɛhã wɔ lɛ.