1 Timoteo 5 - ŊMALƐ KRƆŊKRƆŊ LƐ

Bɔ ni akɛ onukpai kɛ oblahii kɛ oblayei wieɔ

¹ Kaafãmɔ onukpa ko, shi moŋ owie otsɔ̃ɔ lɛ akɛ tsɛ; oblahii hu akɛ nyɛmimɛi;

² yei onukpai lɛ akɛ nyɛmɛi; oblayei lɛ hu akɛ nyɛmimɛiyei yɛ hetsemɔ fɛɛ mli.

Timoteo gbɛnaa nitsumɔ hã okulafoi

³ Yei okulafoi ni ji okulafoi lɛɛlɛŋ lɛ wo amɛ.

⁴ Shi kɛ yoo okulafo ko yɛ bii loo nabii lɛ, amɛkase Nyɔŋmɔ gbeyeishemɔ yɛ amɛ diɛŋtsɛ amɛshĩa tsutsu, ni amɛto amɛfɔlɔi lɛ anajiaŋ pɛpɛɛpɛ; ejaakɛ enɛ sa Nyɔŋmɔ hiɛ.

⁵ Shi mɔ ni ji yoo okulafo lɛɛlɛŋ ni eshwɛ ekome too lɛ, ekɛ ehiɛ fɔ̃ɔ Nyɔŋmɔ nɔ ni ehiɛɔ faikpamɔi kɛ sɔlemɔi amli nyɔɔŋ kɛ shwane.

⁶ Shi yoo okulafo ni bɔɔ ahoshwi lɛ, ehiɛ kã nɛ, shi egbo.

⁷ Wo amɛ kitãi nɛɛ, koni akana amɛhe sane ko atã.

⁸ Shi kɛ mɔ ko kwɛɛɛ lɛ diɛŋtsɛ emɛi, titri lɛ, lɛ diɛŋtsɛ eshĩabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.

⁹ Akaŋɔ yoo okulafo ko awo sɔ̃ɔmɔ nitsumɔ lɛ mli akɛ ja mɔ ni eye afii nyɔŋmai ekpaa ni egbã nuu kome

¹⁰ ni ayeɔ enitsumɔi kpakpai ahe odase, no ji: kɛ elɛ bii, kɛ efee mɛi agbɔ, kɛ efɔ mɛi krɔŋkrɔŋi anaji ahe, kɛ eye ebua mɛi ni naa amanehulu lɛ, kɛ edi nitsumɔ kpakpa fɛɛ nitsumɔ kpakpa sɛɛ lɛ.

¹¹ Shi yei okulafoi ni drako lɛ, kaaŋɔ amɛ; ejaakɛ kɛ akɔnɔ te shi yɛ amɛmli ni ejie amɛ kɛjɛ Kristo he lɛ, amɛtaoɔ gbãlã,

¹² ni amɛnaa kojomɔ ejaakɛ amɛku amɛklɛŋklɛŋ shiwoo lɛ mli.

¹³ Ni amɛsaa amɛkaseɔ hejɔ̃feemɔ, amɛkpaa shi yɛ shĩai, ni jeee hejɔ̃lɔi kɛkɛ amɛtsɔ̃mɔɔ, shi amɛwiewieɔ mɛi ahe hu, amɛkɛ amɛhe woɔ mɛi asaji amli, amɛwieɔ nii ni esaaa.

¹⁴ No hewɔ lɛ, miisumɔ akɛ yei okulafoi ni drako lɛ agbã, ni amɛfɔ bii, ni amɛye amɛwe nɔ, ni amɛkahã henyɛlɔ lɛ miina hegbɛ ko kɛmiijɛ wɔ.

¹⁵ Ejaakɛ mɛi komɛi ekpale eyanyiɛ Satan sɛɛ momo.

¹⁶ Shi kɛ nuu loo yoo heyelɔ ko yɛ wekumɛi yei okulafoi lɛ, ekwɛ amɛ, ni jatsu akakã asafo lɛ nɔ, koni asafo lɛ akwɛ okulafoi ni ji okulafoi lɛɛlɛŋ lɛ.

Timoteo gbɛnaa nitsumɔ hã asafonukpai

¹⁷ Onukpai ni tsuɔ amɛnii jogbaŋŋ akɛ nɔkwɛlɔi lɛ, abu amɛ akɛ amɛsa woo toi enyɔ, titri lɛ mɛi ni tsuɔ shiɛmɔ kɛ nitsɔɔmɔ he nii waa lɛ.

¹⁸ Ejaakɛ ŋmalɛ lɛ kɛɔ akɛ, “Kaawo tsina ni gbɛlɛɔ abele naabu kotoku;” kɛ, “Nitsulɔ lɛ, enyɔmɔwoo sa lɛ.”

¹⁹ Kɛ afolɔ onukpa ko naa lɛ, kaahe okpɛ̃lɛ akɛ ja yɛ odasefoi enyɔ loo etɛ̃ naa dã.

²⁰ Mɛi ni feɔ esha lɛ, okã amɛ yɛ mɛi fɛɛ ahiɛ, koni mɛi ni eshwɛ lɛ hu ashe gbeyei.

²¹ Miiwo bo kitã yɛ Nyɔŋmɔ kɛ Kristo Yesu kɛ ebɔfoi ni ehala lɛ ahiɛ, akɛ oye nii nɛɛ anɔ ni okasha ohe okojo, ni asaŋ okafee nɔ ko kɛ niiaŋkpamɔ.

²² Kɛ oniji akashwie mɔ ko nɔ oya, ni asaŋ kaafata mɛi krokomɛi ahe kɛfee esha. Too ohe krɔŋŋ.

²³ Kaanu nu kɛkɛ dɔŋŋ, shi nuu wain fioo yɛ omusu kɛ ohelai ni yeɔ bo kpitiokpitio lɛ ahewɔ.

²⁴ Mɛi komɛi ahe eshai jeɔ kpo faŋŋ, ni enyiɛɔ amɛhiɛ ekɛ amɛ yaa kojomɔ mli, shi mɛi komɛi anɔ hu nyiɛɔ amɛsɛɛ.

²⁵ Nakai nɔŋŋ kɛ̃ nitsumɔi kpakpai hu jeɔ kpo faŋŋ, ni nii ni ejeee kpo lɛ hu anyɛŋ akɛtee.