1 Yohane 1 - ŊMALƐ KRƆŊKRƆŊ LƐ

Wala Wiemɔ lɛ

¹ Wala wiemɔ lɛ yɛ kɛjɛ shishijee. Wɔnu ni wɔna kɛ wɔhiŋmɛii, wɔkwɛ ni wɔniji etara he yɛ wala wiemɔ lɛ hewɔ.

² Ni wala lɛ jie ehe kpo etsɔ̃ɔ, ni wɔna, ni wɔyeɔ he odase ni wɔjajeɔ naanɔ wala lɛ, nɔ ni kɛ Tsɛ lɛ yɔɔ ni ejie ehe kpo etsɔ̃ɔ wɔ lɛ he sane wɔtsɔ̃ɔ nyɛ lɛ.

³ Nɔ ni wɔna ni wɔnu lɛ, no wɔjajeɔ wɔtsɔ̃ɔ nyɛ hu, koni nyɛ hu nyɛkɛ wɔ abɔ naanyo. Shi wɔnaanyobɔɔ lɛ, Tsɛ lɛ kɛ eBi Yesu Kristo lɛ wɔkɛbɔɔ.

⁴ Wɔmiiŋma nyɛ nii nɛɛ, koni nyɛmiishɛɛ lɛ ayi obɔ̃.

Nyɔŋmɔ lɛ là ji lɛ

⁵ Ni enɛ ji sane lɛ ni wɔnu kɛjɛ ebi lɛ ŋɔɔ ni wɔsaa wɔjajeɔ wɔtsɔ̃ɔ nyɛ lɛ. No ji akɛ Nyɔŋmɔ lɛ, là ji lɛ, ni duŋ ko kwraa bɛ emli,

⁶ Kɛji wɔkɛɛ akɛ wɔkɛ lɛ miibɔ naanyo ni wɔnyiɛɔ duŋ lɛ mli lɛ, wɔmiimale ni wɔyeee anɔkwa.

⁷ Shi kɛji wɔnyiɛɔ là lɛ mli, tamɔ bɔ ni lɛ diɛŋtsɛ eyɔɔ là lɛ mli lɛ, no lɛ wɔkɛ wɔhe miibɔ naanyo, ni eBi Yesu Kristo la lɛ tsumɔɔ wɔhe kɛjeɔ esha fɛɛ mli.

⁸ Kɛji wɔkɛɛ akɛ esha ko bɛ wɔhe lɛ, wɔ diɛŋtsɛ wɔhe wɔshishiuɔ, ni anɔkwale lɛ bɛ wɔmli.

⁹ Kɛji wɔjaje wɔhe eshai lɛ wɔtsɔ̃ɔ Nyɔŋmɔ lɛ, anɔkwafo kɛ jalɔ ji lɛ, ni ekɛ wɔhe eshai lɛ aaafa wɔ ni eeetsumɔ wɔhe kɛjɛ nii ni ejaaa gbɛ fɛɛ mli.

¹⁰ Kɛji wɔkɛɛ akɛ wɔfeko esha lɛ, belɛ wɔhã Nyɔŋmɔ etsɔ̃ amalelɔ, ni ewiemɔ lɛ bɛ wɔmli.