1 Timoteo 4 - ŊMALƐ KRƆŊKRƆŊ LƐ

Amale tsɔɔlɔi

¹ Shi Mumɔ lɛ kɛɔ faŋŋ akɛ naagbee gbii lɛ amli lɛ mɛi komɛi aaakwa hemɔkɛyeli lɛ, ni amɛaabo lakamɔ mumɔi kɛ mumɔi fɔ̃ji atsɔ̃ɔmɔi atoi

² kɛtsɔ̃ amalelɔi asatofeemɔ nɔ; amalelɔi ni ashã amɛ diɛŋtsɛ amɛhenilee, tamɔ akɛ dade kɛ la shãa nɔ lɛ;

³ amɛtsiɔ yooŋɔɔ gbɛ, ni amɛtsɔ̃ɔ akɛ ahi ŋmaa ni Nyɔŋmɔ bɔ akɛ mɛi ni heɔ yeɔ ni amɛle anɔkwale lɛ kɛ shidaa aye lɛ.

⁴ Ejaakɛ nɔ fɛɛ nɔ ni Nyɔŋmɔ bɔ lɛ ehi, ni ahiii nɔ ko nɔ ko ni akɛ shidaa yeɔ lɛ,

⁵ ejaakɛ akɛ Nyɔŋmɔ wiemɔ kɛ sɔlemɔ tsuɔ he.

Kristo Yesu sɔ̃ɔlɔ kpakpa

⁶ Kɛji otsɔ̃ɔ nyɛmimɛi lɛ enɛɛmɛi lɛ, obaafee ohe Kristo Yesu sɔ̃ɔlɔ kpakpa, mɔ ni kɛ hemɔkɛyeli kɛ tsɔ̃ɔmɔ kpakpa ni onyiɛ sɛɛ lɛ wiemɔi lɛ lɛɔ ehe.

⁷ Shi yeimeji ayakayaka adesãi lɛ, tsi ohe kɛjɛ he. Ni otsɔse ohe yɛ Nyɔŋmɔjamɔ mli moŋ.

⁸ Ejaakɛ hetsɔsemɔ yɛ gbɔmɔtso gbɛfaŋ he sɛɛnamɔ faaa, shi hetsɔsemɔ yɛ Nyɔŋmɔjamɔ mli he yɛ sɛɛnamɔ yɛ nii fiaa mli, ni eyɛ wala ni yɔɔ amrɔ nɛɛ kɛ nɔ ni baaba lɛ he shiwoo.

⁹ Eji anɔkwa wiemɔ ni sa akɛ amɔ mli kwraa.

¹⁰ Enɛ hewɔ wɔgboɔ deŋme ni wɔpeleɔ wɔhiɛ lɛ, ejaakɛ wɔkɛ wɔhiɛ efɔ̃ Nyɔŋmɔ hiɛkãalɔ lɛ nɔ, mɔ ni ji gbɔmɛi fɛɛ ayiwalaherelɔ lɛ, titri lɛ mɛi ni heɔ yeɔ lɛ.

¹¹ Wo nibii nɛɛ ahe kitã ni otsɔ̃ɔ.

¹² Kaahã mɔ ko miibu akɛ ojeee mɔ ko yɛ oblanyo ni oji lɛ hewɔ, shi moŋ okɛ ohe ato okadi ohã mɛi ni heɔ yeɔ lɛ, yɛ wiemɔ mli, yɛ hetsemɔ mli.

¹³ Okɛ ojwɛŋmɔ afɔ̃ ŋmalɛi lɛ akanemɔ kɛ asafo lɛ hamɔ kɛ ŋaawoo kɛ nitsɔɔmɔ nɔ kɛyashi beyinɔ ni maba.

¹⁴ Kaaŋmɛɛ dromɔkeenɔ ni yɔɔ omli ni atsɔ̃ gbalɛ kɛ onukpai lɛ aniji ni akɛshwie onɔ lɛ nɔ akɛhã bo lɛ he.

¹⁵ Tsu nii nɛɛ ahe nii, okɛ ohe awo mli kwraa, koni mɛi fɛɛ ana onɔyaa faŋŋ.

¹⁶ Ohiɛ ahi ohe nɔ, ohiɛ ahi tsɔ̃ɔmɔ lɛ nɔ, hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔ bo toi lɛ fɛɛ ayiwala.