1 Timoteo 6 - ŊMALƐ KRƆŊKRƆŊ LƐ

Tsuji kɛ amɛgbɛnaa nitsumɔi

¹ Tsuji abɔ ni yɔɔ apã shishi lɛ abu amɛ diɛŋtsɛ amɛnuŋtsɔmɛi lɛ akɛ mɛi ni sa woo fɛɛ, koni akawie Nyɔŋmɔ gbɛi lɛ kɛ tsɔ̃ɔmɔ lɛ he musubɔɔ wiemɔ.

² Shi tsuji ni yɔɔ nuŋtsɔmɛi heyelɔi lɛ akaŋɔ lɛ akɛ nuŋtsɔmɛi lɛ nyɛmimɛi ji amɛ hewɔ lɛ esaaa akɛ hiɛ sɔɔ amɛ, shi moŋ amɛsɔ̃mɔ amɛ jogbaŋŋ ejaakɛ mɛi ni naa sɔ̃ɔmɔ nɛɛ he sɛɛ lɛ nyɛmimɛi heyelɔi kɛ suɔmɔmɛi ji amɛ. Tsɔ̃ɔmɔ nii nɛɛ ni owo he ŋaa.

Amale tsɔ̃ɔmɔ kɛ anɔkwa ninamɔ

³ Kɛ mɔ ko tsɔ̃ɔ tsɔ̃ɔmɔ kroko ni ekpɛlɛ̃ɛɛ wɔNuŋtsɔ Yesu Kristo wiemɔi ni hi lɛ kɛ tsɔ̃ɔmɔ ni atsɔ̃ɔ yɛ Nyɔŋmɔjamɔ naa lɛ nɔ lɛ,

⁴ no lɛ ewo ehe nɔ, eleee nɔ ko, shi moŋ eeye ŋwanejee kɛ naataamɔ hela, ni nibii ni jɛɔ mli ji hiɛkɔ̃ɔ, bei, oshekuyeli, mɛi ahe susumɔi fɔ̃ji,

⁵ yakayaka blɔmɔi — enɛɛmɛi fɛɛ lɛ mɛi ateŋ ni anaa yɛ ji gbɔmɛi ni amɛjwɛŋmɔ efite ni ashɔ̃ anɔkwale lɛ yɛ amɛdɛŋ ni amɛsusuɔ akɛ Nyɔŋmɔjamɔ ji ninamɔ lɛ.

⁶ Shi lɛɛlɛŋ, ninamɔ kpeteŋkple ji Nyɔŋmɔjamɔ, kɛji mɔ ko miishɛ enii ahe lɛ.

⁷ Ejaakɛ wɔkɛ nɔ ko nɔ ko baaa je nɛɛŋ, no hewɔ lɛ, wɔnyɛŋ wɔkɛ nɔ ko aya hu.

⁸ Shi kɛ wɔyɛ ŋmaa kɛ hehaanii kɛkɛ lɛ, esa akɛ wɔmii ashɛ he.

⁹ Shi mɛi ni taoɔ afee niiatsɛmɛi lɛ gbeɔ kaa kɛ tsɔne kɛ kwashiai akɔnɔi pii ni fiteɔ mɔ, ni tsiɔ mɛi ewoɔ hiɛkpãtãmɔ kɛ laajemɔ mli lɛ amli.

¹⁰ Ejaakɛ nibii fɔ̃ji fɛɛ ashĩshifã ji shikasuɔmɔ ni mɛi komɛi di sɛɛ ni amɛdu gbɛ kɛjɛ hemɔkɛyeli lɛ mli, ni amɛkɛ piŋmɔi babaoo egbulɔ amɛtsui lɛ.

Ŋaawoi

¹¹ Shi bo lɛ, Ao Nyɔŋmɔ gbɔmɔ, joo nibii nɛɛ anaa foi, ni onyiɛ jalɛ, Nyɔŋmɔjamɔ, hemɔkɛyeli, suɔmɔ, hiɛmiamɔ, kɛ kpoofeemɔ sɛɛ.

¹² Wuu hemɔkɛyeli he ta kpakpa lɛ, mɔ naanɔ wala lɛ mli, nɔ he hu ni atsɛ bo kɛba ni ojaje jajemɔ fɛɛfɛo yɛ odasefoi pii ahiɛ lɛ.

¹³ Miiwo bo kitã yɛ Nyɔŋmɔ ni hãa nibii fiaa wala lɛ kɛ Kristo Yesu ni ye jajemɔ fɛɛfɛo lɛ he odase yɛ Pontio Pilato yinɔ lɛ hiɛ,

¹⁴ akɛ oye kitã lɛ nɔ, ni kpa ko loo shwamɔ ko akahi he kɛyashi wɔNuŋtsɔ Yesu Kristo puemɔ lɛ mli,

¹⁵ nɔ ni nɔyelɔ kome ni yɔɔ hewalɛ ni ajɔɔ lɛ, maŋtsɛmɛi aMaŋtsɛ kɛ nuŋtsɔmɛi aNuŋtsɔ lɛ baahã aba mli yɛ lɛ diɛŋtsɛ ebe ni sa mli lɛ.

¹⁶ Lɛ ekome eyɔɔ naanɔ shihilɛ ni gbele bɛ mli, ni ehiɔ la ni anyɛŋ abɛŋkɛ mli; gbɔmɔ ko gbɔmɔ ko enako lɛ dã, ni enyɛŋ lɛ ena hu lɛ. Enɔ ji woo kɛ naanɔ hewalɛ lɛ. Amen!

¹⁷ Niiatsɛmɛi ni yɔɔ je nɛɛŋ lɛ, wo amɛ kitã ni amɛkabu amɛhe tsɔ̃, ni amɛkɛ amɛhiɛ akafɔ̃ ninamɔ ni anyɛ̃ɛɛ akɛ he afɔ̃ nɔ lɛ nɔ, shi moŋ amɛkɛfɔ̃ Nyɔŋmɔ, mɔ hu ni kɛ nibii fɛɛ hãa wɔ babaoo, akɛ wɔye mliŋɔɔmɔ lɛ nɔ.

¹⁸ Ni amɛfee ejurɔ ni amɛtsɔ̃mɔ niiatsɛmɛi yɛ nitsumɔi kpakpai amli, amɛsumɔ nihãmɔ, amɛdɛŋ akpɔ.

¹⁹ Amɛbɔ jwetri amɛhã amɛhe ni efee shishitoo kpakpa ehã be ni baaba lɛ, koni amɛmɔ anɔkwa wala lɛ mli.

²⁰ Ao Timoteo, nii ni atu awo odɛ̃ŋ lɛ, baamɔ yi ni okwa yakayaka sanegbaa ni buleɔ mɔ kɛ wiemɔi ni bɛ ekome ni jɛ apasa nilee mli.

²¹ Ni mɛi komɛi tsɔ̃ɔ akɛ amɛyɔɔ ni amɛdu gbɛ kɛjɛ hemɔkɛyeli lɛ he lɛ. Dromɔ lɛ kɛ nyɛ ahi shi! Amen.