1 Yohane 2 - ŊMALƐ KRƆŊKRƆŊ LƐ

Kristo, wɔyelikɛbualɔ

¹ Mibii bibii, miiŋma nyɛ nii nɛɛ koni nyɛkafee esha. Ni kɛ mɔ ko fee esha jiŋŋ, wɔyɛ mlidaamɔlɔ yɛ Tsɛ lɛ ŋɔɔ, Yesu Kristo jalɔ lɛ.

² Lɛ ji wɔhe eshai lɛ ahe kpãtãmɔnɔ; shi jeee wɔnɔ lɛ kɛkɛ, shi moŋ jeŋ muu lɛ fɛɛ nɔ lɛ hu.

³ Ni kɛ wɔyeɔ Nyɔŋmɔ kitãi lɛ anɔ lɛ, no wɔkɛnaa akɛ wɔle lɛ.

⁴ Mɔ ni kɛɔ akɛ, “Mile lɛ,” ni eyeee ekitãi lɛ anɔ lɛ, amalelɔ ji lɛ, ni anɔkwale lɛ bɛ emli.

⁵ Shi mɔ fɛɛ mɔ ni yeɔ ewiemɔ lɛ nɔ lɛɛlɛŋ lɛ, lɛ emli Nyɔŋmɔ suɔmɔ lɛ eye emuu yɛ. Enɛ wɔkɛleɔ akɛ wɔyɛ emli.

⁶ Mɔ ni kɛɔ akɛ eyɛ emli lɛ, sa akɛ enyiɛ tamɔ bɔ ni lɛ hu enyiɛɔ lɛ nɔŋŋ.

Kitã hee lɛ

⁷ Suɔmɔmɛi, jeee kitã hee ko miŋmaa nyɛ nɛɛ, shi moŋ kitã momo ni nyɛyɔɔ kɛjɛ shishijee lɛ. Kitã momo lɛ ji wiemɔ ni nyɛnu lɛ.

⁸ Shi asaŋ kitã hee miŋmaa nyɛ nɛɛ, nɔ ni ji anɔkwa yɛ Kristo mli kɛ nyɛ hu nyɛmli lɛ, ejaakɛ duŋ lɛ eho, ni anɔkwa là lɛ miitso momo.

⁹ Mɔ ni kɛɔ akɛ eyɛ la lɛ mli ni enyɛ̃ɔ enyɛmi lɛ, eyɛ duŋ lɛ mli lolo.

¹⁰ Mɔ ni sumɔɔ enyɛmi lɛ, eyɛ la lɛ mli, ni nanetɔ̃tɔ̃mɔnɔ ko bɛ emli.

¹¹ Shi mɔ ni nyɛɔ enyɛmi lɛ, duŋ lɛ mli eyɔɔ, ni duŋ lɛ mli enyiɛɔ, ni eleee he ni eyaa, ejaakɛ duŋ lɛ eshwila ehiŋmɛii.

Nyɛkasumɔa je lɛ

¹² Miiŋma nyɛ, mibii bibii, ejaakɛ akɛ nyɛhe eshai lɛ efa nyɛ yɛ Kristo gbɛi lɛ hewɔ.

¹³ Miiŋma nyɛ, ataamɛi, ejaakɛ nyɛle mɔ ni yɔɔ kɛjɛ shishijee lɛ. Miiŋma nyɛ, oblahii, ejaakɛ nyɛye mɔ fɔŋ lɛ nɔ kunim.

¹⁴ Miiŋma nyɛ, gbekɛbii, ejaakɛ nyɛle Tsɛ lɛ. Miiŋma nyɛ, ataamɛi, ejaakɛ nyɛle mɔ ni yɔɔ kɛjɛ shishijee lɛ. Miŋma nyɛ, oblahii, ejaakɛ nyɛhe wa, ni Nyɔŋmɔ wiemɔ lɛ yɛ nyɛmli, ni nyɛye mɔ fɔŋ lɛ nɔ kunim.

¹⁵ Nyɛkasumɔa je lɛ loo nibii ni yɔɔ je lɛ mli. Kɛji mɔ ko miisumɔ je lɛ, belɛ Tsɛ lɛ suɔmɔ lɛ bɛ emli,

¹⁶ ejaakɛ nɔ fɛɛ nɔ ni yɔɔ je lɛ mli lɛ — heloo lɛ sɛɛdiinii lɛ kɛ hiŋmɛii lɛ asɛɛdiinii lɛ kɛ shihilɛ mli hewoo lɛ — ejɛɛɛ Tsɛ lɛ mli, shi moŋ je lɛ mli ejɛ.

¹⁷ Je lɛ hoɔ eyaa kɛ emli sɛɛdiinii lɛ, shi mɔ ni feɔ Nyɔŋmɔ suɔmɔnaanii lɛ hiɔ shi kɛyaa naanɔ.

Nyɛkwɛa nyɛhe yɛ Kristo henyɛlɔi ahe

¹⁸ Gbekɛbii, naagbee ŋmɛlɛtswaa lɛ nɛ; ni bɔ ni nyɛnu akɛ Kristo henyɛlɔ lɛ miiba lɛ, Kristo henyɛlɔi lɛ pii eba amrɔ nɛɛ, hewɔ lɛ wɔle akɛ naagbee ŋmɛlɛtswaa lɛ nɛ.

¹⁹ Wɔteŋ amɛjɛ amɛtee, shi kɛ̃lɛ amɛjeee wɔteŋ mɛi komɛi, ejaakɛ wɔteŋ mɛi komɛi ji amɛ kulɛ amɛ kɛ wɔ hi shi. Shi amɛtee bɔ ni afee ni amɛ jie amɛhe shi akɛ amɛ fɛɛ lɛ jeee wɔteŋ mɛi komɛi ji amɛ.

²⁰ Ni nyɛ lɛ, nyɛna mufɔɔ kɛjɛ Mɔ Krɔŋkrɔŋ lɛ dɛŋ, ni nyɛle nii fɛɛ.

²¹ Jeee akɛ nyɛleee anɔkwale lɛ hewɔ miŋma nyɛ nɛɛ, shi moŋ akɛ nyɛle, ni nyɛle akɛ amale komeflo jɛɛɛ anɔkwale lɛ mli.

²² Namɔ ji amalelɔ, kɛjeee mɔ ni kɛɔ akɛ Yesu jeee Kristo lɛ? Mɔ ni kwaa Tsɛ lɛ kɛ Bi lɛ, lɛ ji Kristo henyɛlɔ lɛ,

²³ Mɔ fɛɛ mɔ ni kwaa Bi lɛ, ebɛ Tsɛ lɛ hu; shi mɔ ni gbaa mli kpoo akɛ eheɔ Bi lɛ nɔ eyeɔ lɛ, eyɛ Tsɛ lɛ hu.

²⁴ No hewɔ lɛ, nyɛ lɛ, nɔ ni nyɛnu kɛjɛ shishijee lɛ, nyɛhãa no ahia nyɛmli. Kɛji nɔ ni nyɛnu kɛjɛ shishijee lɛ hi nyɛmli lɛ, no lɛ nyɛ hu nyɛaahi Bi lɛ kɛ Tsɛ lɛ mli.

²⁵ Ni enɛ ji shi ni ewo wɔ lɛ — naanɔ wala lɛ.

²⁶ Mɛi ni hãa nyɛduɔ gbɛ lɛ ahewɔ miŋmaa nyɛ nii nɛɛ.

²⁷ Ni nyɛ lɛ, mufɔɔ ni nyɛna kɛjɛ eŋɔɔ lɛ yɛ nyɛmli, ni ehe ehĩaaa nyɛ akɛ mɔ ko atsɔ̃ɔ nyɛ nii, shi moŋ bɔ ni emufɔɔ lɛ tsɔ̃ɔ nyɛ nii fɛɛ, ni eji anɔkwale ni jeee amale ni lɛ, bɔ ni etsɔ̃ɔ nyɛ lɛ nyɛhia emli.

²⁸ Ni agbɛnɛ, mibii bibii, nyɛhia emli koni be ni eeebapue lɛ, wɔna ekãa ni wɔhiɛ akagboi ni wɔnyɛɛɛ ehiɛ wɔdamɔ yɛ ebaa lɛ mli.

²⁹ Kɛji nyɛle akɛ jalɔ ji lɛ lɛ, nyɛnaa nyɛlea akɛ mɔ fɛɛ mɔ ni tsuɔ jalɛnii lɛ afɔ lɛ kɛjɛ emli.